SAN JUAN 1
1
Diospa Palabran runaman tukun
1Tukuy imaj qallariynimpi Palabraqa karqapuni. Chay Palabraqa Dioswan kasharqa, Palabrataj Dios karqa. 2Kaymin qallariypeqa Dioswan karqa. 3Tukuy imas paypa ruwasqan kashan. Mana paywanqa, mana imapis ruwasqachu karqa ruwasqamantaqa. 4Kausayqa paypi kasharqa. Chay kausaytaj runaspaj k'anchay karqa. 5K'anchayrí laqhapi lliphipin. Laqhataj k'anchayta mana atiparqachu.
6Uj runa karqa Diospa kachamusqan. Paypa sutintaj Juan. 7Payqa k'anchaymanta willanampaj jamorqa, paynejta tukuy runas Diospi creenankupaj. 8Mana Juanchu chay k'anchayqa karqa. Payqa k'anchaymanta willanampaj kachamusqa karqa. 9Cheqa k'anchayqa, kay pachapi tukuy runasman k'anchanampaj jamorqa.
10Palabraqa kay pachapiña kasharqa. Kay mundotaj paynejta ruwasqa karqa. Kay mundopi kaj runastaj payta mana rejserqankuchu. 11Paypata kajkunaman jamorqa. Paykunataj mana uyariyta munarqankuchu. 12Sutimpi creespa, tukuy payta recibejkunaman atiyta qorqa, Diospa wawasnin kanankupaj. 13Paykunaqa mana yawarmantachu kanku, nitaj aychaj munayninmantachu, nillataj qharej munayninmantachu; astawanqa Diosmanta.
14Chay Palabrataj aychallikorqa. Noqanchej ukhupitaj tiyakorqa. Jatun k'anchayninta rikorqanchej, Tata Diospa uj k'ata Churimpa k'anchayninta jina; payqa junt'a karqa munakuywan, cheqa kaywantaj. 15Paymanta Juanqa qhaparispa willarqa: Kaymá chay qhepayta jamojqa. Payqa noqamanta ñaupajmin. Manaraj nacishajtiy karqañapuni.
16Paypa jatun qhapaj kayninmanta tukuypis jap'inchej qhasimanta Diospa yanapayninta; chaytaqa ñaupajta qowarqanchejña, kunantaj astawan qowanchej. 17Moisesnejta leyqa qosqa karqa; Diospa khuyakuynin cheqawan, Jesucristonejta chayamuwanchej. 18Mana pipis Diostaqa jayk'ajpis rikorqachu; uj k'ata churi, Dios Tatawan kajlla paytaqa rejsicherqa.
Juan Bautista willan Jesucristomanta
[Mt 3.11-12; Mr 1.7-8; Lc 3.15-17]
19Kaytaj Juampa willasqan, maypachachus Jerusalenmanta judíos kacharqanku sacerdotesta, levitasta, payta tapoj: Pitaj qan kanki?, nispa. 20Paytaj sut'ita willarqa: Mana noqachu Cristo kani, nispa.
21Tapullarqankutaj: Pi kankiri? Qanchu Elías kanki?
Juantaj nerqa: Mana paychu kani.
Nerqankutaj: Jamunan kaj profetachu kanki?
Kutichillarqataj: Manapuni, nispa.
22Chantá nerqanku: Pipunitaj qan kankiri? Niwayku ari, kachamuwarqayku chaykunaman willanaykupaj. Imatataj ninki qanmanta.
23Juantaj nerqa: Noqa kani ch'innejpi qhaparej: “Señorpa ñanninta cheqanyachiychej”, nispa, profeta Isaiaspa nisqanman jina.
24Chaykunataqa fariseos kacharqanku. 25Tapullarqankutaj, nispa: Sichus mana Cristochu kanki, nitaj Eliaschu, nillataj profetachu chayqa; imaraykutaj bautizankiri?
26-27Juan paykunaman kuticherqa: Noqa yakupi bautizani; qankuna ukhupitaj uj runa kashan pitachus mana rejsinkichejchu. Chaymá qhepayta jamojqa. Noqaqa paypa ujut'asnillantapis mana phaskanaypaj jinachu kani.
28Kay imas karqa Betaniapi, chaytaj Jordán mayu chimpapi; chaypi Juanqa runasta bautizasharqa.
