2 Samuɛl 9
9
Naa Dauda mini Mɛfibɔshɛt
1 #
1 Sam 20.15-17
Dahin shɛli ka Dauda daa ti bɔhi, “Sool daŋ ni ninvuɣ’ so na beni ka n ni niŋ o nirilim Jɔnatan zuɣu?”
2Ka ninvuɣ’ so ŋun daa nyɛ Sool tumtumda ka o yuli booni Ziba la daa be nimaani, ka bɛ daa bol’ o ti Naa Dauda ka o ti bɔh’ o, “Nyini n-nyɛ Ziba?”
Ka o garigi yɛli’, “Naa, mani.”
3 #
2 Sam 4.4
Ka naa daa bɔh’ o “So na be Sool daŋ ni ka n ni niŋ o nirilim kaman Naawuni ni bɔri shɛm?”
Ka Ziba daa yɛli naa, “Jɔnatan bidibiga na beni, o mi nyɛla gbarigu.”
4Ka naa bɔh’ o, “O be ya?”
Ka Ziba daa yɛli naa, “O be Ammiɛl bia Makiri la yiŋa Lɔdɛba.” 5Di saha ka Naa Dauda daa chɛ ka bɛ chaŋ Lɔdɛba Ammiɛl bia Makiri maa yiŋ’ ti zaŋ o na.
6Ka Sool yaaŋa Mɛfibɔshɛt ŋun daa nyɛ Jɔnatan bia maa daa ka Naa Dauda sanna nti lu n-gbani Dauda tooni lu o sizuura. Ka Dauda bol’ o, “Mɛfibɔshɛt.” Ka o garigi yɛli, “N-nyɛ mani ŋun nyɛ a dabili maa.”
7Ka Dauda daa yɛl’ o, “Di zɔri dabiɛm, dama n ni niŋ a nirilim a ba Jɔnatan zuɣu, ka zaŋ a yab’ Sool ni daa su tiŋgban’ shɛli zaa ti a, ka lan chɛ ka m min’ a laɣindi ʒiini diri sahakam.”
8Ka o daa lan lu Dauda sizuura ka yɛli, “Ka mani ŋun nyɛ a dabili ŋɔ mi lee nyɛ ŋuni, ka a ti lihi nya mani ŋun nyɛ ba’ kpiŋ ŋɔ lala”
9Di saha ka naa daa boli Ziba ŋun daa nyɛ Sool tumtumda la na ti yɛl’ o, “Sool min’ o daŋ zaa ni daa su shɛlikam zaa n ni zaŋ li ti a dan’ yaaŋa ŋɔ. 10Ka a min’ a bihi ni a tumtumdiba zaa yɛn kɔrila o yaaŋa ŋɔ puri din ni chɛ ka a dan’ yaaŋa maa nyari bindirigu dira. Amaa m min’ a dan’ yaaŋa Mɛfibɔshɛt n-yɛn laɣindi diri sahakam.” Ziba daa malila bidibisi pinaanu ni tumtumdiba pisi.
11Di saha ka Ziba daa yɛli naa, “N dana, mani ŋun nyɛ a dabili ŋɔ ni niŋ a ni yɛli ni n niŋ shɛlikam maa zaa.”
Ka Mɛfibɔshɛt mini Dauda daa kul laɣindi timdi diri kaman naa maŋmaŋ’ bidibisi ni yino n-nyɛ o la. 12Mɛfibɔshɛt dapala daa nyɛla bidibbil’ sariŋga ka o yuli booni Maika, ka ninvuɣ’ shɛb’ bɛn zaa daa be Ziba yiŋa daa leei Mɛfibɔshɛt tumtumdiba. 13Ka Mɛfibɔshɛt daa kul be Jɛrusalɛm, ka o mini naa daa kul laɣindi ʒiini diri sahakam. O daa nyɛla gbarigu.
Red Letter Dagbani Bible © Bible Society of Ghana, 2011