ECLESIÁSTICO 24
24
Yachay takiy
1Yachayqa pay kikinta alabakun. Runa chaupipi k'anchayninta rikuchin,
2Yachayqa siminta kicharin Diospa ñaupaqempi. Angelkunaj ñaupaqenkupitaj nin kay jinata:
3Patapi kaj Diospa siminmanta llojserqani noqaqa. Wausi jinataj kay pachata qhatarqani.
4Janaj pachapi tiyakoj kani. Tiyanayqa uj rakhu aysasqa phuyu.
5Noqa sapallay janaj pachata muyuykoj kani. Chayarqanitaj kay pachaj ukhunman.
6Jatun qocha yakus patapi kamachej kani. Jinallataj tukuy jallp'aspi. Tukuy aylluspata, tukuy llajtaspatawan kamachejninku karqani.
7Tukuynejpi mask'arqani uj cheqata samarikunaypaj, uj wasita tiyakunaypaj.
8Chantaqa, tukuy imata ruwajqa, uj ordenta qomuwarqa. Pichus noqaqa ruwawarqa, ajllapuwarqa uj cheqata, chaypi wasi toldoyta sayarichinaypaj. Pay niwarqa: Jacob ayllu ukhupi tiyakunki. Israel aylloqa chayaqeyki kanqa, nispa.
9Wiñaymantapacha, qallariypipuni pay ruwawarqa. Wiñaytataj kausakusajpuni.
10Santo wasipi paypa kamachin karqani. Sión orqopitaj tiyakoj kani.
11Ajina, pay samarichiwarqa ajllakusqan llajtapi. Jerusalempi atiyniyoj karqani.
12Kay lliphipiyniyoj ayllupi saphinchakorqani, Señorpa kikin ajllakusqan ayllumpi.
13Líbano cedro sach'a jina wiñarqani, Hebrón orqo pino jina.
14Chantapis, Engadi palma sach'a jina, Jericó rosas jina. Chantapis, pampapi olivo sach'a jina. Mayus cantopi sayashaj castaño sach'a jinapis.
15Q'apayniytaj canelaj q'apaynin jina karqa. Sumaj t'ikaj q'apaynin jina. Sumaj ajllasqa mirra jina q'apaj kani. Imaynachus incienso q'osñishan santo wasipi, ajinallataj noqapis q'apaj kani.
16Terebinto sach'a jina makisniyta kicharej kani. Laqhesniytaj t'ikasniytaj ashkha, may k'achitu qhawanapaj.
17Uva sach'a jina mirarqani. Poqoyniytaj ashkha, may k'acha.
18Noqata munakuwajkuna, jamuwaychej. Poqoyniywan sajsakuychej.
19Sutiy aswan misk'i abeja misk'imanta nisqaqa. Pichus jap'iwajqa, aswan qhapaj kanqa abeja panalniyojmanta.
20Mikhuwajqa yarqhachikullanqaraj. Ujyawajqa ch'akichikullanqaraj.
21Uyariwajqa mana p'enqaypichu rikhurenqa. Kasuwajqa mana juchaman urmanqachu.
22Tukuy kay nisqayqa tratomanta libropi tarikun, Dios israelitaswan ruwarqa chay tratomanta yachachej libropi. Chay Diospa leyninta Moisés israelitasman yachacherqa. Chaymin Jacob aylloj chayaqen.
23Diospa leynin yachaywan junt'a, Pisón mayu jina. Imaynachus Tigris mayunejpi, sach'as sumajta poqonku, poqochiy killas chayamojtin, ajinallataj Diospa leynimpis.
24Diospa leynin yachayniyoj Eufrates mayu jina. Imaynachus Jordán mayunejpi tipiy killaspi trigo ashkhayan, ajinallataj Diospa leynimpis.
25Nilo mayu jina, runasta yachachin. Imaynachus Guijón mayunejpi, uvasta pallay killaspi ashkhata pallanku, ajinallataj Diospa leynimpis.
26Mana ni pi allintapuni rejserqachu yachaytaqa. Ñaupajta payman chayajqa, mana entienderqarajchu as allinta. Ajinallataj, qhepapiña chayajpis nitaj payta entiendeyta qallarerqarajchu.
27Yachaj yuyaynenqa, jatun qochaj aswan junt'a. Munaynintaj ukhu pachamantaqa aswan jatun.
28Noqarí juch'uy mayu jina kani, jatun mayumanta llojsishan ajina. Imaynachus larq'a yakoqa chajrasta qarpamun, ajinallataj noqapis.
29Noqa kikiyta nikorqani: Chajrayta qarpamusaj, jallp'asniyta ch'aranchachisaj, nispa. Ujta, larq'ay mayuman tukorqa, mayuytaj qochaman.
30Yachakusqay k'ancharenqa tutamantapacha. Yachaypa k'anchaynin karuman chayanqa.
31Imaynachus profetas ruwarqanku, ajinallataj noqapis yachasqayta yachachimusaj qhepaypi jamoj runasta.
32Tukuy kaytaqa mana noqallapajchu ruwarqani, manachayqa tukuy yachayniyoj kayta munajkunapajpis.
Currently Selected:
ECLESIÁSTICO 24: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.