Aizaia 57
57
Naawuni galim Izraɛlnima buɣijɛmbo zuɣu
1Wuntizɔriba yi kpi, so baɣa kani
bee m-baŋdi din tahi lala na.
Amaa bɛ yi kpi,
bɛ yila zaɣ’ biɛɣu ni kpe suhudoo ni.
2Wuntizɔriba yi kpi,
bɛ nyarila vuhim bɛ kum maa puuni.
3Amaa yinim’ bɛn nyɛ baɣisi
mini zinaniŋdiba ni pagɔra bihi ŋɔ,
kamiya kpe na.
4Yinim’ bɛn nyɛ alahichinim’
mini ʒiŋmariba bihi ŋɔ,
ŋuni ka yi lee maani ansarisi?
Bee ŋuni ka yi lee mɛrigiri yi noya niŋda?
5Yi nyɛla bɛn jɛmdi buɣa,
ka zaŋdi paɣiba dooni di timaha gbinni;
ka zaŋdi yi bihi maani maligu vinvama
mini tampima lɔna ni.
6Yi lan pihiri nimaani nyolinsi n-leeri buɣa jɛmdi li;
ka boori binyɛra mini zimbuli bahiri di zuɣu.
Yi tɛhiya ni dimbɔŋɔnim’ zaa
nyɛla din ni chɛ ka n suhu piɛla?
7Yi duri zoya din du pam zuɣu nti maani maligu,
ka zaŋdi paɣiba dooni nimaani.
8Yi zaŋla yi wuna ŋmahima
n-zali baɣili yi duri puuni dunoya.
Yi zaɣisi ma, ka mali yi gariti ka di yɛlim pam,
ka ti yi mamanim’ liɣiri,
ka pirigiri yi situra
ka mali ba dooni nyari bɛ zaɣim.
9Yi ʒiɛri kpam,
ka niŋdi tulaale pam niŋdi yimaŋ’ chani ti jɛmdi Molɛk.
Buɣa jɛmbu zuɣu,
yi timdi tuumba katinsi
hal ka timdi ba kpiimba biɛhigu shee.
10Yi kul nahindi yimaŋa n-chani bɔri buɣa shee ni yi jɛm li,
ka bi yɛri ni di ka buchi.
Yi tɛhiya ni dina n-tiri ya kpiɔŋ,
ka yi bi gbarigira.
11“Bɔ n-lee chɛ ka yi zɔri dabiɛm,
ka ŋmari ma ʒiri,
ka bi lan tɛhiri n yɛla yi suhuri ni?
N ni shini ya ka di yuui,
ka ŋmaligi n nini bahi kpaŋ’ zuɣu
n-chɛ ka yi bi lan zɔri ma maa.
12Yi tɛhiya ni yi ni tumdi tuun’ shɛŋa viɛla,
amaa di mi ku sɔŋ ya.
13Yi yi ti kuhiri bɔri sɔŋsim,
yin’ chɛliya ka yi buɣa maa tiligi ya.
Pɔhim ni ʒe ba chaŋ.
Hal ninsal’ vuhibu pɔhim gba ni ʒe ba chaŋ.
Amaa ŋunkam zaa kana ti kpe n yuli,
o ni su tiŋgbani ŋɔ,
ka jɛm ma n zoli din be kasi zuɣu.”
Naawuni lo o niriba sɔŋsim mini tibbu alikauli
14Bɛ ni ti yɛli,
“Malimiya soli ti n niriba ŋɔ ka bɛ labi n sanna.
Vuɣimiya tigbirigu kam din be bɛ soli zuɣu.”
15Mani n-nyɛ Naawuni
ŋun galisi ka be kasi,
ka be luɣ’ shɛli din mali jilima ka be kasi,
ka nyɛ ŋun ni be hal ni saha din ka bahigu.
Amaa n nyɛla ŋun lan be ninvuɣ’ shɛb’ bɛn siɣisi bɛmaŋa ka niŋ tuuba sani
ni n neei bɛn siɣisi bɛmaŋ’ maa naani niŋbu,
ka neei bɛn niŋ tuuba maa mi tahima.
16N kul ku nyari n niriba maa taali
bee n yiɣisiri n suhu bahiri bɛ zuɣu sahakam,
dama di yi nyɛ lala
n ni ti bɛn’ ninvuɣ’ shɛb nyɛvili maa ni kpi.
17Bɛ daalahichi mini bɛ diribarilim zuɣu ka n daa chɛ ka n suhu yiɣisi bahi bɛ zuɣu,
ka n darigi bɛ tibili ka chɛ ba bahi;
amaa ka bɛ niŋ tipawumli n-kul dolila bɛmaŋmaŋ’ suhuyubu soli.
18N nya bɛ tuma, amaa n ni tib’ ba.
N ni wuhi ba soli, ka sɔŋ ba,
ka maai bɛn be fabila ni suhuri.
19 #
Ɛfɛs 2.17
N ni tib’ n niriba maa,
ka ti bɛn be yoma mini bɛn be katinsi zaa suhudoo.
Man’ Yawɛ n-yɛli lala maa.
20Amaa alahichinim’ ŋmanila teeku kɔgbana
din bi doya baalim,
ka kul puɣiri lura n-ʒiri daɣiri mini yaɣiri kpɛhiri teeku ni la.
21 #
Aiz 48.22
N Naawuni maa yɛliya, “Alahichinim’ ka suhudoo.”
Currently Selected:
Aizaia 57: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