Jesús Diospa Corderon
29Juantaj q'ayantin, Jesusta payman jamushajta rikuspa, nerqa: Kaymá Diospa Corderon, runaspa juchanta qhechojqa. 30Paymanta noqaqa nerqani, payqa noqamanta ñaupaj, imaraykuchus manaraj nacishajtiy karqañapuni. 31Noqaqa payta mana rejserqanichu; astawanqa israelitas payta rejsinankupaj jamorqani, runasta yakupi bautizaspa.
32Juan willallarqataj nispa: Santo Espirituta palomata jina janaj pachamanta uraykamojta rikorqani; chaytaj Jesuspa patannejpi kakorqa. 33Noqaqa payta mana rejserqanichu; pichus yakuwan bautizajta kachamuwaj niwarqa: Pejpa patanmanchá Santo Espíritu uraykamuspa kakonqa, chaymá kanqa Santo Espirituwan bautizajqa. 34Noqataj ajinata rikuni, rejsichinitaj payqa Diospa Churin kasqanta.
Jesuspa ñaupa yachachisqasnin
35Q'ayantintaj Juanqa chayllapitaj kasharqa, iskay yachachisqasninwan. 36Juantaj, chaynejpi Jesús purishajtin, payta rikuspa nerqa: Kayqa, Diospa Corderon kaypi kashan.
37Iskay yachachisqastaj parlajta uyarispa, Jesusta qhatikorqanku. 38Jesustaj, qhepanta jamushasqankuta rikuspa taporqa: Imata mask'ashankichej?, nispa.
Paykunataj kuticherqanku: Maestro, maypi tiyakunki?
39Jesustaj nerqa: Jamuychej rikunaykichejpaj.
Yachachisqastaj rerqanku; rikorqankutaj maypichus Jesús tiyakusqanta. Chay p'unchaypitaj paywan qhepakorqanku, imaraykuchus ch'isiyasharqaña.
40Juampa nisqanta uyarispa Jesuswan rerqanku; chay iskaymanta ujnintaj Andrés karqa, Simón Pedroj wauqen. 41Pay ñaupajta wauqen Simonta tarerqa, nerqataj: Mesiasta tariyku. Chaytaj Cristo niyta munan.
42Chaymantá, Jesuspaman Simonta pusarqa. Jesusrí, allinta qhawarispa payman nerqa: Qan kanki Simón, Jonaspa churin; kunanmanta sutiykeqa Cefas kanqa. Chaytaj, Pedro niyta munan.
Jesús wajyan Felipeta Natanaeltawan
43Q'ayantintaj, Jesusqa Galileaman llojsishaspa, Felipeta tarerqa, nerqataj: Qhatiway.
44Felipeqa Betsaida llajtamanta karqa. Andreswan Pedrowampis chayllamantataj karqanku. 45Felipetaj, Natanaelta taripaspa nerqa: Josejpa churin Jesús nazarenota tariyku. Paymantaqa, Moisés escriberqa leypi, ajinallatataj profetaspis.
46Natanael nerqa: Atinmanchu Nazaretmanta allin imapis llojsimuyta?
Felipetaj nerqa: Jamuy ari, rikunki.
47Jesustaj, Natanaelta payman qayllaykushajta rikuspa, nerqa: Kaymá cheqa israelitaqa, paypitaj ni ima llullakuypis kanchu.
48Chantá, Natanael taporqa: Maypitaj noqata rejsiwarqankiri?
Jesustaj kuticherqa: Manaraj Felipe wajyashasojtin, higo sach'a urapi kashajtiykiña rikorqayki.
49Chaymantataj Natanael nerqa: Maestro, qanqa Diospa Churin kanki, Israelpa Reynin.
50Jesustaj kutichispa nerqa: Higo sach'a urapi kashajtiyki rikorqayki, nisusqayraykuchu creenki? Aswan jatuchaj imastaraj rikunki.
51Jesús nillarqataj: Cheqamanta cheqamanta niykichej: Kunanmanta ñaupajmanqa, janaj pachata kichasqata rikunkichej; Diospa angelesnintataj, Runaj Churinman uraykamushajta, wicharishajtataj.
Currently Selected:
SAN JUAN 1: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.