Ɛsta 1
1
Napaɣ’ Vashiti zaɣisi Naa Ahasivɛrɔs noli
1-2 #
Ɛzra 4.6
Naa Ahasivɛrɔs daa di nam ʒila Pɛriʒianim’ tinzuɣu din yuli daa booni Susa la. O daa di nam maa n-sula tiŋgbana kɔbiga ni pisinaayopɔin. Ŋuna n-daa su India tiŋgbɔŋ zaŋ hal ni Itiɔpia#1.1 ITIƆPIA: Hiburuli ni di nyɛla Kush. Itiɔpia mini Kush nyɛla yim. tiŋgbɔŋ ni.
3O nam dibu yuma ata saha ka o daa laɣim’ o kpambaliba min’ o tuma zuɣulaannim’ na ni bɛ ti puhi bindira dibu mini binnyura nyubu chuɣu. Pɛriʒia mini Miidia tɔbbihi zuɣulaannim’ gba daa beni nti pahi gomnanim’ mini tiŋgbana maa nabihi. 4Chira ayɔbu zaa ka o daa zaŋ wuh’ o niriba maa azichi din be o nam puuni mini di jilima ni di dariza ni nyɛ shɛm zaa.
5Dimbɔŋɔ nyaaŋa ka naa maa daa lan laɣim dɔbba zaa bɛn nyɛ bundaannim’ mini nandaamba m-be Susa din nyɛ bɛ tinzuɣu maa ni na. O daa laɣim ba mi na ni bɛ ti puhi bindira dibu mini binnyura nyubu chuɣu. Daba ayopɔin zaa ka o daa chɛ ka bɛ zaŋ puhi chuɣu maa. O mi daa chɛ ka bɛ laɣindi ʒiinila tihi pu’ shɛli din be nayili maa samban’ ni la ni. 6Bɛ daa zaŋla bɛ ni zaŋ gumdi noli wuɣi chinchin’ shɛli ka di nyɛ zaɣ’ sabilifaa ka piɛlipiɛli n-yiliyili nayili maa zɔŋ ni n-dihi li nachiinsi. Ago piɛlli ka bɛ daa tɔhitɔhi n-zaŋ li tuntu anzinfa bansi din daa goligoli chinchini maa naŋgbambili n-zaŋ li lɔnlo kuɣ’ viɛla daantalisi din be zɔŋ maa ni. Ka salima min’ anzinfa gariti daa be zɔŋ maa ni. Kuɣ’ viɛla zaɣ’ piɛla mini zaɣ’ ʒiɛhi ni waya din nyɛlisira ni kuɣ’ sabilifaa ka bɛ daa zaŋ mali zɔŋ maa tiŋgban’ ni. 7Salima pipihi din diba ayi kam daa bi ŋman’ taba ka bɛ daa mali nyuri binnyura. Ka naa maa daa chɛ ka bɛ zaŋ omaŋmaŋ’ ni nyuri wain shɛli pam ti niriba maa. 8Bɛ daa nyuri binnyura maa dolila zaligu ni wuhi shɛm. Bɛ daa bi muɣisi so ni o nyu li; dama naa maa daa pun yɛl’ o yiŋbihi ni bɛ tim’ sokam wain maa kaman bɛ ni bɔri li shɛm tariga.
9Di saha Napaɣ’ Vashiti gba daa laɣimla paɣiba na, ka bɛ ti be nayili maa puhiri bindira dibu mini binnyura nyubu chuɣu maa.
10Bindira dibu mini binnyura nyubu chuɣu puhibu maa dabisi’ shɛli din pahir’ ayopɔin dali, ka naa maa daa nyu wain hal ka o suhu ti paligi, ka o daa bol’ o namɔɣilis’ ayopɔin bɛn daa kul be o sanna la. Bɛ yuya m-bɔŋɔ: Mɛhuman mini Bizita ni Haribɔna ni Biɣita ni Abaɣita ni Zeetar ni Karikas. 11Bɛ ni daa kana, ka o yɛli ba ni bɛ cham’ ti chɛ ka Napaɣ’ Vashiti zaŋ o napaɣ’ nam zuɣupiligu pili, ka bɛ zaŋ o na. Napaɣ’ maa daa nyɛla paɣ’ viɛlli, ka naa maa daa bɔri ni o zaŋ o viɛlim maa wuh’ o tuma zuɣulaannim’ min’ o saamba maa zaa. 12Amaa ka namɔɣilisi maa daa chaŋ ti yɛli Napaɣ’ Vashiti naa ni yɛli shɛm maa, ka o daa zaɣisi ni o ku kana. Ka di zuɣu daa chɛ ka Naa maa suhu yiɣisi pam.
