Yibu 35
35
Jɛmbu dabisili dali zaligunima
1Musa daa laɣim Izraɛlnim’ zaa n-yɛli ba, “Yawɛ ni zali ya ni yi niŋ binshɛŋa m-bɔŋɔ: 2#Yibu 20.8-11; 23.12; 31.15; 34.21; Lɛv 23.3; Zal 5.12-14 Zaŋmiya daba ayɔbu tum tuma, amaa dabisi’ shɛli din pahir’ ayopɔin nyɛla Vuhim Dabisili yi sani, ka lan nyɛ Yawɛ dabisili din be kasi, ka ŋunkam ti tum tuma dindali, bɛn’ kum’ o. 3Di ti maliya buɣim yi biɛhigu shee zaa Vuhim Dabisili maa dali.”
Bɛ ni yɛn zaŋ pin’ shɛŋa mali Yawɛ biɛhigu shee suɣili
(Yibu 25.1-9; 39.32-43)
4Musa daa lan yɛli Izraɛlnim’ maa zaa, “Yawɛ ni zali ya shɛm m-bɔŋɔ: 5Zaŋmiya yi pina na ti ti Yawɛ. Ŋunkam mali yurilim o suhu ni, ŋun’ zaŋmi Yawɛ pina din nyɛ: salima mini anzinfa ni daanya 6ni ago sabilifaa ni ago ʒiɛkpeein ni ago ʒiɛkpain ni ago piɛl’ viɛlli ni buhi kɔbiri 7ni bɛ ni niŋ moonsi mɔhi piɛlahi gban’ shɛŋa ni teeku ni biŋkɔb’ bal’ shɛb’ gbana ni gɔpiɛliga dari 8ni firila kpam ni tulaale din ni mali kpa’ shɛli bɛ ni boori bahiri niriba zuɣu ni la ni tulaale zim din nyom viɛla 9ni oniɣisi kuɣa ni kuɣ’ shɛŋa bɛ ni yɛn zaŋ pie taba binyɛribil’ din yɛri pari zuɣusaa la mini nyolɔrigu la zuɣu.”
10“Chɛliya ka yi ni bɛn nyɛ tuumbaŋdiba kana ti mali Yawɛ ni zali ni bɛ mali neen’ shɛŋa zaa; 11o biɛhigu shee mini di suɣili ni din yɛn pil’ li ni di bansi ni di dapaɣa ni di dapuhi ni di daantalisi ni di ni yɛn tamdi binshɛŋa zuɣu 12ni Alikauli Adaka la mini di dapuhi ni di yɔrigu ni di pateesa la 13ni teebul’ la mini di dapuhi ni di lahi zaa ni bɔrɔbɔro din be kasi. 14Firilatamdigu mini di tuma nɛma ni firilanima ni firila kpam. 15Tulaale zim tuɣilibu bimbini mini di dapuhi ni kpa’ shɛli bɛ ni boori bahiri niriba zuɣuri ni ni tulaale zim din nyom viɛla ni pateesa shɛli din yɛn yiini Yawɛ biɛhigu shee suɣili dunol’ la. 16Bɛ ni nyɔri sara maligu buɣim bimbin’ shɛli zuɣu mini di daanya kurupooti la ni di dapuhi ni di lahi zaa ni di tahili mini di ni yɛn tamdi binshɛli zuɣu 17ni pateesa shɛŋa din yɛn yiini ni mini di daantalisi ni di ni yɛn tamdi binshɛŋa zuɣu ni pateesa shɛli din yɛn yiini dundɔŋ maa dunoli 18ni Yawɛ biɛhigu shee suɣili kpahi mini dundɔŋ maa kpahi ni di mihi 19ni binyɛr’ viɛl’ shɛŋa bɛ ni yɛn yɛri tumdi tuma luɣ’ kasi shee mini Aduna ŋun nyɛ maligumaana binyɛra din be kasi ni o bidibisi ni yɛn yɛri binyɛr’ shɛŋa tumdi maligumaaniba tuma.”
