SAN LUCAS 24
24
Jesuspa kausarimpuynin
(Mt 28.1-10; Mr 16.1-8; Jn 20.1-10)
1Semanaj ñaupaj p'unchaynimpi, chhapu chhapullataraj, paykuna sepulturaman jamorqanku, q'apaj jampista wakichisqankuta apamuspa, waj warmiswan khuska. 2Sepulturaj rumintataj tijrasqata tariparqanku. 3Yaykuspataj, mana tarerqankuchu Señor Jesuspa ayanta. 4Chayrayku, manchachikuspa mana ni imanakuyta atishajtinku, paykunaj qayllankupi iskay qharis rikhurerqanku, lliphipishaj p'achasniyoj. 5Mancharikuspa k'umuykojtinkutaj, chay qharis paykunaman nerqanku: Imaraykutaj kausashaj runata wañusqas ukhupi mask'ashankichej? 6-7Manaña kaypichu, kausarimpunña. Yuyarikuychej Galileallapiraj kashaspa qankunaman nerqa: Runaj Churenqa entregasqa kanqa juchasapaspa makinman chakatanankupaj; kinsa p'unchaymantataj wañusqa ukhumanta kausarimunanta.
8Chaypacharaj paykuna yuyarikorqanku Jesuspa nisqasninmanta. 9Aya p'ampanamanta kutimuspataj, kay tukuyta willarqanku chunka ujniyoj yachachisqasman, wajkunaman ima. 10Kay imasta yachachisqasman willajkunaqa karqanku: María Magdalena, Juanawan, Santiagoj maman Mariawan, waj warmiswan ima. 11Warmispa nisqankutataj yachachisqasqa mana creerqankuchu.
12Jatarispataj Pedroqa usqhayta sepulturaman rerqa. Ukhunejta qhawaykuspataj, uj cheqapi sabanasllata rikorqa; chantá riporqa t'ukuspa chay ruwasqanmanta.
Emaús ñampi
(Mr 16.12-13)
13Kikin p'unchayllataj, paykunamanta iskay risharqanku Emaús sutiyoj ranchoman. Chaytaj Jerusalenmanta iskay leguapi jina karqa. 14Rej jinataj paykunapura parlasharqanku kay tukuy ima kasqanmanta. 15Churanakuspa parlanankukamataj, kikin Jesús qayllaykorqa. Paykunawan khuskataj rerqa. 16Paykunaj ñawisninkutaj chharpuyasqa jina kasharqanku, payta mana rejsinankupaj. 17Chantá Jesús taporqa: Imamantapunitaj chay jinata churanakushankichej purej jinari? Imaraykutaj llakisqas kashankichej?
18Paykunamanta ujnin kajtaj, Cleofas sutiyoj kuticherqa: Qanllachu k'ata forastero kanki Jerusalempi mana yachaj imachus kasqanta kay p'unchaykunapi?
19-20Chantataj pay kuticherqa: Imata?, nispa.
Paykunataj nerqanku: Nazareno Jesusmanta pichus profeta karqa, ruwasqasnimpi atiyniyoj, nisqasnimpi ima, Diospa ñaupaqempi runakunajpipis; imaynatachus kuraj sacerdotes, kurajkunasninchej ima payta jap'ichispa juchacharqanku wañunampaj, chakatachinankupajtaj. 21Noqaykutaj suyasharqayku pay Israel nacionta kacharichinanta. Kunantaj kinsa p'unchayña kashan chay tukuy ima ruwakusqanqa. 22Chay tukuywampis, noqayku ukhumanta wakin warmis mancharichiwarqayku, chhapu chhaputa sepulturaman rispa. 23Ayanta mana tarispataj, willaj kutimorqanku, iskay ángeles rikhurisqanta ima. Chay angelesqa paykunaman nisqanku Jesús kausakushasqanta. 24Noqaykumanta wakintaj sepulturaman rillasqankutaj, ch'usajllatataj taripasqanku warmispa nisqankuman jina; Jesustataj mana rikusqankuchu.
25Chantá pay nerqa: Ay, mana yuyayniyojkuna rumi sonqos, chay jinatapunichu mana creenkichej profetaspa tukuy nisqanta! 26Manachu Cristoqa chay tukuyta ñak'arinampuni karqa, manaraj janaj pachaman yaykushaspa?
