1 Samuɛl 3
3
Naawuni yi Samuɛl zuɣu
1Saha shɛli Samuɛl ni daa be Ɛli sani n-tumdi Yawɛ tuma maa, Yawɛ daa bi lan tɔɣisiri yɛtɔɣa waawaayili, ka niriba daa bi lan nyari ʒiinim’ waawaayili. 2Di saha Ɛli nina daa bi lan ne viɛnyɛliŋga, ka o bi tooi nyara; dahin’ shɛli yuŋ ka o daa ti do o dooshee; 3ka Samuɛl mi daa do Yawɛ jɛmbu duu maa ni luɣ’ shɛli Naawuni Daalikauli Adaka ni daa be la, ka bɛ daa na bi kpihi Naawuni firila. 4Di saha ka Yawɛ daa boli, “Samuɛl! Samuɛl!” Ka Samuɛl saɣi, “N-nyɛ ma.” 5Ka yiɣisi guui chaŋ Ɛli sani ti yɛl’ o, “A ni boli ma la, n-nyɛ ma.”
Amaa ka Ɛli garigi yɛl’ o, “M bi bol’ a, labimi ti dɔni.” Ka o daa labi ti dɔni.
6Ka Yawɛ daa lan bol’ o yaha, “Samuɛl!” Ka Samuɛl daa lan yiɣisi chaŋ Ɛli sani ti yɛl’ o, “A ni boli ma la, n-nyɛ ma.”
Amaa ka o yɛl’ o, “M bia, m bi bol’ a, labimi ti dɔni.” 7Di saha Samuɛl daa na bi mi Yawɛ ka Yawɛ mi daa na ʒi n-kahig’ o yɛligu wuh’ o
8Ka Yawɛ daa lan boli Samuɛl yaha m-pahi buta, ka o lan yiɣisi chaŋ Ɛli sani ti yɛl’ o, “A ni boli ma la, n-nyɛ ma.”
Di saha ka Ɛli daa baŋ ni Yawɛ m-booni bia maa, 9Dinzuɣu ka Ɛli daa yɛli Samuɛl, “Cham’ ti dɔni, o yi ti lan bol’ a, nyin’ yɛlima, ‘Yawɛ, yɛlima, a dabili wumda.’ ” Di saha ka Samuɛl daa lan lab’ ti dɔni o dooshee maa.
10Ka Yawɛ daa lan kana ti zani nimaani m-boon’ o kaman o ni di pun boon’ o shɛm la, “Samuɛl! Samuɛl!” Ka Samuɛl daa garigi yɛli, “Yɛlima, a dabili wumda.”
11Di saha ka Yawɛ daa yɛli Samuɛl, “Nyama, n yɛn tumla tuun’ shɛli Izraɛl tiŋgbɔŋ ni, ka ŋunkam ti wum li tiba puuni ni chahira. 12Dindali maa n ni daa yɛli yɛtɔɣ’ shɛli zaŋ chaŋ Ɛli min’ o yiŋnim’ polo la ni ti niŋ pali, di piligu ni hal ni di bahigu ni. 13M pun yɛl’ o ni n ni darig’ o yiŋnim’ tibili hal ni saha din ka bahigu, tuumbiɛ’ shɛli yɛla o ni pun mila zuɣu, dama o bihi mɔri man’ Naawuni ka o bi yihi ba di ni. 14Dinzuɣu m po pɔri yɛli Ɛli min’ o yiŋnima ni sara maligu bee wumpaɣibo pini lan kani din ni tooi nyahi bɛ tuumbiɛri maa hal abada.”
15Ka Samuɛl daa doya hal ka biɛɣu ti neei, ka o yiɣisi yooi Yawɛ jɛmbu duu maa dunoya, ka zɔr’ dabiɛm ni o yɛli Ɛli o ni nya ʒii shɛli maa yɛla. 16Amaa ka Ɛli daa bol’ o, “M bia Samuɛl.” Ka Samuɛl saɣi, “N-nyɛ ma.”
17Ka Ɛli bɔh’ o, “Wula ka o sa lee yɛl’ a? Di sɔɣ’ ma shɛli, a yi sɔɣ’ ma yɛtɔɣ’ shɛli o ni yɛl’ a shɛlikam maa zaa puuni, Naawuni ŋun’ zaŋm’ o ni di yɛn niŋ ma shɛm maa niŋ a, hal ŋun’ niŋm’ a gari lala gba.” 18Ka Samuɛl daa yɛl’ o binshɛɣukam, ka bi sɔɣ’ o shɛli. Ka Ɛli garigi yɛli, “Ŋuna n-nyɛ Yawɛ, o niŋm’ o ni nya ka shɛli viɛl’ o sani.”
19Ka Samuɛl daa mali hal ti zooi, ka Yawɛ be o sani, ka chɛ ka o yɛtɔɣa zaa nyɛ yɛlimaŋli. 20Ka Izraɛl tiŋgbɔŋ maa ni luɣilikam, Dan zaŋ ti kpa Bɛrishiiba polo nim’ zaa daa baŋ ni Samuɛl nyɛla Yawɛ daanabi maŋli. 21Ka Yawɛ daa ti lan yi Samuɛl zuɣu Shilo, dama Yawɛ daa kahig’ omaŋa wuhi Samuɛl Shilo ŋun’ Yawɛ yɛligu ni. Ka Izraɛlnim’ zaa daa gbilisiri tibili wumdi Samuɛl yɛligu.
Red Letter Dagbani Bible © Bible Society of Ghana, 2011