Niriba zaŋ bɛ pina ka Yawɛ biɛhigu shee suɣili ni na
20Ka Izraɛlnim’ maa zaa daa yi Musa sani kuli. 21Ka sokam daa chaŋ ti zaŋ o suhu ni kul yu ni o zaŋ shɛli na ti ti Yawɛ, ka bɛ zaŋ tum Yawɛ chirigibu shee suɣili maa tuma mini neen’ shɛŋa zaa bɛ ni yɛn zaŋ tumdi tuma di puuni ni bɛ ni yɛn zaŋ binshɛŋa she binyɛr’ kasi la. 22Ka dɔbba mini paɣiba bɛn zaa suhuri daa yu lala zaŋ nachiinsi nɛma din nyɛ tibikpara mini nintuhi ni bansi ni salima nɛma zaa na. Sokam daa zaŋla salima na nti mali sara ti Yawɛ. 23Ka ŋunkam daa mali gali sabilifaa bee gali ʒiɛkpeein bee gali ʒiɛkpain bee tan’ piɛl’ viɛlli bee buhi kɔbiri bee bɛ ni niŋ moonsi mɔhi piɛ’ gban’ shɛŋa bee teeku ni biŋkɔb’ bal’ shɛb’ gbana daa zaŋ li na. 24Ka ŋunkam daa malila anzinfa bee daanya daa zaŋ li na ti ti Yawɛ. Ka doo kam ŋun daa mali gɔpiɛliga dari din ni tooi tum tuma daa zaŋ li na. 25Ka paɣ’ shɛb’ bɛn zaa daa mi gumdi mibu daa mi gali sabilifaa mini gali ʒiɛkpeein ni gali ʒiɛkpain ni gali piɛl’ viɛlli. 26Ka paɣ’ shɛb’ bɛn zaa suhuri daa yu daa zaŋ bɛ baŋsim n-zaŋ buhi kɔbiri mi gali. 27Ka zuɣulaannim’ mi daa bo oniɣisi kuɣa mini kuɣ’ shɛŋa bɛ ni yɛn zaŋ pie tab’ binyɛribil’ din yɛri pari zuɣusaa la nyolɔrigu la zuɣu na 28ni firila kpam ni tulaale shɛŋa mini kpa’ shɛli bɛ ni yɛn zaŋ mali kpa’ shɛli bɛ ni mali boori bahiri niriba zuɣuri ni ni tulaale shɛŋa bɛ ni yɛn zaŋ mali tulaale zim shɛli din nyom viɛla. 29Ka Izraɛlnim’ maa dɔbba mini paɣiba zaa bɛn suhuri daa yɛli ba ni bɛ zaŋmi binshɛli kana ka bɛ ti zaŋ li tum Yawɛ ni daa zali Musa ni o tum tuun’ shɛli maa zaa din nyɛ bɛ suhuyubu pina, bɛ daa zaŋdi li mi na ti tiri Yawɛ.
Tumtumdiba bɛn yɛn mali Yawɛ biɛhigu shee suɣili
(Yibu 31.1-11)
30Ka Musa daa yɛli Izraɛlnim’ maa, “Nyamiya, Yawɛ bolila Uri bia Bɛzalɛl ŋun nyɛ Hur yaaŋa ka nyɛ Juda zuliya ni nir’ la 31n-zaŋ Naawunitali shia niŋ o ni, ka ti o yiko mini fahim ni baŋsim ni nuhi tuumbaŋsim tuma zaa 32ka o mi o ni yɛn niŋ shɛm zaŋ salima mini anzinfa ni daanya mali binyɛra. 33O mi o ni yɛn ŋmahi kuɣ’ viɛla shɛm kpɛhi binyɛra ni ka ni tooi zaŋ dari kpe m-mali nuhi tuumbaŋsim tuuni kam. 34O niŋ o mini Ahisamak bia Oholiab ŋun nyɛ Dan zuliya ni nir’ la yiko ni bɛ wuhi niriba. 35O niŋ ba yiko ni bɛ tum nuhi tuumbaŋsim tuuni kam bɛn yɛn nyɛ binyɛra balibu kam ŋmahibu baŋdiba ni bɛn ni tooi zaŋ gali sabilifaa mini gali ʒiɛkpeein ni gali ʒiɛkpain ni gali piɛli viɛlli wuɣi situra balibu kam. Bɛ nyɛla kpaluhi ka bɛ zaa nyɛ tuumbaŋsim balibu kam baŋdi’ kara.”
Currently Selected:
Yibu 35: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
