APOCALIPSIS 1

Jesucristoj sut'inchaynin

1Jesucristoj sut'inchasqan, mayqentachus Dios payman qorqa, kamachisninman rejsichinampaj, imaschus usqhayta ruwakunankuta. Chaykunamantaqa yachacherqa kamachin Juanman, angelnejta. 2Juanqa willarqa chay tukuy imata rikusqanmanta, Diospa palabranmanta, Jesucristoj willasqanmantawan.

3Kusikuyniyojmin pichus kay sut'inchaypa palabrasninta leejqa, uyarejkunapis. Ajinallatataj pikunachus chaypi escribisqa kajkunata waqaychanku; chay p'unchayqa qayllapiña kashanku.

Juan napaykuna qanchis iglesiasman

4-5Noqa, Juan, escribimuni Asiapi kaj qanchis iglesiasman: Khuyakuy, sonqo tiyasqa kaytaj qankunawan kachun, pimantachus kunan kashan, karqataj, jamonqataj chaymanta; qanchis espiritusmantawan, pikunachus tronompa ñaupaqempi kashan, chaykunamanta; Jesucristomantapis, pichus sumaj testigo, junt'ajtaj, wañusqakunamanta kuraj kaj, kay mundopi kaj reyespa kamachejnintaj. Payqa munakuwarqanchej, mayllawarqanchejtaj juchasninchejmanta yawarninwan. 6Cristoqa reyesta, sacerdotestataj kamachimpaj Dios Tatampaj churawarqanchej. Payman janaj pacha k'anchay, atiytaj, wiñay wiñaypaj kachun. Amén. 7Qhawaychej, Cristo phuyuswan jamushan, tukuy ñawitaj payta rikonqa, jinallataj payta t'ojsejkunapis; tukuy ayllustaj paymanta manchayta waqanqanku. Arí. Amén.

8Noqa kani Alfa Omegataj, nin Señor Dios Tukuy Atiyniyoj, pichus kunan kashan, karqataj, jamonqataj.

Jesucristoj janaj pacha k'anchaynin

9Noqa, Juan, hermanoykichej, qankunawan khuska llakiypi, Jesucristoj reinompi, pacienciampitaj chayaqeyoj kani. Patmos nisqa churupi kasharqani Diospa palabranmanta, Jesucristomantawan willasqayrayku. 10Uj kuti Señorpa p'unchaynimpi, Espíritoj atiyninwan kasharqani, qhepaypitaj uj sinch'ita parlamojta, trompetaj waqayninta jina uyarerqani. 11Nerqataj: Imatachus rikusqaykita uj libropi Escribiy, Asiapi kaj chay qanchis iglesiasmantaj apachiy: Efesoman, Esmirnaman, Pergamoman, Tiatiraman, Sardisman, Filadelfiaman, Laodiceaman ima.

12Parlamuwajta rikunaypaj kutirikorqani; kutirikuspataj, qanchis qori k'anchachinasta rikorqani. 13Chay qanchis k'anchachinas chaupimpitaj uj runata jina rikorqani, qhoysu p'achayojta, pechompitaj qori chumpiwan chumpisqata. 14Umantaj, chujchasninwan yuraj millma jina yuraj karqa, rit'i jina; ñawisnintaj nina larway jina. 15Chakisnintaj llusk'achasqa lliphipej bronceman rijch'akorqanku, k'ajashaj hornopi jina; parlasqampis ashkha yakuspa sonasqanman jina. 16Paña makimpitaj qanchis qoyllurkunata jap'isharqa; siminmantataj iskay filoyoj espada llojsimusharqa; uyantaj karqa inti sinch'ita lliphipishaj jina.

17Payta rikuspataj, wañusqa jina chakisninman urmarqani. Paytaj makisninta churaykuwarqa, nispa: Ama mancharikuychu. Noqa kani ñaupaj kaj, qhepa kajtaj. 18Noqa kani kausaj, wañusqataj karqani, kunantaj wiñay wiñaypaj kausashani. Wañuypa llavesnintapis, infiernoj llavesnintawan noqa jap'ini. 19Escribiy ari rikusqaykita kunan kajkunamanta, qhepa kajkunamantapis. 20Pakasqa yachacheyqa chay qanchis qoyllurkunamanta, paña makiypi rikusqayki chay qanchis k'anchachinasmantawanqa, kay jina: Qanchis qoyllurkunaqa, qanchis iglesiaspa angelesnin; qanchis k'anchachinas rikusqaykitaj, qanchis iglesias kanku.

Currently Selected:

APOCALIPSIS 1: QCHSB

Highlight

Copy

Compare