Waazuyihira 5
5
Miri ka a bo yomyom lo alikauli
1A yi yɛn kpe Naawuni jɛmbu duu, nyin’ lum’ o sizuura. A yi vu m-miri ti wum, di so jɛra ni maani sara shɛli, dama bɛ bi mi bɛ ni yɛn niŋ shɛm chɛ zaɣ’ biɛɣu tumbu. 2Di bo yomyom yaag’ a noli bee n-jiɣ’ a suhu ni n-yɛli yɛtɔɣ’ shɛli Naawuni tooni, dama Naawuni bela alizanda ni, ka a mi be dunia ŋɔ ni; dinzuɣu chɛ ka a yɛtɔɣa pɔra. 3Suhubɔhibo yi mali nira, di chɛrimi ka o zahindi zahima. Ka jɛrigu mi mali yɛtɔɣ’ gbaliŋ.
4 #
Yila 66.13-14
A yi lo Naawuni alikauli, nyin’ palimi li yomyom, dama o je jɛra yɛlli. Niŋm’ a ni lo alikauli ni a niŋ shɛli. 5A yi lo alikauli ka bi pal’ li, dindina a yi bi lo li, di so. 6Di chɛ ka a nol’ ni yɛtɔɣa kpɛh’ a alahichi ni. A mi miri ka a ti yɛli adiini karimba ni pa lala ka a di yɛli. Di chɛ ka Naawuni suhu yiɣisi bah’ a zuɣu a yɛtɔɣa zuɣu, ka o chɛ ka a tuma bahi yoli. 7Zahima pam zahimbu mini yɛtɔɣ’ gbaliŋ ka buchi, amaa zomiyala Naawuni.
Biɛhigu ka buchi
8Nam fukumsi yi nahindi tarimba ka bi niŋdi din tuhi, ka mɔŋ ba bɛ yɛlimaŋli soya, nyin’ di chɛ ka di gar’ a; dama tuma zuɣulan’ kam gba malila zuɣulana, ka ŋun nyɛ bɛ zaa mi zuɣulan’ gba beni.
9Sokam dirila tiŋgbani daatam, hal naa gba dirila tiŋgbani daatam anfaani.
10Ŋun yuri liɣiri, ku nya liɣiri tiɣi; ka ŋun yuri buni mi ku nya buni tiɣi. Dimbɔŋɔ gba nyɛla din ka buchi. 11Nir’ nyamma yi pahi, bɛn diri li gba pahirimi. Ka di nyɔri nyɛ dini ŋun su li sani m-pahila o nini n-kul yɛn nya li? 12Tumtumdiba yi di n-tiɣi bee bɛ yi bi di n-tiɣi, bɛ yi dɔni, bɛ gbihirimi pali bɛ nina, amaa bundana ŋun’ buni zuɣu chɛmi ka o gaani gom.
13N lan nya binshɛli din nyɛ zaɣ’ biɛɣu pam dunia ŋɔ ni. Niriba bɔri nyari liɣiri m-mal’ li sɔŋda, ka di mali ba barina.
14Ka yɛl’ biɛ’ shɛli ti kana ti ŋme n-ku li, hal ka bɛ ti bi chɛ shɛli zali bɛ bihi gba. 15#Ayu 1.21; Yila 49.17; 1 Tim 6.7 Ninsalinim’ ni yi bɛ manim’ puya ni na ni nuzaŋa shɛm, lala ka bɛ ti lan yɛn yi dunia ŋɔ ni ni nuzaŋa. Bɛ ti ku ʒi bɛ tuma binshɛli bɛ nuu ni yi. 16Dimbɔŋɔ gba nyɛla din nyɛ zaɣ’ biɛɣu pam. Bɛ ni daa kana shɛm, lala ka bɛ ti lan yɛn yi n-chaŋ. Ka nyɔ’ bɔ ka bɛ lee di bɛ ni tum tuun’ shɛŋa ti pɔhim maa ni? 17Ka din pahi nyɛla bɛ biɛhigu puuni zaa, bɛ bela zibisim ni n-dira ni suhuyiɣisili mini sujee, ka dɔriti gbaari ba.
18N ni nya ka shɛli viɛli m-bɔŋɔ: Di simdi ni ninsalinim’ diri ka nyura, ka di bɛ tuma zaa nyaɣisim dunia ŋɔ ni dabisa biɛla shɛli Naawuni ni ti ti ŋɔ puuni, dama ti tarili m-bala. 19Dinzuɣu Naawuni yi ti shɛb’ azichi mini nɛma, ka chɛ ka bɛ deei bɛ tarili n-di bɛ tuma nyaɣisim, Naawuni pini m-bala. 20Naawuni ni chɛ ka bɛ mali suhupiɛlli maa zuɣu, bɛ suhuri ku zɔhiri bɛ nyɛviya zuɣu.
Red Letter Dagbani Bible © Bible Society of Ghana, 2011