Aizaia 37
37
Naa niŋ Aizaia saawara
(2 Nanima 19.1-7)
1Naa Hɛzɛkia ni daa wum yɛtɔɣa ŋɔ, o daa dari tɔhila o binyɛra, ka zaŋ buɣu ye n-chaŋ Yawɛ jɛmbu duu. 2Ka o daa tim Ɛliakim ŋun daa su nayili fukumsi la mini Shɛbina ŋun daa nyɛ gbaŋŋmar’ la ni maligumaaniba kpamba, ka bɛ daa zaŋ buri ye n-chaŋ Amɔz bia anab’ Aizaia sani. 3Bɛ daa yɛl’ o mi, Hɛzɛkia ni yɛli shɛm m-bɔŋɔ: “Zuŋɔ nyɛla nandahima mini turi ni vi dihibo dabisili. Bihi dɔɣibu saha paaya ka yaa kani ŋ-ŋuhiri dɔɣiri ba. 4Di pa shɛli Yawɛ ŋun nyɛ a Naawuni ŋɔ wum Asiria naa ni tim sapashin’ kpɛma ka o kana ti tɔɣisi yɛtɔɣ’ shɛŋa mali ŋun’ Naawuni ŋun be ŋɔ ansarisi ŋɔ; ka ni darig’ o tibili ŋun’ Yawɛ ŋun nyɛ Naawuni ŋɔ ni wum yɛtɔɣ’ shɛŋa maa zuɣu. Dinzuɣu suhim’ Naawuni ninvuɣ’ shɛb’ bɛn kpalim beni zuɣu.”
5Naa Hɛzɛkia tuumba maa ni daa ka Aizaia sanna, 6Aizaia daa yɛli ba mi, Yɛlimiya yi dana ni Yawɛ yɛliya, Di chɛ ka dabiɛm mal’ a yɛtɔɣ’ shɛŋa a ni wum ka Asiria naa tuumba kana ti yɛli tu ma maa zuɣu. 7Man’ Yawɛ ni kpɛh’ o dabiɛm, ka di chɛ ka o wum vu’ shɛli damli ka ŋmaligi lab’ omaŋmaŋ’ tiŋgban’ ni, ka n ti chɛ ka bɛ zaŋ takɔbi ku o omaŋmaŋ’ tiŋgbɔŋ maa ni.
Asirianim’ lan kpɛhi ba dabiɛm pahi
(2 Nanima 19.8-19)
8Ka Rabishake maa daa wum ni Asiria naa yiɣisi Lakishi, ka o daa labi ti nya ka ŋun’ naa tuhirila Libinanima. 9Di saha ka naa daa wum ni Itiɔpia naa Tirihaka mini Ijipti tɔbbihi kanna ni bɛ ti tuh’ o. O ni daa wum lala maa, ka o tim tuumba Hɛzɛkia sani 10ni bɛ ti yɛli ŋun’ Juda naa Hɛzɛkia maa: “ Di chɛ ka a ni zaŋ amaŋ’ dalim a Naawuni so maa yɔhim a n-lo a alikauli yɛri ni Asiria naa ku ŋme n-deei Jɛrusalɛm. 11A pun wum Asiria naa ni niŋ tiŋgbɔn’ shɛŋa shɛm ni o ni saɣim li zaa shɛm yɛla. A tɛhiya ni nyin’ ni tiligi? 12N yaannim’ daa tuhi saɣim fɔntinsi din nyɛ Gɔzan mini Haran ni Rɛzɛf ka daa ku Bɛtidɛn niriba bɛn daa be Tɛlasa, ka bɛ zaa naawuna daa bi tooi tiligi ba.
13Hamat mini Aripad ni Sɛfarivaim ni Hɛna ni Iva nanim’ la lee kpalim ya?”
14Ka Hɛzɛkia daa deei gbaŋ maa tuumba maa sani karim; ka kpe Yawɛ jɛmbu duu nti teei li sɔŋ Yawɛ tooni, 15ka suhi Yawɛ yɛra, 16#Yibu 25.22 “Nyin’ Yawɛ ŋun nyɛ Tɔbbihi Naa ni Izraɛl Naawuni ŋun ʒi Chɛrubinim’ zuɣusaa ŋɔ, a kɔŋko n-nyɛ Naawuni ŋun su dunia ŋɔ nama zaa fukumsi. Nyini n-nam tiŋgbani mini zuɣusaa. 17Yawɛ, gbilisim’ a tibili wum, ka neeg’ a nina nya, ka wum Sɛnachɛrib ni tɔɣisi yɛtɔɣ’ shɛŋa zaa ti na tu nyin’ Naawuni ŋun be ŋɔ. 18Yawɛ, yɛlimaŋli, Asiria naa shiri bahi niriba pam mini bɛ tiŋgbɔna yoli, 19ka nyo bɛ naawuna buɣim, bɛn dee pala naawun’ maŋa, amaa bɛ nyɛla ninsalinim’ ni zaŋ bɛ nuhi kpe da’ shɛŋa ni kuɣ’ shɛŋa, dina n-chɛ ka o daa saɣim ba maa. 20Dinzuɣu pumpɔŋɔ, Yawɛ ŋun nyɛ ti Naawuni ŋɔ, tiligim’ ti Asiria naa maa nuu ni, ka dunia ŋɔ nama zaa niriba baŋ ni a kɔŋko n-shiri nyɛ Yawɛ.”
