Jɔn 3
3
Yisa mini Nikɔdimus
1Yɛhudianim’ kpeen’ so daa beni ka o yuli booni Nikɔdimus. O daa nyɛla Farisiinim’ ni yino. 2Dahin shɛli yuŋ ka o daa ti chaŋ Yisa sani ti yɛl’ o, “N dana, ti mi ni a nyɛla karimba ŋun yi Naawuni sanna, dama so kani ŋun ni tooi wuhi shihir’ shɛŋa a ni wuhiri ŋɔ ka pa ni Naawuni m-be o sani.”
3Ka Yisa yɛl’ o, “Achiikatim, yɛlimaŋli ka n yɛr’ a, faashee bɛ maan labi dɔɣi ninsala, di yi pa lala o ku tooi nya Naawuni nam.” 4Ka Nikɔdimus bɔh’ o, “Ninsal’ yi kurigi, wula ka o lan yɛn niŋ ka bɛ dɔɣ’ o yaha? O ni lan tooi kpe o ma puuni ka o dɔɣ’ o yaha?” 5Ka Yisa lan yɛl’ o, “Achiikatim, yɛlimaŋli ka n yɛr’ a, faashee bɛ maan labi dɔɣi ninsala ni kom mini Naawuni Shia, di yi pa lala o ku tooi kpe Naawuni nam ni. 6Sal’ ni dɔɣ’ shɛli nyɛla sala; ka Naawuni Shia mi ni dɔɣ’ shɛli nyɛla shia. 7Di chɛ ka n ni yɛl’ a ni faashee bɛ maan labi dɔɣ’ a yaha maa niŋ a alahiziba. 8Pɔhim ʒiɛri kparila di yubu polo, ka a wumdi di damli, amaa ka bi mi di ni yiri shɛli polo na bee di ni kpari shɛli polo; lala mi ka Naawuni Shia ni dɔɣ’ sokam be.” 9Ka Nikɔdimus bɔh’ o, “Wula ka dimbɔŋɔ ni tooi nani?” 10Ka Yisa garigi bɔh’ o, “A nyɛla Yɛhudianim’ karimbanim’ ni yino, ka ʒi dimbɔŋɔ? 11Achiikatim, yɛlimaŋli ka n yɛr’ a, tinim’ tɔɣisirila ti ni mi shɛli yɛla, ka diri ti nini ni nya shɛli shɛhira; amaa ka yi bi niŋdi ti shɛhira maa yɛda. 12N ni tɔɣis’ a dunia ŋɔ ni yɛtɔɣa ka a bi niŋ li yɛda ŋɔ, ka n yi tɔɣis’ a alizanda ni yɛtɔɣa, wula ka a ni tooi niŋ li yɛda? 13So na ʒi n-chaŋ alizanda ni naɣila Daadam Bia ŋun yi alizanda ni na.”
14 #
Kal 21.9
Anabi Musa ni daa zaŋ wahu kpahi tabili daɣu zuɣu n-zaŋ sa mɔɣu ni shɛm la, di nyɛla talahi ni bɛ ti zaŋ Daadam Bia gba sa zuɣusaa lala, 15ka ŋunkam ti niŋ o yɛda nya nyɛvili din ka bahigu. 16Dama Naawuni yuri dunianim’ hal ti zaŋ o Bi’ gaŋa ti ba ni ŋunkam niŋ o yɛda ti ku bahi yoli, amaa o ni ti nyala nyɛvili din ka bahigu. 17Dama Naawuni daa bi tim o Bia maa dunia ŋɔ ni na ni o ti karila dunianim’ saria, amaa ni dunianim’ lee ti tiligi o zuɣu.
18 Ŋunkam niŋ o yɛda lan ka saria karibu ni, amaa ŋunkam bi niŋ o yɛda, bɛ pun kar’ o saria, dilan’ ni bi niŋ Naawuni Bi’ gaŋ’ maa yɛda zuɣu. 19Ka din chɛ ka saria karibu beni maa nyɛla, neesim ni ka dunia ŋɔ ni na ka salinim’ ni yu tuumbiɛri tumbu zuɣu chɛ ka bɛ bɔrila zibisim gari neesim maa la. 20Ŋunkam zaa tumdi tuumbiɛri je neesim ka mi ku saɣi chaŋ neesim ni, o tuumbiɛri maa ti yi palo zuɣu. 21Amaa ŋunkam zaa tumdi din tuhi chanila neesim ni ni sokam ti nya o tuma ka baŋ ni o zɔri Naawuni.
Yisa mini Jɔn Baptaizira
22Dimbɔŋɔ nyaaŋa ka Yisa min’ o nyaandoliba daa chaŋ Judia tiŋgbɔŋ ni ka o ti kpalim be bɛ sani nimaani m-baptaiziri niriba. 23Jɔn Baptaizira gba daa bela Ɛnɔn tin’ shɛli din miri Salim la m-baptaiziri niriba, dama kom daa be nimaani pam; ka niriba chani o sani ka o ti baptaiziri ba. 24#Mat 14.3; Maak 6.17; Luk 3.19-20 Di saha maa bɛ daa na bi kpɛhi Jɔn duu.
25Ka naŋgbankpeeni daa ti kpe Jɔn Baptaizira nyaandoliba mini Yɛhudia ninvuɣ’ so sunsuuni bɛ ni paɣibu kali dolibu zuɣu. 26Ka bɛ daa chaŋ Jɔn sani ti yɛl’ o, “Karimba, ŋun daa be a sani Jɔɔdɛn mɔɣili yaɣili ka a di o shɛhira la baptaizirila niriba pumpɔŋɔ, ka sokam zaa kabiri chani o sani.”
27Ka Jɔn yɛli ba, “So ku tooi mali shɛli ka di pa ni Naawuni n-ti o li. 28#Jɔn 1.20 Yimaŋmaŋ’ di ma shɛhira ni n daa yɛliya ni pa mani n-nyɛ Masia maa, amaa Naawuni n-tim ma ni n daŋ o tooni na. 29Ŋun su amiliya n-nyɛ aŋgo; amaa aŋgo zo so ŋun be o sani wumd’ o yɛtɔɣa nyari suhupiɛlli pam di zuɣu; lala zuɣu ka n suhupiɛlli galisi pam maa. 30Di nyɛla talahi ni ŋun’ pahi, ka man’ filim.”
Ŋun yi alizanda ni na
31Ŋun yi zuɣusaa na gari sokam zaa; ŋun yi dunia ŋɔ ni na nyɛla dunia ŋɔ nira, ka tɔɣisiri dunia ŋɔ yɛla; amaa ŋun yi alizanda ni na gari sokam zaa. 32Ka o ni nya ka wum shɛli, dina ka o tɔɣisira; ka so mi bi deer’ o yɛligu. 33Amaa ŋunkam saɣi deeg’ o yɛligu maa ni dihi tabili ni Naawuni nyɛla yɛlimaŋlilana. 34Naawuni ni tim so na maa tɔɣisirila Naawuni yɛtɔɣa, dama Naawuni zaŋ o Shia Kasi ti o ka di ka buɣisibu. 35#Mat 11.27; Luk 10.22 Naawuni ŋun nyɛ ti Ba yuri o ni tim o Bi’ so na maa, ka zaŋ binshɛɣukam zaa niŋ o nuu ni. 36Ŋunkam niŋ Bia maa yɛda mali nyɛvili din ka bahigu; ka ŋunkam mi bi deei Bia maa noli ku nya nyɛvili, amaa ka Naawuni suhu kul ni yiɣisiri bahir’ o zuɣu.
Currently Selected:
Jɔn 3: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011