2 Samuɛl 1
1
Bɛ kumsi Dauda Naa Sool kuli
1Dauda ni daa tuhi Amalɛknim’ maa ka labina Naa Sool kum maa nyaaŋa, o daa kpalimla Zikilag daba ayi. 2Nyama di daba ata dali ka do’ so daa ti yi Sool sansan’ ni n-zo m-paana ka o binyɛra chahi, ka taŋkpaɣu puɣ’ o zuɣu. O ni daa ti paai Dauda sani, o daa lumi gbani Dauda tooni lu o sizuura. 3Ka Dauda daa bɔh’ o, “Ya ka a yina?” Ka o garigi yɛl’ o, “Izraɛlnim’ sansan’ ni ka n yi n-zo na maa.” 4Ka Dauda yɛl’ o, “Yɛlim’ ma din niŋ.” Ka o yɛl’ o, “Tɔbbihi maa ŋmaligimi guui, ka bɛ pam lu tɔb’ maa ni, ka Sool min’ o bia Jɔnatan gba lu tɔb’ maa ni.” 5Di saha ka Dauda daa bɔhi nachimbil’ so ŋun yɛl’ o li maa, “Wula ka a lee niŋ baŋ ni Sool min’ o bia Jɔnatan lu tɔb’ maa ni?” 6Ka nachimbil’ so ŋun daa yɛl’ o li maa yɛli, “Di daa niŋla daliri ka n chaŋ Gilibɔa Zoli zuɣu nti chirigi Sool ka o zaŋ omaŋ’ dalim’ o kpani, ka chɛchɛbunsi mini wɔribariba daa kabiri kani o sanna. 7Ka o daa ŋmaligi lih’ o nyaaŋa nya ma ka boli ma, ka n garigi yɛl’ o, ‘N-nyɛ ma.’ 8Ka o bɔhi n ni nyɛ ninvuɣ’ so, ka n yɛl’ o, ‘N nyɛla Amalɛk nira.’ 9Ka o yɛli ma, ‘Kamina ti zani baɣili ma n-ku ma, dama n nya daŋ pam, ka m mi shia na bi siɣi.’ 10#1 Sam 31.1-6; 1 Yɛl 10.1-6 Di saha ka n daa chaŋ ti zani baɣil’ o n-ku o, ka pilig’ o zuɣupiligu din be o zuɣu ni, ka lan pirigi baŋ’ din be o nuu ni na, dama n daa baŋya ni o ni lu n-doya shɛm maa, o ku lan gali. Dinzuɣu ka n zaŋ o nɛma maa na ni n ti ti nyini n dana.”
11Di saha ka Dauda daa gbaag’ omaŋmaŋ’ binyɛra n-dar’ chahi li, ka bɛnkam daa be o sani gba daa niŋ lala. 12Ka bɛ daa kum ka fabili pam, ka lo noli Sool min’ o bia Jɔnatan ni Yawɛ niriba Izraɛlnim’ zuɣu dindali hal ni zaawuni, bɛ ni daa zaŋ takɔbiri ku ba maa zuɣu.
13Ka Dauda daa bɔhi nachimbil’ so ŋun daa yɛl’ o li maa, “Tiŋ’ kani ka a lee yina?”
Ka o garigi yɛl’ o, “N nyɛla Amalɛk saan’ so ŋun be a tiŋgbani ŋɔ ni bia.”
14Ka Dauda bɔh’ o, “Bɔ n-niŋ ka a daa yɛn ku Yawɛ ni pii ninvuɣ’ so maa ka dabiɛm bi mal’ a?” 15Di saha ka Dauda daa boli nachimba maa ni yino na nti yɛl’ o, “Cham’ ti ku o.” Ka o daa ŋme n-ku o. 16Ka Dauda yɛl’ o, “A ʒim yihibu taali ʒi a zuɣu, dama amaŋmaŋ’ noli n-di a shɛhira yɛli, ‘Mani n-ku Yawɛ ni pii ninvuɣ’ so maa.’ ”
Dauda fabili Naa Sool mini Jɔnatan zuɣu
17Ka Dauda daa fabili fabila ŋɔ Sool min’ o bia Jɔnatan zuɣu, 18#Jɔsh 10.13 ka yɛli ni di simdi ka bɛ wuhi Judanima ni di sabi Jashar litaafi puuni yɛli,
19Bɛ ku Izraɛl jilima zoya din du pam zuɣu,
ka wɔɣira lu.
20Di moliya di yɛla gili Gaat fɔŋ ni;
yi mi di moliya di yɛla
doli Ashikɛlɔn solɔri,
ka di zuɣu chɛ ka
Filistia bipuɣinsi yiɣi jam,
bee n-chɛ ka bɛn bi gundi ŋɔ bipuɣinsi suhuri paligi.
21“Yinim’ Gilibɔa zoya,
maligim bee saa ku lan lu
yi zuɣu na bee bimbilima
ti lan bili yi zolɔna ni.
Dama nimaani ka kpiɔŋlaannim’
bidibbina nya filiŋ.
Ka Sool nyɔtaɣirigu bi lan nya kpam ʒe.
22Jɔnatan tɔbu daa ʒi n-lab’ kuli
ka pa ni o ni ku ninvuɣ’ shɛb’ ʒim
mini kpiɔŋlaannim’ kpam n-varim li.
Ka Sool mi takɔbi na ʒi n-chɛ n-ziŋ.
23Sool mini Jɔnatan,
n yurinima bɛn veeni yurilim.
Bɛ daa bi woligi taba
bɛ nyɛviya ni mini bɛ kum ni.
Bɛ daa valim gari tɔrili.
Bɛ daa mali kpiɔŋ gari gbuɣima.
24Yinim’ Izraɛl bipuɣinsi,
kummiya Sool zuɣu.
Ŋuna n-zaŋ mulifu viɛlli soli ya.
Ŋuna n-zaŋ salima yɛri yɛli ya.
25Nyam’ kpiɔŋlaannim’ ni lu
tɔb’ sunsuuni shɛm!
Bɛ ku Jɔnatan sɔŋ zoya zuɣu!
26M mabia Jɔnatan,
n suhu saɣimya pam a zuɣu.
M min’ a biɛhigu daa lu n-taɣili tab’ pam.
A yurilim zaŋ chaŋ n sani
daa mali alahiziba,
ka galisi pam gari paɣ’ ni mali yurilim shɛm.
27Nyam’ kpiɔŋlaannim’ ni lu
tɔb’ sunsuuni shɛm,
ka bɛ bidibbina bahi yoli!
Red Letter Dagbani Bible © Bible Society of Ghana, 2011