27Chaypitaj sut'inchayta qallarerqa, paymanta chay tukuy imata Diospa palabran nisqanta; Moisesmantapacha qallarispa, tukuy profetaspa escribisqankumantawan.
28Mayqen llajtamanchus risharqanku chayman chayaspataj, Jesusqa aswan karuman rej tukorqa. 29Paykunataj jark'arqanku Jesusta: Qhepakuy ari noqaykuwan, intipis yaykushanña, ch'isiyamonqaña, nispa.
Jesustaj yaykuspa paykunawan qhepakorqa. 30Ajinataj karqa, Jesusqa paykunawan mesapi kashaspa t'antata oqharispa, graciasta qospataj, partiytawan paykunaman jaywarqa. 31Chay kikimpachataj ñawisninku kicharikorqa, Jesustataj rejsikaporqanku. Paytaj ñaupaqenkumanta chinkarerqa. 32Paykunataj ninakorqanku: Manachu sonqonchej k'ajarerqa ñampi parlawashajtinchej; Diospa palabrantataj sut'inchashawajtinchej?, nispa.
33Kikimpacha jatarispataj Jerusalenman kutirerqanku, chaypitaj Jesuspa chunka ujniyoj apostolesninta tariparqanku, paykunawan kajkunatawan tantasqata. 34Paykunataj nisharqanku: Cheqamanta Señorqa kausarimpun, Simonmampis rikhurisqa, nispa.
35Chantá paykunataj willarqanku imaynachus ñampi kasqanta, imaynatatajchus rejsikapusqankuta t'antata partishajtin.
Jesús rikhurin yachachisqasninman
(Mt 28.16-20; Mr 16.14-18; Jn 20.19-23)
36Paykuna kay imasmanta parlakunankukamataj, Jesusqa chaupinkupi sayaykuspa napaykorqa: Diospa sonqo tiyasqa kaynin qankunawan kachun, nispa.
37Chantá paykunaqa, manchariywan musphasqas, creerqanku uj espirituta rikusqankuta. 38Jesustaj paykunaman nerqa: Imaraykutaj mancharikunkichej, sonqoykichejpitaj iskayrayashankichejri? 39Qhawariychej makisniyta, chakisniyta ima. Noqa kikiy kani. Llujchiychej, qhawaychejtaj; imaraykuchus uj espiritoqa mana aychayojchu, nitaj tulluyojchu, noqajta rikushankichej jina.
40Kayta nispataj, rikucherqa makisninta, chakisninta ima. 41Paykunataj kusikuywan t'ukuspa manaraj creerqankuchu. Jesustaj paykunaman nerqa: Tiyapusunkichejchu ima mikhunallapis?, nispa.
42Paykunataj jaywarqanku uj chhikan challwa kankasqata, [Lachiwana misk'itawan.] 43Jap'ikuspataj Jesusqa mikhorqa paykunaj ñaupaqenkupi. 44Chaymantataj nerqa: Kayta nerqaykichejña qankunallawanraj kashaspa, junt'akunampuni kasqanta chay tukuy, noqamanta escribisqa kajkuna Moisespa leynimpi, profetaspapi, salmospi ima.
45-46Chaymantataj sut'incharqa, allinta unanchanankupaj Diospa palabranta; nispa: Ajina escribisqa kashan, jinatapuni Cristoqa ñak'arinan karqa; chantataj wañusqakuna ukhumanta kausarimunan karqa kinsa p'unchayninman. 47Sutimpitaj willakunan tiyan Diosman kutirinamanta; juchas pampachasqas kanankuta tukuynejpi, Jerusalenmanta qallarispa. 48Qankunataj testigos kankichej kay tukuy imasmanta. 49Qhawaychej noqa kachamusqaykichej, Dios Tatay qosunaykichej karqa chayta; chaykamarí, qhepakuychej Jerusalén llajtapi; patamanta atiywan kallpachasqas kanaykichejkama.
Jesús ripun janaj pachaman
(Mr 16.19-20)
50Chaymantataj Jesusqa, yachachisqasninta jawaman pusarqa Betaniakama. Chaypitaj makisninta oqharispa paykunata bendicerqa. 51Bendicishaspataj paykunamanta karunchakorqa, janaj pachamantaj oqharisqa karqa. 52Paykunataj Jesusta yupaychaytawan, may kusisqas kutiporqanku Jerusalenman. 53Chaypitaj templopipuni karqanku Diosta alabaspa. Amén.
Currently Selected:
SAN LUCAS 24: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.