SAN MARCOS 4

Tarpoj runa

(Mt 13.1-9; Lc 8.4-8)

1Ujtawan Jesús yachachiyta qallarerqa, Galilea qocha cantopi. Chaymantaj ashkha runa tantakamorqa. Chayraykutaj, Jesús boteman yaykuspa tiyaykukorqa; runastaj qocha cantopi kasharqanku. 2Jesustaj tukuy imata rijch'anachinaswan yachacherqa.

Yachachiynimpitaj paykunaman nisharqa: 3Kayta uyariychej. Uj runa tarpoj llojserqa. 4Jallp'aman mujuta qhallashajtintaj, wakin muju ñanman urmarqa; p'isqostaj jamuspa mikhukaporqanku. 5Wakin mujutaj urmarqa rumirara pisi jallp'ayojman; mana ukhu jallp'ayoj kasqanrayku, mujoqa usqhayllata p'utumorqa. 6Intitaj llojsimuspa putumoj mujuta qawirparicherqa; mana ukhupi saphiyoj kaspataj ch'akiporqa. 7Wakin mujutaj khishkas chaupiman urmarqa; khishkas wiñaykamuspataj wiñashajta k'irincharqanku; chayrayku mana poqorqachu. 8Wakin mujutajrí, sumaj jallp'aman urmarqa; p'utumuspataj sumajta wiñarqa poqonankama. Poqoynintaj kay jina karqa: Wakin muju kinsa chunkata poqorqa, uj mujullamanta; wakintaj sojta chunkata; wakintajrí pachajta poqorqa.

9Chantá nerqa: Pillapis ningriyojqa uyarichun.

Imapajtaj rijch'anachinasri?

(Mt 13.10-17; Lc 8.9-10)

10Jesús sapallan kashajtin, chay qayllapi kajkuna, chunka iskayniyoj yachachisqasnin ima payman chimpaykuspa, taporqanku chay rijch'anachinamanta, imatachus niyta munasqanta. 11Jesustaj kuticherqa: Qankunaqa rejsinkichejña chay Diospa pakasqa reinonmanta. Jawapi kaj runasmanrí, rijch'anachinaswan yachachina tiyan. 12Chayrayku qhawashaspapis mana rikunkuchu; uyarishaspapis nillataj entiendeyta atinkuchu, chay jawa, ama Diosman kutirinankupaj, nitaj juchasninkupis pampachasqa kanampaj.

Jesús sut'inchan tarpoj runamanta

(Mt 13.18-23; Lc 8.11-15)

13Chaymantataj Jesús paykunata taporqa: Manachu yachankichej kay rijch'anachinamanta? Imaynamantataj chantá yachawajchej chay waj rijch'anachinasmantari? 14Mujuta tarpojqa, Diospa palabranta tarpojmin. 15Wakin runasqa kanku ñannejman muju tarpusqa jina. Paykunaqa uyarinku evangeliota, Satanastaj jamuytawan, sonqompi imachus tarpusqa kajta qhechun. 16Ajinallataj wakenqa kanku rumirara jallp'aman urmaj muju jina. Paykunaqa evangeliota uyariytawankama, kikimpacha kusiywan jap'inku. 17Paykunaqa, mana allin saphichasqa kaspa, mana unayta kayta atinkuchu; Diospa palabranraykutaj llakiy, chayrí chejniy jamojtin paykunaqa urmanku. 18Wakin runastaj, khishkas chaupiman t'akakoj muju jina kanku. Paykunaqa Diospa palabranta uyarinku. 19Chantá kay mundoj imasnimpi yuyaykuna, qhapajyayta munapayay, tukuy laya sajra imaspi yuyaykuna ima, runaj sonqonman yaykuspa Diospa palabranta k'irinchanku, manataj poqojta saqenkuchu. 20Wakin runastajrí kanku, sumaj jallp'api tarpusqa muju jina. Paykunaqa Diospa palabranta uyarispa sonqonkupi jallch'anku; chaymantataj sumaj poqoykunata qonku. Ujkuna uj mujullamanta kinsa chunkata poqonku; wajkunataj sojta chunkata; wajkunatajrí pachajta poqonku uj mujullamanta.

