ROMANOS 11

Israel puchu

1Kunanqa tapuni: Diosqa ayllunta qhesachanchu? Mana imaynamantapis qhesachanchu. Noqapis israelita kani, Abrahampa mirayninmanta, Benjamimpa ayllunmantataj. 2-3Diosqa ayllunta mana qhesachanchu, imaraykuchus ñaupajmantapacha rejserqa. Chayrí, manachu yachankichej escribisqapi imatachus Eliasmanta nisqanta? Imaynatachus pay Israelpa contranta Diosman willakusqanta?, nispa: Señor, profetasniykita wañurachinku, altaresniykitapis urmarachinku, noqallaña qhepakuni; kunanrí noqatañataj wañuchiwayta munashanku. 4Chantá, Dios ima nintajri? Qanchis waranqa runasta t'aqakuni. Paykunaqa lantisman Baalpa ñaupaqenman mana qonqorikorqankuchu. 5Ajinallatataj kay p'unchaykunapipis israelitasmanta pisi runaslla puchunku, Diospa khuyakuyninman jina ajllasqas. 6Sichus Diospa khuyakuyninrayku ajllasqas kanchej chayqa, manaña ruwasqasninchejraykuchu. Mana jina kanman chayqa, Diospa khuyakuynenqa, manaña khuyakuychu kanman. [Sichus ruwanasraykutaj kanman chayqa, mana khuyakuychu kanman. Uj jinamantaqa ruwaypis manaña ruwaychu kanman.]

7Chantá imatajri? Israelitasqa imatachus mask'asqankuta mana tarerqankuchu. Diospa ajllasqasnintaj tarerqanku. Wajkunataj sonqonkuta rumiyacherqanku. 8Escribisqa kasqanman jina, Dios paykunaj yuyayninkuta pejtorqa; qorqataj mana rikoj ñawista, mana uyarej ningrista ima kunan p'unchaykama. 9Davidpis nin: Qaraku mikhuyninkupipis paykunapaj tojlla kachun, ch'ipataj chaypi misk'akunankupaj, jasut'isqastaj kanankupaj. 10Ñawisninkupipis laqhayachunku ama rikunankupaj, jinallataj wawasninkupis k'uruyachunku wiñaypaj.

Gentilespa salvacionnin

11Kayta nini: Israelitasqa urmanankupajchu misk'arqanku? Mana jinachu, astawanqa paykunaj juchankurayku salvacionqa gentilesman jamorqa, israelitasta moq'echinampaj. 12Juchachakusqankuchus kay pachaj allinnimpaj, urmasqankupis gentilespa allinnimpaj kanman chayqa, may jina allinrajchus kanqa tukuy judíos Diosman kutirisqankoqa.

13Qankunaman, gentiles, parlaykichej, gentilesman Dios kachamuwasqanrayku. Chayrayku llank'ayniytaqa allimpaj qhawachini. 14Ichachus ajinapi kallpachayman yawarniymanta kajkunata, paykunapis salvakuyta munanankupaj, paykunamanta wakillantapis salvanaypaj. 15T'aqasqa kasqankuchus, runakunapaj Dioswan allinyakuy kanman chayqa, imaynataj kanqa Diosman kutirikuyri. Manachu chayqa wañusqamantaña kausarimuy kanman? 16Sichus ñaupajta llojsimoj t'antas llimphus kanku chayqa, Ajinallataj tukuynin masapis llimphu. Ajinallataj sichus sach'aj saphisnin llimphus kanku chayqa, tukuynin ramasnimpis llimphusllataj kanku.

17Wakin judiosqa, olivo sach'aj ramasnin jina p'akirasqas karqanku. Qanqa monte olivo kashaspa, chay p'akirasqa palqasman t'inkisqa karqanki. Chaynejta cheqa olivoj saphinmanta, qhapaj kausayninmantawan kausayta paykunawan khuska ch'onqanaykipaj. 18Kunanqa ama runaykachaychu palqaspa contranta aswan allin kasqaykita. Sichus qan yuyakunki paykunamanta aswan allin kasqaykita chayqa, yachay saphita mana qanchu kausachinki, astawanqa saphi qanta kausachisunki.

19Manachayqa ninkichari, wakin palqas k'uturasqas kasqanku, chay olivoman t'inkisqa kanaypaj. 20Arí, paykunaqa mana creesqankurayku p'akirasqas karqanku, qanrí fenejta sayashanki. Amaña jatunchakuychu, astawanqa manchachikuy. 21Sichus judíos kikin olivoj ramasnin kashajtinku, Dios paykunaj juchasninkuta mana pampacharqachu chayqa, manallataj qampa juchasniykitapis pampachanqachu. 22Qhawariy ari, Diospa k'acha kayninta, phiña kaynintawan; urmajkunapaj phiñakuyninta rikucherqa, qampajtaj khuyakuyninta. Sichus qan chay khuyakuypi mana allintachu sayanki chayqa, qampis k'utusqallataj kanki. 23Waj jinamantaqa sichus judiospis creenqanku chayqa, paykunapis watejmanta olivos sach'ankuman t'inkisqas kanqanku, Diosqa atiyniyoj ujtawan paykunata t'inkinampaj. 24Sichus qanqa monte olivomanta k'utusqa karqanki, mana judío kaspalla chayqa, allin olivoman t'inkisqa kanki. Imaraykutaj chantá judiosqa allin olivoj ramasnin kashaspa, kikin olivonkuman mana watejmanta t'inkisqas kankumanchu?

Israel kutiriponqa Diosman

25Hermanos, kay pakasqa yachaytaqa rejsinaykichejta munani, ama yachaysapas kasqaykichejta yuyakunaykichejpaj. Wakin israelitaspa sonqon rumiyarqa gentilespa salvacionnin junt'akunankama. 26Chayrayku tukuy Israel ayllu salvasqa kanqa, imaynachus escribisqa kasqanman jina: Sionmanta uj kacharichej jamonqa, Jacobpa mirayninmantataj mana allin kajta karunchenqa. 27Kay kanqa paykunawan tratoyqa, maypachachus juchasninkuta paykunamanta qhechusaj chaypacha.

28Paykunaqa qankunarayku evangelio jawa enemigos kanku. Ajllasqas kasqankuman jinataj munasqas kanku ñaupa tatasrayku. 29Diospa qosqasnenqa, wajyaynimpis mana qhechukuyniyojchu. 30Qankunapis ñaupaj p'unchaykunapeqa Diosta mana kasojchu kankichej; kunanrí khuyakuyta tarinkichejña judíos mana kasukusqankurayku. 31Ajinallataj judiospis mana kasukorqankuchu, qankunaman khuyakuy qosqa kasqanrayku, paykunapis khuyakuyta tarinankupaj. 32Dios tukuyta mana kasukuypi jap'erqa, tukuyman khuyakuyninta chayachinampaj.

33May jina jatumpunichus Diospa qhapaj kaynin, yachaynin, rejsiynimpis. Mana yachay atina yuyasqampis, jinallataj ñankunasnimpis. 34Pitaj, Diospa imatachus yuyasqanta rejserqa? Chayrí, pitaj Diosta yuyaycharqa? 35Chayri, pitaj imatapis Diosman ñaupajta jaywarqa, chaymantataj pagota jap'inampaj? 36Tukuy ima paypata, paynejta, paypajtaj kanku. Chayrayku pay yupaychasqa kachun wiñaypa wiñaynimpaj. Amén.

Currently Selected:

ROMANOS 11: QCHSB

Highlight

Copy

Compare