Yibu 30
30
Bɛ ni yɛn tuɣindi tulaale zim bimbin’ shɛli zuɣu
(Yibu 37.25-28)
1“Zaŋm’ gɔpiɛliga dari mali yi ni yɛn tuɣindi tulaale zim sara maligu bimbi’ shɛli zuɣu. 2Di simdi ni di ti nyɛla zaɣ’ mɔɣu, ka di wɔɣilim nyɛ sɛntimita pihinahinaanu, ka di yɛliŋ gba nyɛ sɛntimita pihinahinaanu, ka di dubu nyɛ sɛntimita pihiwɛi, ka di mini di binyila zaa ti nyɛ zaɣ’ mundili yini. 3Ka a ti niŋ salima alali pa di zuɣu, ka niŋ li pa di zuɣusaa mini di luɣa ni ni di binyila maa zaa zuɣu, ka mali salima kɔɣili li gili. 4Ka a ti zaŋ salima mali bans’ ayi n-zaŋ li goli sara maligu bimbini maa yaɣ’ yini naŋgbaŋkuɣila salima din kɔɣili li maa lɔŋni, ka lan mali bans’ ayi niŋ yaɣ’ din’ la gba, ka bɛ ti zaŋ dapuhi turi di ni kpuɣiri sara maligu bimbini maa. 5Di simdi ka a ti zaŋ gɔpiɛliga dari mali dapuhi maa, ka niŋ salima pa di zuɣu. 6Ka a ti zaŋ sara maligu bimbini maa zali pateesa shɛli din yili Alikauli Adaka tooni la mi tooni. Alikauli Adaka maa ni be luɣ’ shɛli maa n-nyɛ luɣ’ shɛli n ni yɛn kahigi mmaŋ’ wuh’ a. 7Ka Aduna yi ti kana ni o ti malimali firilanim’ maa asiba kam, ŋun’ tuɣilim’ tulaale zim din nyom viɛl’ sara maligu bimbini maa zuɣu. 8Ka o yi ti lan kana zaawuni ni o ti nyo firilanim’ maa, di simdi ka o lan tuɣili tulaale zim maa, ka di nyɛ tulaale zim shɛli bɛ ni yɛn tuɣindi sahakam Yawɛ tooni yi ʒiɛmani kam ni. 9Miriya ka yi ti tuɣili tulaale zim din bi be kasi sara maligu bimbini maa zuɣu. Yi mi di zaŋya biŋkɔbigu nyo buɣim bee n-zaŋ bindir’ kuma mali sara di zuɣu bee m-booi wain bahi di zuɣu. 10Di simdi ka Aduna zaŋ alahichi sanyoo sara maligu biŋkɔbigu ʒim niŋ di binyila maa zuɣu yim yuuni puuni yi ʒiɛmani kam ni. Di simdi ka o niŋdi lala yuuni kam din ni chɛ ka di yi daɣiri ni, dama di nyɛla din be kasi zaa man’ Yawɛ sani.”
Bɛ ni yɛn yɔri farigu Yawɛ biɛhigu shee suɣili zuɣu shɛm.
11Ka Yawɛ daa yɛli Musa, 12“A yi ti yɛn kali Izraɛlnim’ maa, nyin’ chɛ ka sokam yo shɛli ti man’ Yawɛ bɛ nyɛviya zuɣu, ka di chɛ ka alɔbo ku lu bɛ zuɣu saha shɛli a yi ti kaani ba. 13#Yibu 38.25-26; Mat 17.24 Ka a yi kali ninvuɣ’ so, di simdi ka dilan’ yo anzinfa laɣifu pirigili kaman luɣ’ kasi shee sania zahimbu ni nyɛ shɛm, ka o zaŋ li mali sara ti Yawɛ. (Anzinfa laɣifu maa nyɛla bɛ ni booni shɛli gɛra la bini pisi). 14Yi yi kali ninvuɣ’ so ka o yuma paai yuun’ pisi zaŋ chana, di simdi ka o yo man’ Yawɛ ni zali farigu shɛli maa. 15Bundaannim’ di yo n-gari lala, faranim’ mi di yo ka di pooi laɣifu pirigili maa saha shɛli yi yi ti yɛn yo li yi nyɛviya zuɣu kaman sara maligu la Yawɛ sani. 16Ka a ti deei nyɛviya tiliginsim liɣiri maa Izraɛlnim’ sani n-chɛ ka bɛ zaŋ li tum tuma Yawɛ chirigibu shee suɣili ni, ka di leei yi nyɛviya tiligibu sara maligu, ka lala chɛ ka Izraɛlnim’ kul teeri di yɛla Yawɛ sani.”