13Naa ni daa yi niŋdi shɛm nyɛla o bɔhi baŋdiba baŋ zaligu mini kaya ni nyɛ shɛm, dinzuɣu ka o daa tim ti bol’ o saawaranim’ bɛn ni tooi baŋ bɛ ni yɛn niŋ shɛm na. 14O ni daa yi niŋdi niriba ayopɔin shɛb’ saawara n-daa nyɛ: Karishɛna mini Shɛtar ni Adimata ni Tarishish ni Mɛrɛs ni Marisɛna ni Mɛmukan bɛn daa nyɛ Pɛriʒia mini Miidia tuma zuɣulaannim’ bɛn ʒe zaashe’ kara ni o nam sulinsi maa ni la. 15Naa maa daa yɛli ba, “Man’ Naa Ahasivɛrɔs n-tim nayili bihi Napaɣ’ Vashiti sani nti yɛl’ o yɛligu ka o zaɣisi n noli! Ka wula ka zaligu lee wuhi ni ti niŋm’ o?”
16Di saha ka Mɛmukan daa yɛli naa min’ o tuma zuɣulaannim’ maa, “Pa naa kɔŋko ka Napaɣ’ Vashiti lihi ʒiɛm maa, amaa o tuma zuɣulaannim’ gba hal zaŋ tabili doo kam ŋun be o nam sulinsi ŋɔ ni zaa! 17Paɣiba bɛn zaa be naa nam sulinsi ŋɔ ni yi wum Napaɣ’ Vashiti ni niŋ shɛm ŋɔ ni lihi ʒiɛm bɛ yidaannima. Bɛ ni yɛli, ‘Naa Ahasivɛrɔs daa tim ti boli Napaɣ’ Vashiti ni o kana ka o zaɣisi.’ 18Ka zuŋɔ dabisili ŋɔ, Pɛriʒia mini Miidia paɣiba yi wum Napaɣ’ Vashiti ni niŋ shɛm maa, bɛ ni zaŋ di yɛla yɛri naa kpambaliba. Ka paɣiba ni lihi ʒiɛm bɛ yidaannima, ka bɛ yidaannim’ maa suhuri ni yiɣisi pam bahi paɣiba maa zuɣu. 19Naa, dinzuɣu a yi saɣi nyin’ zalim’ zaligu ni nyin’ naa mini Vashiti ku lan kpe yaha; ka chɛ ka bɛ sab’ li pahi Pɛriʒianim’ mini Miidianim’ zaligunim’ ni, ka di leei din ku lan taɣi yaha. Ka a zaŋ o zaashee maa ti paɣ’ so ŋun so o. 20Ka a zaligu ŋɔ yi moli gili a sulinsi tiŋgbɔn titali ŋɔ zaa ni, di ni chɛ ka paɣ’ kam lu o yidan’ sizuura, o yidana yi nyɛla wɔɣirili bee tarima.”
21Ka naa min’ o tuma zuɣulaannim’ maa nini daa tiɣi o ni yɛli shɛm maa, ka naa maa daa shiri niŋ kaman Mɛmukan ni yɛli shɛm maa. 22Ka bɛ daa sab’ zaligu maa ni wuhi shɛm yaɣili kam zuliya yɛtɔɣa ni mini bɛ sabbu ni nyɛ shɛm puuni n-ti o tiŋgbɔŋ maa yaɣili kam nima n-yɛli ni yidan’ kam n-nyɛ o yiŋ’ zuɣulana. Ka o yɛligu simdi ni di zani.
Red Letter Dagbani Bible © Bible Society of Ghana, 2011