K'anchanamanta

(Lc 8.16-18)

21Chaymanta Jesús nillarqataj: Pillapis k'anchanata jap'ichispaqa, mana wich'i ukhumanchu pakaykun; nitaj cama uramampis churaykunchu. K'anchanataqa patamampuni churana k'anchanampaj. 22Imallapis pakaypi kajqa, sut'inchakonqa; jinallataj mana ima pakasqapis kanmanchu mana sut'inchakojqa. 23Chayrayku ningriyoj kajqa uyarichun.

24Jesús nillarqataj: Imatachus uyarisqaykichejta allinta uyariychej. Imaynatachá runa masiykichejta juzgankichej, kikillantataj Diospis juzgasonqachej. Qankuna uyarejkunataqa, aswan sinch'itaraj juzgasonqachej. 25Kapuyniyojmanqa astawanraj qosqa kanqa; mana kapuyniyojmantataj pisi kapuynimpis qhechusqa kanqa.

Wiñaj muju

26Jesús nillarqataj: Diospa reinonqa rijch'akun jallp'aman mujuta t'akaj runaman. 27Payqa puñun, sayarintaj; chaykamataj mujoqa tuta p'unchay p'utumuspa wiñan, mana paypa yachasqallan. 28Jallp'aqa kikinllamanta ñaupajta p'utumoj yurata wiñachin, qhepanta espigachin, chantá sumaj granota espigapi poqochin. 29Trigo sumaj poqosqaña kajtintaj, runaqa ruthuyta qallarin, imaraykuchus ruthuna p'unchay chayamunña.

Mostaza mujumanta

(Mt 13.31-32; Lc 13.18-19)

30Chaymanta Jesús nillarqataj: Diospa reinonta, imamantaj rijch'achisunmanri? Ima sut'inchanawantaj yachachisunmanri? 31Diospa reinonqa rijch'akun mostaza mujuman. Chay mujoqa jallp'api tarpukoj mujusmanta nisqaqa aswan juch'uymin. 32Tarpusqaña kaspa wiñamun tukuy qhorasta atipanankama. Palqasnintaj jatuchajta wiñanku; llanthusninkupitaj p'isqospis thapachakunku.

Jesusqa rijch'anachinaswan yachachej

(Mt 13.34-35)

33Kay jina rijch'anachinaswan paykunaman Jesusqa willaj evangeliomanta, maychus uyariyta atisqankuman jina. 34Runasman Jesús yachachej rijch'anachinaswampuni; yachachisqasninmantaj sapankupi sut'inchaj tukuy imamanta.

Jesús thañichin wayrata phiña qochatawan

(Mt 8.23-27; Lc 8.22-25)

35Chay día ch'isiyashajtinña, Jesús paykunaman nerqa: Jaku rinachej qocha chimpaman.

36Runasta kachapuspataj, Jesusta boteman pusaykorqanku; chaypitaj waj botes kallarqataj. 37Chantá, manchay jatun wayra oqharikorqa, yakupis qhollchoqeyaspa boteman wajtakamorqa. Chayrayku boteqa chinkaykusharqaña. 38Botepitaj qhepanejpi Jesús puñusharqa, umanta saunapi atiykukuspa. Yachachisqasnintaj payta rijch'arichispa nerqanku: Maestro! Manachu noqaykumanta dakunki? Yakuman chinkaykushanchejña!

39Jesustaj jatarimuytawan wayrata k'amerqa; qochatapis nerqa: Ch'in kay! Sayay!

Wayrataj thañerqa, jatun samaytaj karqa. 40Paykunamantaj nerqa: Imaraykutaj kay jinatapuni mancharinkichejri? Manachu feniykichej tiyan?

41Paykunaqa manchariywan t'ukusharqanku, ninakusharqankutaj: Pitaj kay runari? Wayrapis, qochapis, payta kasunku!

Currently Selected:

SAN MARCOS 4: QCHSB

Highlight

Copy

Compare