ECLESIÁSTICO 15

1Chayta ruwan Señorta yupaychajqa. Diospa leyninta junt'aspataj yachayniyojman tukun.

2Yachaytaj payta taripamoj llojsin uj mama jina. Makisninta kichariykun imaynachus warmeqa qosanta recibiykun ajinata.

3Yachayqa t'antata mikhuchin, ujyachintaj unanchakoj yakuta.

4Runaqa paypi atiykukonqa ama urmanampaj. Paypi sonqonta churaspataj, mana p'enqaypi rikhurenqachu.

5Yachaytaj payta oqharenqa uma masisnimpa patanman, runas ukhupi parlanampaj.

6Ancha jatun kusiywan junt'aykuchenqa. Paypa sutintaj wiñaypaj rejsisqa kanqa.

7Mana umayoj runasqa manapuni yachayman chayayta atenqankuchu. Wapu runastaj yachaytaqa ni rikuytapis atinkuchu.

8Yachayqa jatunchakojkunamanta karunchakumpacha. Llullakojkunaqa ni yachankupischu yachay kasqanta.

9Sajra runasqa mana yupaychanankupaj jinachu kanku. Diosqa paykunaman mana yachayta qorqachu.

10Yachayniyojmin yachayta yupaychan. Yachayniyoj kajqa atinman yachayta yachachiyta.

Runaqa payllamanta juchallikun

11Ama niychu: Diosqa juchallichiwan, nispa. Diosqa mana ruwanchu imatachus chejnikusqanta.

12Amataj niychu: Diosqa urmachiwan, nispa. Payqa mana necesitanchu juchasapasta.

13Chejninakunata Señor chejnikun. Señorta munakojkunapis chejninakunata chejnikullankutaj.

14Maypachachus Diosqa qallariypi runata ruwarqa, atiyta qorqa payllamanta imallatapis ajllayta atinampaj.

15Munanki chayqa, junt'allanki paypa kamachisqanta. Ruwallankitaj imachus allin paypa ñaupaqempi.

16Ñaupaqeykipi kashan ninawan yakuwan. Imatachus munanki ajllakullay.

17Sapa ujpa ñaupaqempi kashan kausaytaj wañuytaj. Sapa uj jap'ikonqa imatachus ajllakusqanta.

18Señorpa yachaynin jatunmin. Payqa atiyniyojmin. Tukuy imatataj rikun.

19Diosqa rikun tukuy ruwasqasninta. Yachallan payqa imatachus runas ruwanku.

20Payqa mana ninchu ni pita juchallikunanta. Manataj ni pitapis kamachinchu llullakunanta.

Currently Selected:

ECLESIÁSTICO 15: QCHSB

Highlight

Copy

Compare

Popular Bible Verses from
ECLESIÁSTICO 15