Zuɣulaannima 2
2
Naawuni malaika chaŋ Bokim
1Ka Yawɛ malaika daa yi Giligal chaŋ Bokim ti yɛli Izraɛlnima, “Naawuni yɛliya, mani n-daa yihi ya Ijipti n-zaŋ ya na ti niŋ tiŋgbɔn shɛli n ni daa lo yi yaannima alikauli ni n ni zaŋ li ti ba la ni. N daa yɛliya ni n ku lɔrigi alikauli shɛli n ni lɔn ya maa. 2#Yibu 34.12-13; Zal 7.2-5 Ka di bi simdi ni yi lo ninvuɣ’ shɛb’ bɛn be tiŋgbɔŋ ŋɔ ni alikauli, naɣ’ wurimmiyala bɛ buɣa bimbina la. Amaa ka yi zaɣisi n ni zali ya shɛm maa niŋbu. Tuun’ bɔ ka yi lee tum maa? 3Dinzuɣu pumpɔŋɔ n yɛri ya mi, n ku lan kari niriba maa tin ya. Bɛ ni leei yi dimnima; ka bɛ wuna leei zana gbahi ya.” 4Yawɛ malaika maa ni daa tɔɣisi Izraɛlnim’ zaa yɛtɔɣa ŋɔ naai, bɛ daa duhila bɛ yee kum. 5Dina n-chɛ ka bɛ daa boli nimaani yuli Bokim.#2.5 BOKIM: Hiburuli ni yuli ŋɔ gbinni nyɛla ‘Niriba bɛn kumda’. Ka bɛ daa mali sara ti Yawɛ nimaani.
Jɔshua kum
6Ka Jɔshua daa chɛbisi Izraɛlnima, ka sokam daa lab’ kuli ni bɛ ti deei bɛ ni zaŋ tiŋgban’ shɛŋa ti ba maa. 7Ka niriba maa daa jɛm Naawuni Jɔshua ʒiɛman’ ni mini zuɣulaan’ shɛb’ bɛn daa doli Jɔshua nyaaŋa, ka daa nya Yawɛ ni tum tuun’ kar’ shɛŋa ti Izraɛlnim’ la. 8Ka Yawɛ dabili Jɔshua Nan bia maa daa ti kpi. O daa niŋ dunia yil’ la yuun’ kɔbiga ni pia. 9#Jɔsh 19.49-50 Ka bɛ daa sɔɣ’ o omaŋmaŋ’ tiŋgban’ ni Timnatisɛra din be Ifriim tiŋgban’ ni zoya tiŋgban’ ni zaŋ labi Gaash Zoli nuzaa polo la. 10Ka di ʒiɛmani maa niriba zaa gba daa ti kpi. Ka ʒiɛman’ shɛli din paya niriba daa yiɣisina. Bɛn’ daa bi mi Yawɛ bee m-mi o ni daa tum tuun’ shɛŋa ti Izraɛlnim’ la yɛla.
Izraɛlnim’ chɛ Naawuni jɛmbu
11Izraɛlnim’ daa tum alahichi Yawɛ sani. Bɛ daa kpɛla Baalnim’ jɛmbu ni. 12Bɛ daa zaɣisi Yawɛ ŋun nyɛ bɛ yaannim’ Naawuni ŋun daa yihi ba Ijipti tiŋgbɔŋ ni na la jɛmbu, ka ŋmaligi jɛmdila ninvuɣ’ shɛb’ bɛn daa gil’ ba la wuna. Ka bɛ ni daa niŋ shɛm maa chɛ ka Yawɛ suhi yiɣisi. 13Bɛ daa zaɣisi Yawɛ, ka ŋmaligi jɛmdila Baal mini Ashitarɔt. 14Ka Yawɛ suhu daa yiɣisi pam bahi Izraɛlnim’ zuɣu ka o zaŋ ba niŋ ŋmɛnditoya nuu ni, ka bɛ ŋme ba ka di bɛ nɛma; ka lan chɛ ka bɛ dimnim’ bɛn gil’ ba nyaŋ ba, ka Izraɛlnim’ daa kɔŋ bɛmaŋ’ zuɣu zabbu. 15Ka Izraɛlnim’ daa yi lo tɔbu ni bɛ chaŋ ti tuhi bɛ dimnim’ saha shɛlikam, Yawɛ paarila o nuu bɛ zuɣu bɛ daalahichi tumbu zuɣu kaman o ni daa pun kpahi bɛ zuɣu ni ka po n-yɛli ba shɛm la. Ka nandahima daa mali ba pam. 16Di saha ka Yawɛ daa pii zuɣulaannim’ ti ba; ka zuɣulaannim’ maa daa tiligi ba ŋmɛnditoya maa nuu ni. 17Amaa ka Izraɛlnim’ daa ti zaɣisi zuɣulaannim’ maa noli; ka kul jɛmdila wuna. Di daa bi yuui ka bɛ ŋmaligi ka chɛ bɛ yaannim’ bɛn daa doli Yawɛ zaligunim’ ni daa doli so’ shɛl’ la, ka shiri bi dol’ li. 18Ka Yawɛ daa yi pii zuɣulaannim’ ti Izraɛlnim’ saha shɛlikam, o bela o ni pii zuɣulan’ so kam sani, ka tiligiri ba bɛ dimnim’ nuu ni zuɣulan’ maa ʒiɛman’ ni. Yawɛ daa zɔri ba nambɔɣu, bɛ dimnim’ maa ni daa nahindi ba ka muɣisiri ba, ka bɛ ŋuhiri shɛm la zuɣu. 19Amaa zuɣulan’ maa daa yi ti kpi, bɛ lan ŋmaligirimi tumdi tuumbiɛ’ shɛŋa din bie n-gari bɛ yaannim’ dini. Bɛ daa kul jɛmdila wuna ka damdir’ li tiŋa. Bɛ daa bi saɣi chɛ bɛ tuumbiɛri maa shɛli bee n-chɛ bɛ tipawumli soya la dolibu. 20Dinzuɣu ka Yawɛ suhu daa yiɣisi pam bahi Izraɛlnim’ zuɣu ka o yɛli, “Niriba ŋɔ ni saɣim alikauli shɛli n ni daa lo bɛ yaannima, ka zaɣisi n nol’ la zuɣu, 21n ku lan kari zuliya shɛb’ Jɔshua ni daa bi kari ka kpi la ti ba. 22N ni chɛ ba n-zaŋ ba buɣisi Izraɛlnim’ nya bɛ ni doli man’ Yawɛ soli kaman bɛ yaannim ni daa niŋ shɛm.” 23Dinzuɣu ka Yawɛ daa bi kari zuliya shɛb’ bɛn kpalim maa yomyom, ka mi daa bi chɛ ka Jɔshua kari ba.
Red Letter Dagbani Bible © Bible Society of Ghana, 2011