ROMANOS 13

Kamachejkunata kasukunamanta

1Tukuy runakunaqa kamachejkunata kasuchunku; imaraykuchus ateyqa Diosllamanta jamun, kamachejkunapis Diospa churasqallantaj kanku. 2Ajinaqa, pichus kamachejkunata mana kasunchu chayqa, Diospa churasqanta mana kasunchu. Chayrayku mana kasukojkunaqa, paykuna kikinkupaj jasut'iyta mask'akunku. 3Kamachejkunaqa, allin kajta ruwajkunata mana manchachinankupajchu churasqas kanku, manachayqa sajrata ruwajkunallata. Munankichu kamachejta mana manchachikuyta? Allinta ruway, paytaj allimpaj qhawasonqa. 4Kamachejqa Diospa kamachisqanta ruwan, qampa allinniykipaj. Chantá mana allinta ruwanki chayri, manchachikuy, imaraykuchus kamachejqa manamin qhasipajchu espadataqa apaykachan. Payqa Diospa kamachinmin; jasut'iwantaj sajrata ruwajta kutichinampaj. 5Chayrayku allimpuni paykunata kasunaqa, chantá mana jasut'ita manchachikuspallachu, astawanqa concienciaman jina kasuna. 6Chayrayku impuestotapis qoshankichej, imaraykuchus paykunaqa Diospa kamachisnin kanku, kay tukuy imasta ruwaspallapuni.

7Tukuy manuykichejta junt'aychej: Pimanchus tasata qonaykichejmanqa tasata qopuychej. Impuestota qonaykichejmantaj impuestota qopuychej. Pitachus kasunaykichej tiyan, chaytaqa kasuychej. Pitachus jatumpi qhawanaykichejtapis allimpaj qhawaychej.

8Ajinaqa ama pimampis manuchu kaychej, manachayqa purajmanta munanakuychej, imaraykuchus runa masinta munakojqa, ñapis leyta junt'anña. 9Leyqa jinata nin: Ama qhenchachakunkichu, ama wañuchinkichu, ama suwankichu, [ama qhasimanta tumpankichu,] ama wajpa imanta munapayankichu. Mayqen kamachillapis kay nisqapi junt'akun: Runa masiykita munakunki qan kikiykita jina. 10Munakoyqa mana sajratachu ruwan runa masinta. Runa masita munakoyqa leyta junt'aymin.

11Kaywanqa yachanchej tiempota rejsispa puñuymanta rijch'arina horaña kasqanta, imaraykuchus salvacionninchejqa aswan qayllapi kashan, creesqanchej chay p'unchaymantaqa. 12Tutaqa tukukapushanña, p'unchaytaj qayllamushan. Chayrayku amaña ruwanachu laqhayaypa ruwanasninta, astawanqa Diospa k'anchaynimpa maqanakunasninwan p'achallikuna. 13Ajinaqa p'unchaypi jina purinachej maychus kajta; amataj purinachu jatun mikhuykunaspi, machaykuykunaspi, millay kausaypi, churanakuypi, nitaj chhoqonakuypipis. 14Astawanqa Señor Jesucristomanta p'achallikuychej; amataj aychaj munayninta ruwaychejchu.

Currently Selected:

ROMANOS 13: QCHSB

Highlight

Copy

Compare