Daanya tahili
17Ka Yawɛ daa lan yɛli Musa, 18#Yibu 38.8 “Di simdi ka a zaŋ daanya mali paɣibu tahili, ka mali di ni yɛn tamdi binshɛli zuɣu n-zaŋ li zali Yawɛ chirigibu shee suɣili maa mini sara maligu bimbini maa sunsuuni n-niŋ kom niŋ di ni. 19Ka Aduna min’ o bidibisi maa ti mal’ li paɣiri bɛ nuhi mini bɛ naba. 20Bɛ yi ti yɛn kpe Yawɛ chirigibu shee suɣili maa puuni bee bɛ yi ti yɛn chaŋ miri sara maligu bimbini maa ti tum tuma bee m-mali bɛ ni zaŋdi sara shɛli nyɔri buɣim la ti Yawɛ, di simdi ka bɛ niŋ kom paɣi bɛmaŋa din ni chɛ ka bɛ ku kpi. 21Di simdi ka bɛ paɣiri bɛ nuhi mini bɛ naba din ni chɛ ka bɛ ku kpi. Di simdi ka di nyɛ zaligu sahakam bɛ mini bɛ zuliya sani bɛ ʒiɛmani kam ni.”
Bɛ ni yɛn boori kpa’ shɛli bahiri niriba zuɣuri ni
22Yawɛ daa yɛli Musa, 23“Bom’ tulaale viɛla, mɛɛr kom din tibisim nyɛ kilɔgiram ayɔbu mini tulaale shɛli din nyom viɛla ka bɛ booni li sinnamɔn la kilɔgiram ata ni kaɣa tulaale shɛli din nyom viɛla kilɔgiram ata 24ni tulaale shɛli bɛ ni booni kasia la kilɔgiram ayɔbu, ka yi ti zaŋ luɣ’ kasi shee sania la zahim di zaa. Ka a bo olivi kpam lita anahi pahi di zuɣu. 25Ka yi ti zaŋ li gari taba kaman tulaale duɣira ni niŋdi shɛm la, ka di leei din be kasi, ka nyɛ kpa’ shɛli bɛ ni yɛn mali boori bahiri niriba zuɣuri ni. 26Ka yi ti boori li mihiri Yawɛ chirigibu shee suɣili la puuni mini Alikauli Adaka la zuɣu 27ni teebul’ la mini di zuɣu lahi la zaa ni firilatamdigu la mini di zuɣu tuma nɛma zaa ni tulaale zim tuɣilibu bimbini la 28ni bɛ ni nyɔri sara buɣim bimbin’ shɛli zuɣu la mini di nɛma zaa ni tahili la mini di ni yɛn tamdi binshɛli zuɣu la. 29Di simdi ka a ti mal’ li ka di be kasi zaa, ka binshɛlikam din ti shihi li ni niŋ kasi. 30Ka a ti booi li bahi Aduna min’ o bidibisi zuɣu ni m-mali ba ka bɛ be kasi, ka leei maligumaaniba n-tumdi n tuma. 31Ka a yɛli Izraɛlnima, ‘N kpa’ kasi shɛli n ni yɛn boori bahiri niriba zuɣuri ni yi ʒiɛmani kam ni m-bala.’ 32Di bi simdi ka a ti zaŋ li leei niŋgbina kpaʒiɛrim, di mi bi simdi ka a lan niŋ di tatabo yaha. Di nyɛla din be kasi, ka kul ni be kasi a sani. 33Ka ŋunkam ti mali di tatabo bee m-booi li bahi ninvuɣ’ yiriŋ zuɣu ni, bɛn’ yihimi dilan’ o niriba laɣiŋgu ni.’ ”
Tulaale zim
34Ka Yawɛ daa yɛli Musa, “Bom’ tulaale shɛŋa din nyom viɛla, ka nyɛ bɛ ni booni shɛŋa stakiti mini onika ni galibanom ni tulaale zim shɛli bɛ ni booni firanki tulaale la alali din nyom viɛla (dɛde ni dɛde) 35n-zaŋ li gari taba m-mali tulaale zim kaman tulaale duɣira ni niŋdi shɛm la, ka niŋ yalim niŋ di ni din ni chɛ ka di be kasi ka ku mali daɣiri. 36Ka a ti baɣisi di shɛli ka di niŋ zim balli, ka a zaŋ di shɛli ti zali Alikauli Adaka shɛli din be Yawɛ chirigibu shee suɣili puuni luɣ’ shɛli n ni yɛn kahigiri mmaŋ’ wuhir’ a la gbini. Di simdi ka di ti nyɛla din be kasi zaa a sani. 37Ka a ni yɛn mali tulaale zim maa shɛm maa, miri ka a ti mali di tatabo n-leeg’ amaŋmaŋ’ dini. Zaŋm’ li leei din be kasi, ka nyɛ Yawɛ dini. 38#Yibu 37.29 Ka ŋunkam ti mali di tatabo ni o zaŋ niŋ o tulaale, bɛn’ yihimi dilan’ o niriba laɣiŋgu ni.”
Currently Selected:
Yibu 30: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
