Ɛsta 6
6
1Dindali maa yuŋ naa nini daa galimi, ka o yɛli ni bɛ zaŋm’ niriba tuma yɛla teebu ni be yɛlikura litaafi shɛl’ ni la na, ka bɛ daa zaŋ li na. 2#Ɛsta 2.21-22 Ka bɛ daa karim li hal ti paai luɣ’ shɛli din wuhi Bigitana mini Tɛrɛsh bɛn daa nyɛ nayili namɔɣilis’ ayi bɛn guli naa zɔntua dunol’ la ni daa lo nia ni bɛ sɔɣ’ ku Naa Ahasivɛrɔs, ka Mɔdɛkai daa wum li ka zaŋ yɛli naa la. 3Ka naa daa bɔhi, “Ka bɔ ka ti lee niŋ ti Mɔdɛkai din ni ti o jilima?”
Ka o naazɔnim’ bɛn be o sani yɛl’ o, “Ti bi niŋ shɛl’ ti o.”
4Ka naa lan bɔhi ba, “Ka ŋuni n-lee be zɔŋ ni?”
Di saha maa ka Haman mi daa kpɛna ti ʒe zɔŋ ni. O daa kamina ni o ti yɛli naa ka o bah’ o noli ka o chɛ ka bɛ zaŋ Mɔdɛkai ti yili gar’ da’ shɛli o ni daa pun chɛ ka bɛ sa n-zal’ la. 5Ka naazɔnim’ maa daa yɛl’ o, “Haman be kpe; o ʒe zɔŋ ni.”
Ka naa yɛli ba, “Yɛlimiy’ o ni o kpɛmina.”
6Ka Haman daa kpɛna, ka naa ti bɔh’ o, “Ninvuɣ’ so m-beni ka m bɔri ni n duh’ o, a lee tɛhiya ni bɔ ka n ni niŋ ti dilana?”
Ka Haman daa yɛl’ o suhu ni, “Ŋuni ka naa lee lan yɛn bɔri ni o duhi pam ka pa ni mani?”
7-8Ka Haman daa yɛli naa, “Chɛ ka bɛ zaŋ amaŋmaŋ’ nam kpar’ shɛŋa a ni pun ye min’ amaŋmaŋ’ wɔribaro ni nam zuɣupiligu din ni zaŋ pili dilan’ na; 9ka a zaŋ kpariti maa mini wɔhu maa ti a kpambaliba ni yino n-chɛ ka o zaŋ li ti bɔbi nyin’ naa ni bɔri ni a ti ninvuɣ’ so jilima maa. Ka a chɛ ka dilan’ ba wɔhu maa, ka bɛ zaŋ o doli tiŋ’ puuni solɔri. Ka a kpambal’ maa be o tooni kuhiri yɛra: ‘Nyamiya naa ni niŋ o ni yu ni o duhi ninvuɣ’ so shɛm!’ ”
10Di saha ka naa daa yɛli Haman, “To, zaŋm’ kpariti maa mini wɔhu maa yomyom chaŋ ti niŋ Mɔdɛkai ŋun nyɛ Yɛhudia nira ka ʒi nayili dunol’ ni la lala. Niŋm’ o a ni kul wuhi shɛm maa zaa, ka di chɛ ka shɛli pooi.”
11Ka Haman daa zaŋ kpariti maa mini wɔhu maa chaŋ ti zaŋ kpariti maa yɛli Mɔdɛkai ka chɛ ka o ba wɔhu maa, ka ŋun’ Haman gari tooni zaŋ o doli tiŋ’ puuni solɔri, ka kuhiri yɛra, “Nyamiya naa ni niŋ o ni yu ni o duhi ninvuɣ’ so shɛm!”
12Dimbɔŋɔ nyaaŋa ka Mɔdɛkai daa lan lab’ ti ʒi nayili samban’ dunol’ maa ni yaha; ka Haman mi daa zaŋ bini pil’ o zuɣu tabil’ o nina ŋ-ŋmaligi kuli yomyom ni suhugarigu 13nti yɛl’ o paɣ’ Zɛrɛshi min’ o zɔnim’ la zaa dinkam niŋ o. Di saha ka o yɛndaannim’ la min’ o paɣ’ Zɛrɛshi yɛl’ o, “A mini Mɔdɛkai so ŋun kpa tab’ ŋɔ ni nyɛ Yɛhudia nir’ la zuɣu, o pilig’ a la luhibu maa. A kul ku tooi nyaŋ o, amaa ŋuna n-naɣ’ ni nyaŋ a.”
Haman kubu
14Bɛ ni daa na kul yɛr’ o lala saha shɛli maa, ka nayili namɔɣilisi paana nti zaŋ Haman yomyom chaŋ Ɛsta ni daa pun duɣi bindir’ shɛŋa la dibu.
Red Letter Dagbani Bible © Bible Society of Ghana, 2011