Daniɛl 7
7
DANIƐL WUHI O ƷIINIM’ NYABU
(7.1—12.13)
Daniɛl nya biŋkɔbir’ anahi zii puuni
1Babilɔn Naa Bɛlishaaza nam dibu yuun’ tuuli puuni ka man’ Daniɛl daa zahim zahindi n dooshee n-nya ʒii yuŋ, ka sabi zahindi maa ni nyɛ shɛm sɔŋ. 2N ni daa nya li yuŋ maa shɛm m-bɔŋɔ:
Pɔhim n-daa kul ʒiɛri kpari luɣ’ shɛlikam teeku kom zuɣu. 3#Kah 13.1; 17.8 Ka biŋkɔbir’ anahi daa yi teeku maa ni na, bɛ zaa mi daa bela kɔŋkɔba. 4Tuuli biŋkɔbigu daa ŋmanila gbuɣinli, ka mali kpiŋkpama ka di be kaman tɔrili kpiŋkpama la. Ka n daa kul lihir’ o hal ti nya ka bɛ sib’ o kpiŋkpama maa bahi. Ka bɛ daa yiɣisi biŋkɔbigu maa zali n-chɛ ka o zan’ o naba ayi zuɣu kaman ninsal’ la, ka bɛ ti o ninsal’ yɛm. 5Ka biŋkɔbigu ŋun pah’ ayi daa ŋmanila biŋkɔb’ so bɛ ni booni bear la, ka o yiɣisi n-gbiligi ʒiɛya; ka sapir’ kɔba ata gbab’ o noli. Ka kuko’ shɛli daa yɛl’ o, “Yiɣisim’ ŋubi nimdi pam!”
6 #
Kah 13.2
Ka n daa kul lihiri hal ka biŋkɔb’ so ti tɔhi zanina. O daa ŋmanila jɛŋgbini, amaa ka kpiŋkpama anahi din ŋmani nooŋa kpiŋkpama lee sa o yaaŋa zuɣu, ka o mali zuɣur’ anahi. Ka bɛ daa zaŋ yiko ti o.
7 #
Kah 12.3; 13.1 Ka n daa kul lihiri hal ka biŋkɔb’ so ŋun pah’ anahi gba ti tɔhi zanina. O daa mali kpiɔŋ pam, ka biɛ m-mali dabiɛm pam. O nyina daa nyɛla kuriti nyina zaɣ’ kara, ka o mal’ li dimdi chɛrisir’ o ni gbahiri binshɛɣukam, ka nɔri din kpalim firiti tiŋa. O daa be o ko ka chɛ o tab’ bɛn daa daŋ o tooni la na. O daa malila yila pia. 8#Kah 13.5-6 N ni daa kul lihiri yila maa, ka n ti nya yilibila ka di daai yil’ ata shɛŋa din daa pun saya la n-vuɣ’ li bahi, ka puhi yina. Yilibil’ maa daa malila nina ka di be kaman ninsal’ nina la, ka mali noli ka di tɔɣisiri karimbaan’ yɛtɔɣa.
Daniɛl nya ŋun ni be hal ni saha din ka bahigu ʒii puuni
9 #
Kah 1.14; 20.4 Ka n daa kul lihiri hal ti nya ka nam ʒiishɛhi mali ʒeya. Ka ŋun nyɛ ŋun pun be tum kurimbuni ha la kana nti ʒini nam ʒiishɛhi maa ni zaɣ’ yini zuɣu. O binyɛrigu daa piɛlimi kaman gumbɔrigu, ka o zabiri mi be kaman piɛ’ piɛlli kɔb’ suma la. O nam ʒiishee maa daa mali n-tam la kalima zuɣu, ka buɣim kul nyaɣisiri di ni, 10#Kah 5.11; 20.12 ka buɣim kulibɔŋ zɔri yiri di ni na. Ka niriba tusatusa shɛm tumdi tuma tir’ o, ka niriba tuhipii ʒiibu tuhipia ʒe o tooni. Ka saria karibu daa piligi, ka litaafinim’ bɔɣi doya.
11Ka n daa kul lihira, ka na kul wumdi yilli zaɣ’ bil’ la yɛtɔɣ’ kara la. Ka n ni daa na kul lihiri maa, ka n ti nya ka bɛ ku biŋkɔb’ so ŋun pah’ anahi la n-zaŋ o ti bahi buɣim ni, ka di di n-saɣim’ o. 12Ka bɛ daa fa biŋkɔb’ shɛb’ bɛn kpalim la yiko, amaa ka lee chɛ ba ni bɛ be saha biɛla pahi.
