Waazuyihira 7
7
Biɛhigu yɛla tɛha
1 #
Ŋaha 22.1
Yu’ suŋ so tulaale viɛlli, ka kum dali so dɔɣibu dali.
2Nir’ yi chaŋ kumsi ni be yil’ shɛli, di so ni o chaŋ dimma ni nyubu ni be yil’ shɛli. Dinzuɣu di simdi ni bɛn be bɛ nyɛviya ni baŋ ni kum nyɛla din yɛn paai sokam zaa.
3Suhugarigu so lari, dama nandahima nyɛla din tahiri suhukpaŋsibo na.
4Yɛndana suhu bɔrila kumsi ni be yil’ shɛli, amaa jɛra suhuri bɔrila suhupiɛlli ni be yil’ shɛli.
5Nir’ yi wum yɛndana saɣisigu, di so ni o wum jɛrigu yila.
6Dama jɛra lari ŋmanila gɔhi ni be buɣim ni duɣu gbinni tahiri shɛm la; ka dimbɔŋɔ gba ka buchi.
7Yɛlimaŋli, nahiŋgu nyɛla din chɛri ka yɛndan’ niŋdi jɛrigu, ka birapu dibu mi saɣindi nira.
8Bini bahigu so di piligu; ka suɣilo so karimbaani.
9 #
Jeem 1.19
Di chɛ ka a suhu yiɣisiri yomyom, dama jɛra suhuri ni ka suhuyiɣisili be.
10Miri ka a bɔhi, “Bɔ n-lee chɛ ka yuun’ shɛŋa din gari la so pumpɔŋɔ ŋɔ?”
Dama lala bɔhigu pala yɛm bɔhigu.
11Yɛm viɛla, ka ŋmanila fali, ka niŋdi bɛn be dunia ŋɔ ni anfaani. 12Di nyɛla din ni tooi sɔŋ nira kaman liɣiri ni sɔŋdi nir’ shɛm. Baŋsim daanfaani nyɛla yɛm tiri ninvuɣ’ so ŋun mal’ li nyɛvili.
13Kpahimmi Naawuni tuma; o yi niŋ shɛli ka di gbiligi, ŋuni n-lee ni tooi mal’ li zali dɛde? 14Mali suhupiɛlli tɔŋbu saha, ka yɛla mi yi ti paag’ a, nyin’ teemi ni Naawuni n-tahiri suhupiɛlli mini yɛlimuɣisira maa zaa na. Dinzuɣu ninsalinim’ ku tooi baŋ binshɛli din yɛn niŋ bɛ kalinsi nyaaŋa.
15M biɛhigu din ka buchi ŋɔ puuni, n nya binshɛɣukam zaa. Wuntizɔriba kpiri bɛ wuntitali tuma puuni, ka ninvuɣ’ biɛri kul tumdi tuumbiɛri ka mali nyɛvili wɔɣila. 16Di wuhi ni a nyɛla wuntizɔra ti yaɣi, a mi di wuhi ni a nyɛla yɛndan’ ti yaɣi. Di niŋ lala ku amaŋa. 17Miri ka a niŋ ninvuɣ’ biɛɣu, a mi di nyɛ jɛrigu. Di niŋ lala n-kpi ka a saha na bi paai. 18Di simdi ni a vili zaɣ’ yini gbibi, amaa ka di chɛ din’ la gba bahi; dama ninvuɣ’ so ŋun zɔri Naawuni ni tooi gbibi di bina ayi maa zaa.
19Yɛm tiri yɛndan’ kpiɔŋ gari nanim’ pia bɛn be tiŋ’ puuni.
20Yɛlimaŋli, so ka dunia ŋɔ ni n-nyɛ wuntizɔra ŋun kul tumdi tuun’ suma, ka na ʒi n-tum alahichi.
21Di doli wumdi niriba ni yɛri shɛlikam, di yi pa lala, a ni ti wum ka a tumtumda tur’ a. 22Ka amaŋmaŋ’ mi a suhu ni ni a gba tur’ a tab’ pam.
23N yɛm puuni ka n zaŋ baŋ dimbɔŋɔnim’ zaa. N daa yɛliya, “N ni niŋ yɛndana, amaa ka m mini di shee ti wɔɣa. 24Yɛm shee wɔɣa, ka di biɛhigu shee zilim’ pam; ka di bo n-nya to pam. 25N daa zaŋ n zaɣa niŋ baŋsim bɔbu ni ni m bo n-nya yɛm mini binyara pam, ka m baŋ ni ninvuɣ’ biɛtali nyɛla jɛrilim, ka jɛrilim nyɛ yinyari. 26N nya binshɛli ka di to n-gari kum. Dina n-nyɛ paɣ’ so ŋun ŋmani zana. O ni wuhi ni o yur’ a shɛm ŋmanila zana mini tɔŋ, ka o nuhi nyɛ bandi. Ninvuɣ’ so ŋun bɔri ni o niŋ din tiɣi Naawuni nini ni yi o yɛla ni, amaa alahichilan’ ni lu o zana maa ni. 27Karimba maa yɛliya, ‘Nyama, n lan nya dimbɔŋɔ, n zaŋla binshɛŋa pahi di tab’ ni ni m baŋ di laasabu. 28N suhu kul bɔrila binshɛli nyabu, amaa ka na bi nya li. N nya do’ yino niriba tuhili puuni, amaa ka bi nya paɣ’ yino niriba tuhili maa puuni. 29Amaa bin’ yini ŋɔ ka n naɣ’ kpahim nya: Naawuni nam ninsalinim’ dɛde, amaa tinim’ lee bo yɛligabira pam ti timaŋa.’ ”
Red Letter Dagbani Bible © Bible Society of Ghana, 2011