ECLESIÁSTICO 50
50
Kuraj sacerdote Simeonmanta
1Yuyarikunallataj kuraj sacerdotemanta, Johanampa wawan Simeonmanta. Pay kausakushajtin, temploqa watejmanta sayarichisqa karqa. Santuariopis sumajyachisqa karqa.
2Ajinallataj, perqastapis mosojyacherqanku chaypacha. Churarqankutaj reypa wasimpi jark'ana torresta.
3Chaypacha uj jatun qochatapis ruwallarqankutaj. Chay qochaqa may jatun karqa, mar jina.
4Simeonqa Diospa ayllunta jark'arqa suwasmanta. Sinch'iyacherqataj llajtata ama enemigos yaykunankupaj.
5Santuario punkupi rikhurimuspa, cortina wasamanta llojsimuytawanqa, may jatun karqa Simeonqa, respetanapuni.
6Imaynachus ch'aska lliphipin phuyus ukhupi, ajinallataj paypis. Imaynachus killa k'anchamun fiestaspi, ajinallataj paypis.
7Imaynachus inteqa k'anchaykun reypa wasinta, ajinallataj paypis. Imaynachus k'uwichi rikhurimun phuyus ukhupi, ajinallataj paypis.
8Rijch'akullantaj t'ikasman q'omer tiempopi rikhurimojkunaman. Rijch'akullantaj azucena t'ikaman, larq'a cantopi sayajman. Chantapis, rijch'akullantaj cedro sach'aman, ruphay tiempopi q'omeryashajman.
9Inciensomampis rijch'akullantaj, q'osñirishan altar patapi chayman. Rijch'akullantaj allin ruwasqa qori copamampis, k'acha rumisniyoj k'achanchasqa chayman.
10Simeonqa olivo sach'a jinallataj, ashkha aceitunayoj jina. Rijch'akullantaj ashkha ramasniyoj sach'aman.
11Ajina karqa Simeonqa, k'acha p'achayoj p'achallisqa kashajtin. Ajina karqa altarman wicharishajtin. Templo punku jatun kayninwan junt'asqa karqa.
12Ajina karqa Simeonqa llant'a ladopi sayashajtin jap'ikunampaj imatachus waj sacerdotes aparqanku chayta. Chaypacha, waynasqa muyuynimpi sayarej kanku, imaynachus laqhes rikhurimunku Líbano cedro sach'amanta, ajina.
13Paypa ladompi sayarej kanku, imaynachus sauce sach'as sayanku larq'a cantopi, ajina, tukuy Aarón ayllumanta kajkuna, sumaj p'achallisqas. Paykunaqa makisninkupi apasharqanku rikuchikusta Señorpaj tukuy runaspa ñaupaqempi.
14Simeonqa rikuchikusta Señorman jaywaytawankamaqa, wakichej ñak'asqa animalkunata Señorman jaywanampaj.
15Chaymantataj, vinota jich'ayoj altar chakiman. Chayqa sumaj q'apayniyoj karqa Señorpaj, patapi kaj mundontimpi kamachejpaj.
16Chantaqa, Aarón ayllumanta kaj sacerdotespaj cornetasta waqerichej kanku. Sonachisqankutaj sinch'i karqa. Chaywanqa willaj kanku Señorqa chaypi kasqanta.
17Chantaqa, tukuy chaypi kajkuna qonqorikoj kanku pampakama k'umuykukuspa, yupaychaspataj Israelpa Señor Diosninta.
18Chantaqa, takisqankutaj uyarikorqa. Chaytaqa tukuy runas chaypi kashajkuna takisharqanku.
19Tukuy runaspuni takirikoj kanku, khuyakoj Señormanta mañakuspa. Kuraj sacerdote tukuytawanqa imatachus ruwanan karqa altarpi, uraykamoj.
20Payqa uraykamoj makisnin oqharisqa israelitaspa patankuman, tukuy paykunata Señorpa sutimpi bendiciykuspa, kusikuspa Señorpa sutinta oqharisqanmanta.
21Runasqa qonqorikoj kanku paypa makisninmanta bendicionta jap'ikunankupaj.
22Kunanqa, qankunapis Israelpa Señor Diosninta yupaychaychej. Paymin t'ukunasta ruwan kay pachapi. Payqa runata wiñachin manaraj nacekusqanmantapacha. Paytataj ruwan munayninman jina.
23Paypuni yachayta qosuchun, qankuna ukhupitaj sonqo tiyasqa kay kachampuni.
24Señorqa yanapachumpuni Simeonta. Junt'achuntaj promesa ruwasqanta Fineesman. Fineesman, wawasninmampis chayta qochumpuni wiñaypaj.
Israelta chejnikojkuna nacionesmanta
25Iskay laya nacionesta noqaqa chejnikuni. Chejnikullanitaj waj runastapis, pikunachus mana nación sutiyojchu kananku tiyan.
26Chaykunaqa kanku Seir llajtapi tiyakojkuna. Chantaqa, filisteospis. Chaymantataj, chay mana yuyayniyoj runas, Siquempi tiyakojkuna.
Kaywan tukukun
27Tukuy kaytaqa yachayniyoj nej Siraj allchhin, Eleazarpa wawan Jesús. Kay jinatapuni umanmanta llojsimoj.
28Chayta unanchajqa kusikuyniyoj kanqa. Chayta yachajqa yachayniyojllataj kanqa.
29Señorta yupaychajqa kausayniyoj kanqa.
Currently Selected:
ECLESIÁSTICO 50: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.