Waazuyihira 3
3
Binshɛɣukam mali di saha
1Binshɛɣukam mali saha, ka yɛl’ shɛlikam din niŋdi dunia ŋɔ ni malila di niŋbu saha.
2Dɔɣibu saha beni,
ka kpibu saha beni.
Biribu saha beni,
ka bɛ ni biri binshɛli
sib’ bahi saha beni.
3Kubu saha beni,
ka tibbu saha beni.
Daai luhi saha beni,
ka me n-zali saha beni.
4Kumsi saha beni,
ka lari saha beni.
Fabila saha beni,
ka waa wabu saha beni.
5Kuɣa wurim bahi saha beni,
ka kuɣa laɣisi sɔŋ saha beni.
Tab’ nuhi tibu saha beni,
ka tab’ nuhi tibu ni kani
saha shɛli beni.
6Bɔbu saha beni,
ka kɔŋbu saha beni.
Gbibbu saha beni,
ka zaŋ bahi saha beni.
7Cheebu saha beni,
ka shɛbu saha beni.
Shinibu saha beni,
ka tɔɣisibu saha beni.
8Yurilim saha beni,
ka jɛlinsi saha beni.
Tɔbu tuhibu saha beni,
ka tɔbu tuhibu ni kani
saha shɛli beni.
9Bimbɔ ka tumtumdiba lee nyari bɛ tuma puuni? 10N nya Naawuni ni zaŋ tuun’ shɛli ti sokam ni o tum. 11O chɛ ka binshɛɣukam mali di saha; ka din pahi nyɛla, o chɛ ka ti mi din pun niŋ, din saha gari mini din na yɛn niŋ dahin’ shɛli ha yɛla. Amaa ka ti lee ku tooi baŋ ŋun’ Naawuni ni pun niŋ shɛm kurimbuni ha ni o ni yɛn niŋ shɛm di bahigu ni. 12M mi ni di ni simdi ni daadamnim’ niŋ shɛli nyɛla bɛ mali suhupiɛlli, ka di nyaɣisim hal ni bɛ nyɛviya tariga. 13Din pahi nyɛla sokam dim’ ka nyuma, ka diri bɛ tuma nyaɣisim. Di nyɛla Naawuni pini.
14M mi ni Naawuni ni tum shɛlikam kul ni beni sahakam. So ku tooi zaŋ shɛli pahi di ni bee n-yihi shɛli di ni. Naawuni n-tum lala ni di chɛ ka sokam zaa zo o. 15Binshɛɣukam din beni nyɛla din pun beni, ka din yɛn beni nyɛla din pun beni. Naawuni n-nyɛ ŋun mi din pun gari yɛla.
Niriba ni bi doli din tuhi dunia ni shɛm
16Din pahi nyɛla dunia ŋɔ ni, n nyaya ka zaligu dolibu ni be shɛli ninvuɣ’ biɛtali bela nimaani; ka lan nya ka wuntitali ni be shɛli ninvuɣ’ biɛtali lan bela nimaani gba. 17Ka n yɛli n suhu ni, Naawuni ni ti kari wuntizɔriba mini ninvuɣ’ biɛri saria, dama o zali yɛlli kam mini tuuni kam saha. 18Ka n yɛli n suhu ni zaŋ chaŋ ninsalinim’ polo, Naawuni buɣisiri ba mi ni o wuhi ni ninsalinim’ ŋmanila biŋkɔbiri. 19Dama din yɛn niŋ ninsalinima, dina n-yɛn niŋ biŋkɔbiri gba. Ninsalinim’ kpirimi ka biŋkɔbiri gba kpira. Vuhim yini ka bɛ zaa mali. Ka ninsal’ bi so biŋkɔbigu. Dimbɔŋɔ zaa nyɛla din ka buchi. 20Ninsalinim’ mini biŋkɔbiri zaa kunila luɣ’ yini, taŋkpaɣu ni ka bɛ yina, ka bɛ zaa lan yɛn labila taŋkpaɣu maa ni yaha. 21Ŋuni n-lee ni tooi baŋ ni ninsal’ shia durila zuɣusaa, ka biŋkɔbigu shia siɣiri tiŋgban’ ni? 22Dinzuɣu n nyaya ka binshɛli kani n-so m-pahila di simdi ni ninsalinim’ mini biŋkɔbiri zaa di bɛ tuma nyɔri, bɛ tarili m-bala. Dama ŋuni n-lee ni ti tooi zaŋ ba labisina ka bɛ ti nya din yɛn be bɛ kalinsi nyaaŋa?
Red Letter Dagbani Bible © Bible Society of Ghana, 2011