2 Samuɛl 16
16
Naa Dauda mini Ziba
1 #
2 Sam 9.9-10
Dauda ni daa yiɣisi zoli maa zuɣu n-tirisi tooni biɛla ha, ka Ziba ŋun daa nyɛ Mɛfibɔshɛt tumtumda la daa taɣi bɛ ni pa bun’ shɛb’ gaya kana ti tuhi ba soli. Bunsi maa daa ʒirila bɔrɔbɔro kpil’ kɔbiga mini wain tiwala din kuui zaza yila kɔbiga ni tiwal’ moma bini kɔbiga ni wain koligu pali. 2Ka naa daa bɔhi Ziba, “Bɔzuɣu ka a ʒi dimbɔŋɔnim’ zaa na?”
Ka Ziba garigi yɛl’ o, “Bunsi ŋɔ nyɛla naa min’ o malibu ni yɛn ba shɛba, ka bɔrɔbɔro ŋɔ mini tiwal’ moma ŋɔ nyɛ nachimba bindirigu. Ka wain ŋɔ mi nyɛ bɛ ni shɛb’ bɛn ti tarigi yɔɣu ŋɔ ni ni yɛn nyu shɛli.”
3 #
2 Sam 19.25-27
Ka naa daa bɔhi Ziba, “Ka a dan’ bia la lee be ya polo?”
Ka Ziba garigi yɛli naa, “Nyama, o kpalim Jɛrusalɛm, dama o yɛlimi, ‘Pumpɔŋɔ Izraɛlnim’ ni zaŋ n yab’ nam ŋɔ ti ma.’ ”
4Di saha ka naa daa yɛli Ziba, “Nyama, Mɛfibɔshɛt ni daa su shɛlikam zaa leeg’ a dini pumpɔŋɔ.”
Ka Ziba garigi yɛli, “N nyɛla ŋun luri n dan’ sizuura. Chɛ ka nyini n dan’ naa nini kul tiɣiri ma sahakam.”
Naa Dauda mini Shimɛi
5Naa Dauda ni daa ti paai Bahurim, ka Sool daŋ ni do’ so ŋun daa nyɛ Gɛra bia ka o yuli booni Shimɛi la daa yina ti turi ba. 6Hal Naa Dauda kpambaliba zaa mini ninvuɣ’ shɛb’ bɛn mali kpiɔŋ ni daa be o nudirigu min’ o nuzaa polo maa zaa yoli, doo maa daa pihila kuɣa labiri Dauda mini ba zaa. 7Ka Shimɛi daa kul turi ba ka yɛra, “Wara, wara, nyin’ ninvuɣ’ kur’ ŋɔ, nyin’ ninvuɣ’ yoli ŋɔ. 8A ni daa ku Sool so min’ o yiŋnim’ shɛba, ka di nam zan’ o zaani la biɛri ka Yawɛ bɔhir’ a, ka fa a nam maa ti a bia Absalom maa. Nyama a bahila yoli maa, dama a nyɛla ninvuɣ’ kura.”
9Di saha ka Abishai ŋun daa nyɛ Zɛruya bia la daa yɛli naa “Bɔ n-niŋ ka ba’ kpiŋ ŋɔ doli yɛri n dan’ naa zilima lala? Chɛ ka n chaŋ ti ŋma o zuɣu.”
10Amaa ka naa daa yɛli, “Yinim’ Zɛruya bihi ŋɔ, wula ka n yɛn niŋ ya? Di yi nyɛla Yawɛ n-yɛl’ o, ‘Tum’ Dauda,’ ŋuni n-lee ni tooi bɔh’ o, “Bɔ n-niŋ ka a niŋdi lala?” 11Ka Dauda daa yɛli Abishai min’ o kpamba maa, “Nyamiya, mmaŋmaŋ’ bia m-bɔri ni o ku ma la, di ni ti be ka Bɛnjamin zuliya ni nir’ ŋɔ? Chɛliy’ o ka o tu ma, dama Yawɛ n-zal’ o lala. 12Di pa shɛli o turi ŋɔ zuɣu ni chɛ ka Yawɛ lihi n wahala ŋɔ ka niŋ ma din viɛli zuŋɔ.” 13Di saha ka Dauda min’ o niriba maa daa lu solɔɣu chana, ka Shimɛi daa be zolɔŋni m-baɣisir’ o luɣili polo dol’ o chani tur’ o, ka labir’ o kuɣa, ka toori taŋkpaɣu chɛr’ o. 14Ka naa mini ninvuɣ’ shɛb’ bɛn zaa daa be o sani maa daa mali ti paai Jɔɔdɛn Mɔɣili ni ka di wum ba pam, ka o zani nimaani vuhi.
15Ka Absalom min’ o niriba zaa ni Izraɛlnim’ daa chaŋ ti kpe Jɛrusalɛm, ka Ahitɔfɛl gba daa be o sani. 16Ka Hushai ŋun daa nyɛ Ariki nir’ ka nyɛ Dauda zɔsimo la daa chaŋ Absalom sani ti yɛl’ o, “Naawuni dolimi naa nyɛvili! Naawuni dolimi naa nyɛvili!”
17Ka Absalom daa bɔhi Hushai, “A ʒiɛyimtali zaŋ chaŋ a zo maa sani ni bahindi shɛm m-bala? Bɔ n-niŋ ka a bi dol’ a zo maa chaŋ?”
18Ka Hushai daa garigi yɛli Absalom, “Aai Yawɛ min’ o niriba ŋɔ ni Izraɛlnim’ ni pii ninvuɣ’ so, o sani ka n yɛn be ka o su ma. 19M-pahi, ŋuni ka n lan yɛn jɛm ka pa ni n dan’ Dauda bia? N ni daa kul jɛmd’ a ba shɛm, lala ka n yɛn jɛm a gba.”
20Di saha ka Absalom daa bɔhi Ahitɔfɛl, “Wuhim’ ti ti ni yɛn niŋ shɛm.”
21Ka Ahitɔfɛl daa yɛl’ o, “Cham’ ti zaŋ a ba mamanim’ shɛb’ o ni chɛ n-niŋ nayili ni bɛ maani li la dɔni, ka di chɛ ka Izraɛlnim’ zaa baŋ ni a leeg’ a ba dataa, ka bɛnkam zaa be a polo ni kpaŋsi bɛmaŋa.” 22#2 Sam 12.11-12 Dinzuɣu ka bɛ daa du nayili dufahirili zuɣusaa nti ti suɣili zali Absalom, ka Absalom daa mal’ o ba mamanim’ maa dooni nimaani Izraɛlnim’ zaa ninni.
23Di ʒiɛman’ maa ni Ahitɔfɛl daa yi kul yɛli yɛtɔɣ’ shɛli, di ŋmanila Naawuni maŋmaŋ’ yɛligu n-nyɛ li. Ka Dauda min’ o bia Absalom zaa daa yi bi zaŋd’ o yɛligu niŋd’ asahi.
Red Letter Dagbani Bible © Bible Society of Ghana, 2011