ECLESIÁSTICO 47
47
Natanmanta Davidmantawan
1Samuelpa qhepampi jamorqa Natán, pichus Davidpa wasinman yaykorqa, payta sirvej.
2Israel ukhupi mana ni pi karqachu David jina sumaj. Imaynatachus wiraqa aswan sumaj Diosman jaywasqankumanta, ajinallataj Davidpis.
3Davidqa leoneswan phujllakoj cabraspis kankuman jina. Phullakojllataj jukumariswan corderospis kankuman jina.
4Lloqallaraj kashaspa, uj may jatun runata wañucherqa. Ajinamanta, ayllumpa p'enqayninta chinkacherqa. Payqa warak'anta muyuykuchispa makinwan ujta pampaman k'umuykucherqa chay jatun runaj wapu kayninta.
5Davidqa Diosmanta mañakusqa tukuy sonqo. Chayrayku Diosqa, makinta kallpachaykusqa wañuchinampaj chay runata, maqanakupaj allin wakichikusqata. Ajinamantaqa, Israel aylluta atipacherqa.
6Chayraykullataj, sipaskuna paypaj takiriporqanku kusikuspa chunka waranqa runasta wañuchisqanmanta.
7Davidqa atiparqa muyuynimpi kaj enemigosninta. Perqachasqa jark'anasta oqharicherqa filisteos ama yaykunankupaj. Paykunaj atiyninkutataj kunankama t'unarparicherqa.
8Imallatapis ruwashajtin Davidqa Diosman graciasta qoj. Davidqa tukuy sonqo payta ruwaj Diosta munakorqa. Paypaj sapa día takirikoj.
9Davidqa Diospa altarpa ñaupaqempi takirikoj guitarraswan. Davidqa nerqa runas takinankuta arpasta waqachispa.
10Nillarqataj fiestasqa aswan k'achitus kananta. Nillarqataj imaynatachus fiestas kanan tiyan sapa wata. Chay fiestaspi runasqa Diospa santo sutinta yupaychaj kanku paqarinmantapacha templopi takispa.
11Chantaqa, Señorqa Davidpa juchanta pampacharqa, wiñay atiytataj qorqa. Wajyarqataj rey kanampaj, Jerusalén llajtapitaj tiyakunampaj.
Salomonmanta
12David sumaj runa kasqanrayku, paypa wawan Salomón, yachaysapa runa, sonqo tiyasqa kausakorqa.
13Salomón kamachikushajtin maqanakus mana karqachu. Diostaj payta yanaparqa mana maqanakunampaj vecinosninwan. Salomonqa sayaricherqa uj templota Diospaj. Paypis ruwachillarqataj uj santuariota wiñaypaj sayashajta.
14Salomón! May yachayniyoj karqankeqa wayna kayniykipi. Yachayniyoj nisqasniyki jich'akamoj Nilo mayu jina.
15Qanqa, kay pachata junt'aykucherqanki yachayniykiwan. Janaj pachamampis chayamoj yupaychana takisniyki.
16Sutiyki karu llajtasmampuni chayarqa. Llamp'u sonqoyoj kasqaykirayku runasqa qanta munakusoj kanku.
17Tukuy ladomanta runasqa t'ukoj kanku mayta uyarispa takikusqaykita, willakusqasniykita, watuchikusqasniykita, yachachisqasniykita ima.
18Runasqa nisorqanku: Señorpa munakusqan, nispa. Chay suteqa ñaupaj Israel ayllumampuni qosqa karqa. Qoritaqa fierrota jina qotorqanki, qolqetarí titita jina.
19Jinapis, warmiswan purej kanki. Ukhuykitataj atipaykuchinki paykunawan.
20Sutiykitaqa ch'ichicharqanki, manataj warmiykita respetarqankichu. Diospa phiñakuyninta wawasniyki pataman apachimorqanki. Ayllusniykitataj p'enqaypi rikhuricherqanki.
21Chayrayku, Diospa ayllun iskayman t'aqakorqa. Chayraykullataj, Efraín ayllu Diospa contrampi oqharikorqa.
22Jina kajtimpis, Diosqa mana karunchachinchu qanmanta munakuyninta. Manataj qonqapunchu nisqanta junt'ayta. Chayrayku, Diosqa mana tukucherqachu ajllasqasnimpa wawasninkuta. Nitaj chinkacherqachu pikunatachus jamunku munakusqasninmanta. Manachayqa, munarqa Jacob ayllumanta kanankutapuni runas. Munarqataj Davidpa poqoynin kanantapuni.
23Salomonqa wañorqa ashkha watasniyoj kaspa. Paypa qhepampi jamorqa wawan Roboam. Chay Roboamqa may wampu karqa, pisi umayoj. Roboamqa, pisi yuyayniyoj kaspa, runasta chinkayman aparqa.
24Chaymanta jamorqa Nabatpa wawan Jeroboam. Paymantaqa ama ni pipis yuyarikuchunchu. Chay Jeroboamqa juchallikorqa. Israelitastapis juchallicherqataj. Payqa Efraín runasta urmaykucherqa. Paykunataj llajtankumanta qharqosqas karqanku.
Eliasmanta
25Chay runaspa juchankoqa may jatun karqa. Paykunaqa tukuy ima laya juchawan juchachakorqanku.
Currently Selected:
ECLESIÁSTICO 47: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.