Mose I 29
29
Yakob subɔ le Laban gbɔ.
1Tete Yakob dze mɔ, eye wòyi ɖe ɣetoɖoƒetɔwo ƒe anyigba dzi 2Eye wòkpɔ vudoa de le gbea dzi, eye alẽha etɔ̃ wotsyɔ akɔ anyi ɖe afima; elabena vudo sia me wokua tsi lena na alẽhawo wonona, eye kpe gãa ɖe le vudo la nu. 3Eye ne alẽhawo katã va ƒo ƒu ɖe afima la, ekema womlia kpe la le vudoa nu, eye wonaa tsi alẽawo; emegbe wogamlia kpe la tua vudoa nu ɖe eteƒe. 4Yakob bia wo bena: Nɔvinyewo, afika mietso? Woɖo ŋu bena. Míetso Xaran! 5Egblɔ na wo bena: Mienyã Naxor vi Laban mahã? Woɖo ŋu bena: Ẽ, mienyae! 6Egabia wo bena: Eli sesĩe mahã? Woɖo ŋu bena: Eli sesĩe! Kpɔ ɖa, via Raxel hã kplɔ alẽwo gbɔnae. 7Eye wògblɔ bena: Kpɔ ɖa, ɣe gale dzi, eye womaƒo alẽwo nu ƒu haɖe o. Mina tsi alẽawo woano, emegbe miana woagaɖu gbe. 8Wogblɔ bena: Míale ŋui o, vaseɖe esime woaƒo alẽhawo katã nu ƒu; ekema míamli kpe la ɖa le vudoa nu, hafi miana tsi alẽawo woano. 9Esi wògale nu ƒom kpli wo la, tete Raxel kplɔ fofoa ƒe alẽwo vɛ, elabena alẽkplɔla wònye. 10Ke esi Yakob kpo Raxel, edada nɔvi Laban ƒe vinyɔnu kple edada nɔvi Laban ƒe alẽwo la, Yakob te va, eye wómli kpe la ɖa le vudoa nu, eye wòna tsi edada nɔvi Laban ƒe alẽwo wono. 11Emegbe la Yakob ɖuɖɔ nu na Raxel, eye wòɖe asi avifafa me. 12Eye Yakob gblɔ na Raxel bena, fofoa nɔvi yenye, eye Rebeka vi yenye; tete wòƒu ɖu yi ɖagblɔe na fofoa. 13Esi Laban se nya siawo le nɔvianyɔnu ƒe vi Yakob ŋuti la, eƒu ɖu yi ɖakpee, eye wòkpla asi kɔ nɛ heɖuɖɔ nu nɛ, eye wòkplɔe va eƒe me. Eye wòxlẽ nya, siwo katã va dzɔ la, na Laban. 14Tete Laban gblɔ nɛ bena: Nyateƒee, nɔvinye kpamkpam nènye! Ke esi wònɔ egbɔ ɣleti ɖeka la, 15Laban gblɔ na Yakob bena: Nɔvinye nènye! Ɖe nawɔ ɖɔ nam dzodzroa? Gblɔe nam, nuka lanye wò fetu? 16Nyɔnuvi eve le Laban si, xoxoetɔ ŋkɔ nye Lea, eye ɖevitɔ ŋkɔ nye Raxel. 17Lea ƒe ŋkuwo dzi wɔ dɔ; ke Raxel ya nyo, eye wòdze tugbe. 18Eye Yakob lɔ̃a Raxel, eyata wògblɔ bena: Masubɔ wò ƒe adre le Raxel, wò nyɔnuvi ɖevitɔ la ta. 19Laban gblɔ bena: Enyo be, màtsɔe na wò, wu esi màtsɔe na ŋutsu bubu; nɔ gbɔnye! 20Ale Yakob subɔ ƒe adre ɖe Raxel ta, eye wòle nɛ abe ŋkekea ɖewo ko ene, le alesi gbegbe wòlɔ̃ne la ta.
Yakob ɖe srɔ̃.
21Emegbe la Yakob gblɔ na Laban bena: Tsɔ srɔ̃nye nam azɔ, elabena nye ŋkekewo ɖe, bena maɖee! 22Tete Laban kpe dua me ŋutsuwo katã, eye wòɖo kplɔ̃ na wo. 23Ke esi zã ɖo la, ekplɔ vianyɔnu Lea yi nɛ, eye wòdɔ kplii. 24Eye Laban tsɔ eƒe kosi Silpa na via Lea, bena woasubɔe. 25Ke esi ŋu ke la, ekpɔ be, Lea ye. Eye wògblɔ na Laban bena: Nuka enye si nèwɔ ɖe ŋunye? Alo menye Raxel ta mesubɔ wò ɖo oa? Nukaŋuti nèblema? 26Laban ɖo ŋu ne bena: Menye míaƒe kɔ be, woatre ɖevitɔ ɖeɖe na xoxoetɔ o. 27Ne ewu kwasiɖa sia nu la, ekema matsɔ eya hã na wò ɖe ɖɔ, si nagawɔ nam le ƒe adre bubu me la nu. 28Yakob wɔ nenema, eye wowu kwasiɖa la nu; emegbe wotsɔ via Raxel hã nɛ wòɖe. 29Eye Laban tsɔ eƒe kosi Bilha na via Raxel, bena woasubɔe. 30Azɔ edɔ kple Raxel hã, eye wolɔa Raxel wua Lea. Eye wòsubɔe ƒe adre bubu la.
31Ke esi Yehowa kpɔ bena, womelɔ̃a Lea ƒe nya o la, enu eƒe vidzidɔ, eye wòxe Raxel tɔ. 32Eye Lea fɔ fu dzi ŋutsuvi, eye wòna ŋkɔe bena Ruben; elabena egblɔ be: Yehowa kpɔ nye nublanui, azɔ srɔ̃nye alɔ̃m. 33Eyome la egafɔ fu, eye wòdzi ŋutsuvi. Eye wògblɔ bena: Yehowa se bena, womelɔ̃a nye nya o; eyata wotso esia hã nam. Eye wòna ŋkɔe bena Simeon. 34Emegbe wògafɔ fu dzi ŋutsuvi, eye wògblɔ bena: Azɔ ko srɔ̃nye aku ɖe ŋunye, elabena medzi ŋutsuvi etɔ nɛ. Eyata wòna ŋkɔe be Lewi. 35Eye wògafɔ fu dzi ŋutsuvi, eye wògblɔ bena: Azɔ la makafu Yehowa! Eyata wòna ŋkɔe bena Yuda. Emegbe la edzudzɔ vidzidzi.
Currently Selected:
Mose I 29: EWERV
Highlight
Share
Copy
Want to have your highlights saved across all your devices? Sign up or sign in
Bible in Éwé Revised Version © Bible Society of Ghana, 1913, 2006.