Waazuyihira 9
9
1N zaŋ dimbɔŋɔ zaa niŋ n suhu ni, ka zahim di zaa nya wuntizɔriba mini yɛnnim’ tuma ni be Naawuni nuu ni shɛm. Di yi nyɛ yurilim bee jɛlinsi, so ku tooi baŋ. Binshɛɣukam din paari ba nyɛla din ka buchi.
2Dama binshɛli din niŋdi ba nyɛla din niŋdi sokam. Binshɛli din niŋdi wuntizɔriba nyɛla din niŋdi ninvuɣ’ biɛri, ka binshɛli din niŋdi ninvuɣ’ suma nyɛla din niŋdi tuumbiɛrinima. Binshɛli din niŋdi ninvuɣ’ shɛb’ bɛn ka daɣiri nyɛla din niŋdi ninvuɣ’ shɛb’ bɛn mali daɣiri. Ka binshɛli din niŋdi ninvuɣ’ shɛb’ bɛn maani sara nyɛla din niŋdi ninvuɣ’ shɛb’ bɛn bi maani sara. Ninvuɣ’ suma ni be shɛm, lala n-nyɛ alahichinim’ gba. Ninvuɣ’ shɛb’ bɛn pɔri pɔri bi be bɛ ko ka chɛ ninvuɣ’ shɛb’ bɛn zɔri pɔri pɔbu. 3Yɛl’ yini n-kul paari sokam zaa. Dimbɔŋɔ nyɛla yɛl’ biɛɣu din niŋdi dunia ŋɔ ni. Din pahi nyɛla, zaɣ’ biɛɣu n-kul pali sokam zaa suhu ni. Yinyari biɛhigu n-kul be bɛ suhuri ni bɛ biɛhigu ni. Di nyaaŋa ka bɛ kpi.
4Amaa ninvuɣ’ so ŋun zaŋ omaŋ’ pahi ninvuɣ’ nɛma zaa ni mali tahima, dama ba’ nɛɔŋ so gbuɣin’ kpiŋ. 5Bɛn ne mi ni bɛ ni kpi, amaa bɛn kpi bɛn’ lan ʒi shɛli yaha. Bɛ lan ka jina ni, hal ka niriba bi teeri bɛ yɛla. 6Bɛ yurilim mini bɛ jɛlinsi ni bɛ nyuli zabbu zaa ku lan beni, ka bɛn’ nuu kul ku lan be yɛl’ shɛlikam zaa niŋbu ni dunia ŋɔ ni.
7Dim’ a bindira ni suhupiɛlli, ka nyum’ a wain ni suhupiɛlli, dama Naawuni pun saɣi ti a ni niŋdi shɛm maa ka di waɣa. 8Chɛ ka a binyɛra kul piɛli sahakam, ka niŋmi kpam ʒiɛm a zuɣu. 9Wummi nyaɣisim a ni yuri paɣ’ so sani a ni mali nyɛvili shɛli din ka buchi dunia puuni ŋɔ, dama dina n-nyɛ a biɛhigu min’ a dunia ŋɔ ni tuma wahala tarili. 10Dinzuɣu, a yi yɛn tum shɛlikam, nyin’ tummi li ni a kpiɔŋ zaa; dama kpiimba biɛhigu shee din nyɛ a ni kuni luɣ’ shɛli maa, tuun’ shɛli bee tɛhi’ shɛli bee baŋsim bee yɛm ka nimaani.
11Dunia ŋɔ ni, n lan nya ka tizɔbo pala ŋun tooi zɔri yomyom n-zɔri dira, ka di pala ŋun mali kpiɔŋ n-tuhiri diri nasara bee yɛndana m-mali bindirigu bee ŋun mali baŋsim m-mali azichi bee bɛn nyɛ tuumbaŋdiba ka bɛ zaŋdi zaani zaashe’ kara ni; amaa di soli ni di saha zuɣu n-chɛri ka di zaa niŋda. 12So ku tooi baŋ yɛl’ biɛɣu ni yɛn paag’ o saha shɛli. Ziŋgbahiri laŋ’ din mali putɔɣu ni gbahiri zahim shɛm ni zana ni gbahiri noombihi shɛm la, lala ka yɛl’ biɛɣu gba libigiri daadamnim’ gbahiri ba.
Yɛm mini jɛrilim yɛla
13Dunia ŋɔ ni, n lan nya shɛli zaŋ chaŋ yɛm polo, ka di nyɛ yɛlikpeeni n sani. 14Tiŋkpambila n-daa beni, ka di puuni niriba bi galisi. Ka na’ titali daa ti zaŋ o tɔbbihi na ti teei gili tiŋ’ maa, ka mɛri bindura gindi di gooni. 15Ka yɛndana ŋun nyɛ nandana daa be tiŋ’ maa ni; ka daa zaŋ o yɛm maa fa tiŋ’ maa nim’ bahi. Amaa ka so daa bi teei nandana maa yɛla. 16Dinzuɣu ka n daa yɛli, “Yɛm so kpiɔŋ. Amaa bɛ daa lihi ʒiɛm doo maa yɛm maa, ka bi deeg’ o yɛligu.” 17Yɛndan’ ni tɔɣisir’ yɛtɔɣ’ shɛŋa balimbalim wumbu so naa ŋun tɔɣisiri yɛtɔɣa n-tahiri jɛra sani. 18Yɛm so tɔbutuhiri’ bidibbina. Amaa alahichilan’ yino saɣindi bin’ viɛla pam.
Red Letter Dagbani Bible © Bible Society of Ghana, 2011