Hozia 4
4
Naawuni galim Izraɛlnima
1Yinim’ Izraɛlnima, wummiya Yawɛ ni yɛli shɛm,
dama tiŋgbani ŋɔ nim’ mali galimi o sani.
Ʒiɛyimtali lan kani, ka nirilim lan kani,
ka so bi lan mi Naawuni tiŋgbɔŋ maa ni.
2Niriba kul pɔrila pɔri, ka ŋmari ʒiri, ka kuri niriba,
ka zura, ka niŋdi zina.
Bɛ baɣa lan ka shɛlikam ni,
kubu n-naɣ’ kul beni.
3Dinzuɣu ka tiŋgbani fabinda,
ka ŋunkam be di ni kɔba ni chɔɣisi.
Ka mɔɣu ni biŋkɔbiri
mini noonsi bɛn yiɣira
ni teeku ni zahim gba ku lan beni.
Naawuni galim maligumaaniba
4Amaa di ŋmɛriya tab’ naŋgbankpeeni,
so mi di galim’ o kpee.
Yinim’ maligumaaniba ŋɔ ka n galim.
5Yi ni ti tuuri wuntaŋ’ ni,
ka anabinim’ pahi yi zuɣu ka yi tuuri yuŋ.
N ni saɣim yi tiŋgbɔŋ ŋɔ.
6N niriba bahi yoli bɛ ʒilinsi zuɣu.
Yi ni zaɣisi baŋsim zuɣu n gba zaɣisi ya,
yi lan pala m maligumaaniba.
Ka yi ni tam n zaligu yɛla zuɣu,
n gba ni tam yi bihi yɛla.
7Bɛ ni kul galisi pam shɛm,
lala ka bɛ tumdi alahichi pam n sani.
N ni chɛ ka bɛ jilima nyabu leei vi.
8N niriba alahichi tumbu puuni ka bɛ nyari bindirigu,
ka bɔri ni bɛ kul tumdi alahichi.
9N ni ti kul yɛn niŋ niriba maa shɛm,
lala ka n yɛn niŋ maligumaaniba maa gba.
N ni ti darigi bɛ tibili
yo bɛ tuumbiɛri maa samli.
10Bɛ ni ti di, amaa ka ku tiɣi.
Bɛ ni ti niŋ zina,
amaa ka ku dɔɣi bihi,
dama bɛ zaɣisi man’ Yawɛ ka jɛmdila buɣa.
Naawuni galim buɣa jɛmbu
11Wain kurili mini wain palli
niriba yɛm.
12N niriba bɔhiri dari binyara ni bɛ baŋ shɛli,
ka bɛ jaaŋgbɛhi wuhiri ba binyara din ti yɛn niŋ.
Dama zina niŋbu n-vo ba kpɛhi yɔɣu,
ka bɛ chɛ Naawuni ka jɛmdila buɣa.
13Bɛ maani maligunim’ zoya zuɣu
mini oki tihi ni ti’ shɛŋa bɛ ni booni pɔpila ni tɛribint la gbini,
dama di mahim viɛla.
Dinzuɣu ka yi bipuɣinsi gɔri pagɔrisigu,
ka yi daamiliyanim’ niŋdi zina.
14Yi bipuɣinsi yi gɔri pagɔrisigu,
m bi yɛn darigi bɛ tibili
bee n-darigi yi bihi paɣiba tibili
bɛ yi niŋ zina.
Dama yi dɔbba maŋmaŋ’ gba chana
ka bɛ mini buɣa ni pagɔra ti doona
kaman buɣa maligu la.
Ka ninvuɣ’ shɛb’ bɛn ka yɛm bahi yoli.
15Hal yinim’ Izraɛlnim’ ni tum bi ʒe yim tuma maa zaa yoli,
di bi simdi ni di zuɣu chɛ ka Judanim’ gba kpe taali ni.
Di kpɛnya Giligal tiŋ’ puuni
bee n-kpɛnya Bɛtavɛn,#4.15 BƐTAVƐN: Di gbinni nyɛla, “Zaɣ’ biɛɣu yiŋa” bee “Buɣa jɛmbu duu”. Kpe ŋɔ di tɔɣisirila bɛ ni booni tin’ shɛli Bɛtɛl la yɛla. Bɛtɛl mi gbinni nyɛla, “Naawuni jɛmbu duu”.
ka miriya ka yi po n-yɛli
“Hal ka Yawɛ ŋun be ŋɔ zuɣu.”
16Izraɛlnim’ tipawumli ŋmanila naɣisaa tipawumli.
Yawɛ ni tooi lan dihi ba
kaman piɛbil’ ni be mɔri pam shee shɛm la?
17Ifriimnim’ gba kpɛla buɣ’ jɛmbo ni,
chɛliya ba.
18Bɛ nyuri dam kuuna n-chani tumdi yolimyolim.
Bɛ paɣila vidibo gari jilima nyabu.
19Pɔhim ni ʒe ba chaŋ,
ka bɛ maligu bimbina zuɣu ti chɛ ka vi gbahi.
Currently Selected:
Hozia 4: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