Aizaia ni yɛli naa shɛm
(2 Nanima 19.20-37)
21Di saha ka Amɔz bia Aizaia daa tim ti yɛli Hɛzɛkia, Yawɛ ŋun nyɛ Izraɛl Naawuni ŋɔ yɛliya: “A ni suhi ma yɛli shɛm zaŋ chaŋ Asiria Naa Sɛnachɛrib polo la, 22man’ Yawɛ ni yɛli shɛm zaŋ chaŋ o polo m-bɔŋɔ: Nyin’ Sɛnnachɛrib, Jɛrusalɛm lar’ a mi ka lihi ʒiɛm’ a. 23A lee tɛhiya ni ŋuni ka a turi ka maani ansarisi maa? Mani ŋun nyɛ Izraɛlnim’ Naawuni ŋun be kasi ŋɔ ka a niŋ karimbaani lihi ʒiɛm maa. 24A tim a tuumba na ka bɛ ti nyu bara niŋ ma yɛli ni a zaŋ a chɛchɛbunsi din galisi nyaŋ Lɛbanɔn zoya zuɣu nima; a nyu bara yɛri ni a ŋma sida ti’ wɔɣila mini sipirɛs ti’ viɛla luhi, hal ka kpe di nyɔŋ puuni gba. 25A nyu bara yɛli ni a gbi kɔbilisi tinzun’ tinsi ni n-nyu di kom, ka a tɔbbihi siɣi Nail Mɔɣili ni n-no n-gili ka di kom nyuui.
26“A bi wum ni m pun lo dimbɔŋɔnim’ zaa nia ka di waɣa? Ka pumpɔŋɔ n chɛ ka di niŋ pali. N daa ti a yiko ka a wurim bɛ ni me goma gili tin’ shɛŋa, ka di leei dabari. 27Ninvuɣ’ shɛb’ bɛn be nimaani ka yiko. Dabiɛm kpe ba, ka di niŋ ba alahiziba. Bɛ ŋmanila mɔri din be mɔɣu ni bee mɔ’ shɛŋa din bili mɔpilli zuɣu ka na bi zooi ka wuntaŋ’ ŋme n-ku li.
28“M mi a ni ʒiini shɛm ni a ni yiɣisiri shɛm, ka mi a ni yiri chani ka labirina shɛm. N lan mi a ni je suli niŋ ma shɛm. 29A ni je suli niŋ ma ka a karimbaani yɛla kana ti lu n tibili ni shɛm zuɣu, n ni zaŋ n ziŋgoo niŋ a nyee ni, ka zaŋ n galige le a ŋ-ŋmalig’ a ka a dol’ a ni daa doli so’ shɛli kana labi.”
30“Din yɛn niŋ maa shihirili m-bɔŋɔ: Yuuni ŋɔ mini yuuni din pahir’ ayi puuni, dimiya bindir’ shɛŋa din niŋ di toli be mɔɣu ni. Di nyaaŋa ka yi naanyi ko m-biri ka sa wain tihi yuuni din pah’ ata puuni n-kpuɣi di daatam di. 31Juda zuliya ni ninvuɣ’ shɛb’ bɛn kpalim ni ti ba n-zani kaman tia din ba jila viɛnyɛliŋga wali wala. 32Ninvuɣ’ shɛb’ ni ti kpalim Jɛrusalɛm mini Ziɔn Zoli zuɣu. Yawɛ ŋun nyɛ Tɔbbihi Naa ŋɔ loya ni o chɛ ka di niŋ lala.
33“Dinzuɣu Yawɛ ni yɛli shɛm zaŋ chaŋ Asiria naa polo m-bɔŋɔ: O ku kpe tiŋ’ ŋɔ ni na bee n-to piɛm di ni bee ka o tɔbbihi ti gbib’ nyɔtaɣirisi kpe di ni bee ka bɛ ti me bimbin’ dura gil’ li. 34O ni doli so’ shɛli kana, dina ka o lan yɛn doli labi; o ku kpe tiŋ’ ŋɔ puuni.” Man’ Yawɛ n-yɛli lala maa. 35“N ni guli tiŋ’ ŋɔ ka tiligi li mmaŋmaŋ’ zuɣu ni n dabili Dauda zuɣu.”
36Di saha ka Yawɛ malaika daa chaŋ Asirianim’ maa sansan’ ni nti ku ninvuɣ’ tuhi’ kɔbiga ni tuhi’ pihinii ni tusaanu, ka biɛɣu daa neei ka kpiimba kul yɛrigi luɣilikam. 37Di saha ka Asiria Naa Sɛnachɛrib daa yiɣisi kuli ti be Ninive. 38Ka o daa ti be o wuni Nisirok jɛmbu duu jɛmd’ o, ka o bidibisi Adirammɛlɛk mini Sharɛza daa zaŋ takɔbi ku o, ka zo n-kuli Ararat tiŋgbɔŋ ni. Ka o bia Ɛsarihadɔn daa di nam zan’ o zaani.
Currently Selected:
Aizaia 37: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