13 #
Mat 24.30; 26.64; Maak 13.26; 14.62; Luk 21.27; Kah 1.7, 13; 14.14 N ni daa nya ʒii shɛli yuŋ la ni, n daa nya so ka o ŋmanila ninsala n-yi zuɣusaa be sagbana ni sirigiri na n-daa ka ŋun pun be tum kurimbuni ha la sanna, ka bɛ daa zaŋ o wuh’ o. 14#Kah 11.15 Ka o daa ti o niriba subu yiko mini jilima ni kpiɔŋ ni di chɛ ka zuliya kam mini niriba balibu kam ni tinzun’ yɛtɔɣa balibu kam nim’ tumdi tuma tir’ o. O yiko kul ni be hal ni saha din ka bahigu, ka o nam mi ku mali tariga.
Bɛ wuhi Daniɛl ʒiinim’ gbinni
15N ni daa nya ʒii shɛŋa maa daa gbaai ma dabiɛm, ka di muɣisi ma pam. 16Ka n daa chaŋ bɛn ʒe nimaani maa yino sani nti yɛl’ o ni o wuhim’ ma yɛla maa zaa gbinni. Ka o daa wuhi ma di gbinni. 17O daa yɛliya, “Biŋkɔb’ kara anahi maa wuhirila nanima anahi bɛn ti yɛn yiɣisi zani dunia ŋɔ ni. 18#Kah 22.5 Amaa ka Zallakudura Naa ŋɔ wuntizɔriba ni ti deei nam maa n-su li sahakam hal ni saha din ka bahigu.”
19Di saha ka n daa lo ni m baŋ biŋkɔb’ so ŋun pah’ anahi la yɛla pahi. Ŋuna n-daa nyɛ ŋun bi ŋman’ o taba, ka o lihibu mali dabiɛm pam, ka o mal’ o daanya nyinyɛri min’ o kuriti nyina n-dimdi chɛrisir’ o ni gbahiri binshɛɣukam, ka nɔri din kpalim firiti tiŋ’ la. 20Ka n daa lan lo ni m baŋ yila pii din tam’ o zuɣu ni la mini yilibil’ din daa doli nyaaŋa na nti daai vuɣi yila ata la bahi la yɛla. Yilibil’ maa daa malila nina mini noli din tɔɣisiri karimbaan’ yɛtɔɣa, ka di lihibu daa mali dabiɛm gari di tab’ maa zaa.
21 #
Kah 13.7
Ka n daa kul lihiri nti nya ka yilli maa lo tɔbu n-tuhi wuntizɔriba nyaŋ ba. 22#Kah 20.4 Di saha ka ŋun nyɛ ŋun pun be tum kurimbuni ha la daa kana ti kari saria sɔŋ Zallakudura Naa ŋɔ wuntizɔriba, ka saha daa paai ni wuntizɔriba maa deei nam su.
23Bɛ ni daa wuhi ma di gbinni shɛm m-bɔŋɔ: “Biŋkɔb’ so ŋun pah’ anahi la wuhirila nam din pah’ anahi nti yɛn yiɣisi zani. Di ni ti be di ko ni nama zaa. Di ni ti dari chahi dunia ŋɔ zaa chɛrachɛra, ka no li sɔŋ tiŋa. 24#Kah 17.12 Yila pia la mi nyɛla nanim’ pia bɛn ti yɛn su fukumsi nam maa ʒiɛman’ ni. Di nyaaŋa na’ so ni ti yiɣisi n-nyɛ ŋun be o ko ni o tab’ bɛn daŋ o tooni na la, ka ni ti yihi nanim’ ata nam ni. 25#Kah 12.14; 13.5-6 O ni ti tɔɣisi yɛtɔɣ’ kara m-mo Zallakudura Naa ŋɔ, ka ni ti no n-taai wuntizɔriba. O ni ti kpaŋ omaŋa ni o taɣi bɛ daadiini zaligunim’ mini churi puhibu saha, ka ni ti su wuntizɔriba yuma ata ni pirigili. 26Di saha maa bɛ ni ti ʒini saria karibu ʒiya n-fa o yiko maa, ka bah’ o yoli kahikahi. 27#Kah 20.4; 22.5 Ka bɛ ni ti zaŋ yiko mini dunia ŋɔ nama zaa zoosim ti Zallakudura Naa ŋɔ wuntizɔriba, ka bɛ nam maa ku mali tariga, ka dunia ŋɔ nanim’ zaa ni ti kana ti tumdi tuma tiri ba, ka deei bɛ noli.”
28Yɛla maa ni nyɛ shɛm tariga m-bala. Dabiɛm daa kpe man’ Daniɛl pam, ka n ninni biɛhigu taɣi, amaa ka n daa lee zaŋ yɛla maa niŋ n suhu ni.
Currently Selected:
Daniɛl 7: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
