YACHAY 10
10
Imaynamanta yachayqa runasta yanaparqa Adanmantapacha Josekama
1Yachayqa qhawaykorqa chay ñaupajta ruwasqa kay pachaj tatanta, pay sapallan ruwasqa kashajtin. Yachaytaj paytaqa juchanmanta kacharicherqa.
2Yachaytaj payman kallpata qorqa tukuy ima patapi sayanampaj.
3Maypachachus uj juchasapaqa k'ajaj phiñaynimpi yachaymanta t'aqakorqa, chinkayman rerqa, wauqenta chejnikuspa wañuchisqanrayku.
4Maypachachus payrayku yaku kay pachata chinkacherqa, yachaypuni kay pachata chinkaymanta ayqecherqa, cheqan sonqoyoj runata yakunta pusaspa chhalla k'ullullapi.
5Maypachachus uj sonqolla khuskachakuspa tukuy laya runasqa, rumi sonqosninkurayku ch'eqerasqas karqanku, yachaypuni ajllakorqa cheqan sonqoyoj runata, payta waqaychaspa mana k'aminayojta Diospa ñaupaqempi. Kallpayojtataj sayacherqa anchata wawanta munakojtimpis.
6Yachaypuni cheqan sonqoyoj runata kacharicherqa maypachachus Diosqa chinkacherqa phishqantin llajtata ninata parachimuspa.
7Chay runaspa sajra sonqosninkumanta yuyarikunapaj, kunankama uj t'ajra pampapi q'osñimushanraj. Chaypi sach'asqa mana poqochikunkuchu. Chaypitaj, yuyarikunapaj uj mana creej runamanta, uj kachi lanti sayarishan.
8Chay runasqa yachaymanta karunchakusqankurayku, manaña aterqankuchu sumaj kajta rejsiyta. Chantapis, qhepankupi yuyarikunasta saqerqanku, runas yachanankupajpuni paykuna wampu sonqos kasqankuta.
9Yachayrí, payta qhatejkunata llakiymanta kacharicherqa.
10Yachayqa sumaj ñanninta cheqan sonqoyojta pusarqa, wauqempa phiñakuyninmanta ayqeshajtin. Rikucherqataj Diospa reinonta. Chantapis, santo imasta yachacherqa. Ruwasqampirí, ñaupajman rinampaj yanaparqa. Llakiynintataj sumaj poqoyniyojman tukucherqa.
11Chaymanta, payta jark'arqa rikhurimojtinku paypa kapuyninta munapayaj ñak'arichej runas. Chantaqa, payta qhapajyacherqa.
12Contrasninkumanta jark'arqa, waqaycharqataj payta urmachiyta munajkunamanta. Sinch'i maqanakupipis atipaykucherqa, chay jinamanta yachanankupaj Diosta yupaychayqa aswan sumaj kasqanta tukuy imamanta astawan.
13Yachayllataj karqa pichus mana saqerparerqachu qhatuchikoj cheqan sonqoyoj runata, mana chayrí juchallikuymanta karuncharqa.
14Yachayqa paywan khuska kakorqa wisq'aykojtinku, manataj saqerparerqachu phujyu ukhupi, kamachikuy tojnuta payman qonankama. Chaymanta, payta sayaykucherqa ñak'arichejkunaj patampi. Payqa rikhurichin llakichejkunasnin llullakusqankuta, wiñay lliphipiyniyojtaj qhepakun.
Yachayqa Israel aylluta yanapan Egiptomanta llojsinampaj
15Yachayqa kacharicherqa ajllasqa aylluta, mana k'aminachikoj runasta, llakichejkunaspa makisninkumanta.
16Payqa, Señorta yupaychaj runaj sonqonman yaykorqa. Payllataj tukuy laya t'ukunasta ruwaspa, sayarqa manchachej reykunaspa ñaupaqempi.
17Ajllasqa runasman ñak'arisqankumanta t'inkata jaywarqa. Sumaj ñanninta paykunata pusarqa. P'unchaypi paykunata llanthuykorqa, tutapitaj qoyllurkunaj k'anchaynin jina karqa paykunapajqa.
18Yachayqa paykunata puka qochanta thaskicherqa, pusarqataj p'ultiykuchej yakunta.
19Chaypachaqa, yakus p'ultiykucherqanku paykunaj contrasninkuta. Chantaqa, ukhumanta ajtuykorqa.
20Jinamanta, cheqan sonqoyojkunaqa sajra runaspa imasninkuta jap'ikaporqanku. Paykuna, Señor, santo sutiykita yupaycharqanku. Tukuyninku ujllapi, atiyniykiwan yanapasqaykimanta yupaychasorqanku.
21Yachayqa opaspa simisninkuta kicharerqa, wawaspa qallusnintataj phaskarqa.
Currently Selected:
YACHAY 10: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.