MATEO QALLTA ARUNAKA
QALLTA ARUNAKA
Sapa mayni evangelio sat qillqatanak qillqirinakax mä suma amuyt'ampi, mä amtampiw qillqapxäna. Nayrïr evangelio sat qillqatanxa, Jesusax Qhispiyir Mesiasjam uñstayatawa, jupa tuqiw Diosax arsüwinakap phuqhawayi, kuntix Nayra Testamento qillqatan markapar arskäna ukanaka. Kuna tuqittix aka qillqatan utjki ukax, suma saräwipar qillqt'atawa. Nayraqatax Jesusan nayra awkinakapata, yurïwipat parli, ukxarusti niya kimsa tunka mara qhipatxa, Bautisir Juanan luräwinakapat parlaraki, jupasti Cristot nayra jutäna (1.1—3.12). Jesusan luräwinakapax bautisasitapampi, Supayampi wasaran yant'atätapampiw qalltäna (3.13—4.11). Ukxarusti Jesusan Galilea uraqin luräwinakapat parli, uka chiqan qhispiyasiñ arunak parläna, yatichäna, kunayman usutanakaruw k'umaraptayäna (4.12—18.35), ukatsti Jerusalén markar qhip qhipa saräwipat parlaraki (caps. 19-20). Qhip qhipa urunakan kunanakatix luraskäna ukanakata, cruzan ch'akkatatätapata, jiwatat jaktatapata, mayninakar jakaskir uñstatapata, taqi ukanakatxa 21—28 uka jaljanakan parli. Aka qillqatax Jesusan arkirinakapar iwxa arunak churatapampiw tukt'ayi, jupanakan aka uraqpachar sarapxañapataki, ukatsti jupan arkirinakap tukuyanipxañapataki.
Aka evangelio qillqatax jach'a yatichirit Jesusar uñstayi, Diosan kamachinakapat qhanañchañapataki, qhapaq markapat yatichañatakis munañanïtapa. Ukhamasti aka qillqatanxa, yatichäwinakapax phisqar jaljatawa:
Nayrïri: Qullu patan yatichäwipa, ukanxa khitinakatix alaxpachar saririnakäpki ukanakan luräwinakap uñacht'ayäna, kunjäm chuymanïpxañapasa, kunäkanitix tukuyapax taqi ukanakata (caps. 5—7).
Payïri: Tunka payan yatiqiripar qhispiyasiñ arunak yatiyanipxañapatakiw iwxt'i (cap. 10).
Kimsïri: Diosan qhapaq markapat uñtasïwinak tuqi yatichäwinaka (cap. 13).
Pusïri: Iyawsirinakan sarnaqäwinakapxat yatichäwinaka (cap. 18).
Phisqïri: Akapachan tukusiñapata, Diosan qhapaq markapan jutañapampit yatichäwinaka (caps. 24, 25).
Currently Selected:
MATEO QALLTA ARUNAKA: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996