SAN MATEO 6

Allin ruwanasmanta

1Ama runaspa ñaupaqellampeqa cheqa kajta ruwaychejchu, paykunawan rikuchikunallaykichejpajqa; ajinata ruwajtiykichejqa, mana t'inkaykichej kanqachu, janaj pachapi kashaj Tataykichejpa ñaupaqempi.

2Chayrayku qolqeykita qospaqa, ama putututa ñaupaqeykipi waqachiychu; imaynatachus puraj uya runas, sinagogaspi, callespi ima, ruwanku runakunawan allinta qhawachikunankurayku, jinataqa. Cheqamanta niykichej, ñapis paykunaqa t'inkayojña kanku. 3Chayrayku mana kapuyniyojkunaman imallatapis qoshajtiyki, ama yachachunchu lloq'e makiyki, imatachus paña makiyki ruwasqanta. 4Wajchasta pakayllamanta khuyay. Pakaypi khuyasqaykita rikusoj Tataykitaj t'inkachipusonqa.

Jesús yachachin Diosmanta mañakunata

(Lc 11.2-4)

5Diosmanta mañakuspaqa, ama puraj uyas jina kaychejchu. Paykunaqa sayaykukuspa Diosmanta mañakunku, sinagogaspi, plaza esquinaspi ima, runaswan rikuchikunankupaj. Cheqamanta niykichej, ñapis paykunaqa t'inkayojña kanku. 6Qampis Diosmanta mañakunaykipajqa, cuartoykiman yaykuy; wasi punkuykita wisq'aykamuspataj, pakaypi, Tataykimanta mañakuy. Pakaypi rikoj Tataykitaj t'inkaykita qopusonqa.

7Diosmanta mañakuspaqa, ama ashkhata parlaychejchu Diosta mana rejsejkuna jinaqa. Paykunaqa yuyanku uyarichikunankuta ashkhata parlasqankurayku. 8Ama qankunaqa paykunaman rijch'akuychejchu. Tataykichejqa yachanña imaykichejchus pisisqanta, manaraj paymanta mañakushajtiykichej. 9Chayrayku qankunaqa, kay jinata mañakunkichej: Janaj pachapi kashaj Tatayku, sutiyki jatunchasqa kachun. 10Reinoyki jamuchun, munayniyki ruwasqa kachun; imaynatachus janaj pachapi, ajinallatataj kay pachapipis. 11Sapa día t'antaykuta kunan qopuwayku. 12Juchasniykuta pampachapuwayku, imaynatachus noqaykupis juchallikuwajniykuta perdonapuyku ajinata. 13Amataj saqeychu juchaman urmanaykuta; astawampis, jark'awayku sajramanta; [imaraykuchus, qampatamin reino, atiy, janaj pacha k'anchay ima; wiñaypa wiñayninkama. Amén.]

14Chayrayku, runakuna qankunapaj juchallisqankuta perdonankichej chayqa; ajinallatataj, janaj pachapi kashaj Tataykichejpis juchasniykichejta pampachanqa. 15Runakunaj juchallisqankutachus mana perdonankichej chayqa, Dios Tataykichejpis manallataj juchasniykichejta pampachanqachu.

Ayunomanta

16Ayunaspaqa, ama llakisqas kaychejchu, puraj uyas jina; paykunaqa uyasninkuta uj jinayachinku, ayunasqankuta runaswan rikuchikunankupaj. Cheqamanta niykichej, ñapis paykunaqa t'inkayojña kanku. 17Qanrí, ayunaspaqa umaykita ñajch'akuy, uyaykitapis mayllakuy. 18Ama ayunasqaykita runas yachachunkuchu; pakaypi kashaj Tatallayki yachachun. Pakaypi rikoj Tataykitaj t'inkaykita qopusonqa.

Kapuyniykichej janaj pachapi kachun

(Lc 12.33-34)

19Ama kay mundopeqa qhapajyayta munaychejchu; kay mundopeqa thuta k'utun, tukuy imapis qorwariyapun, suwaspis perqasta jusk'uspa suwanku. 20Chayrayku, tukuy kapuyniykichejta janaj pachapaj tantaychej. Chaypi mana thuta ni ismuypis tukuchinchu, nitaj suwas kanchu jusk'uspa suwanankupaj. 21Maypichá kapuyniyki kashan, chayllapitaj sonqoykipis.

Ñaweqa cuerpoj k'anchaynin

(Lc 11.34-36)

22Ñaweqa cuerpoj k'anchaynin. Ñawiyki allin kajtenqa, tukuy cuerpoykipis k'anchaypi kanqa. 23Ñawiykitajchus mana allin kanman chayqa, tukuy cuerpoyki laqhapi rikhurenqa. Chay qampi kashaj k'anchaytajchus laqhayapunman chayqa, imayna yana laqhapunitaj kanman chay laqhari!

Diostachu, chayrí qolqetachu?

(Lc 16.13)

24Mana pipis iskay patronespa kamachin kayta atinchu, imaraykuchus ujninta chejnenqa, ujnintataj munakonqa; chayrí, ujninman kutikonqa, ujnintataj qhesachanqa. Mana atinkichejchu ujllapi k'umuykukuyta Diosman qolqemampis.

Dios khuyan wawasninta

(Lc 12.22-31)

25Chayrayku niykichej: Ama phutikuychejchu kausayniykichejmanta, mikhunaykichejmanta, ujyanaykichejmanta ima; nillataj phutikuychejchu imawanchus p'achallikunaykichejmantapis. Manachu kausayniykichejqa astawanraj mikhunamanta; cuerpoykichejpis astawanraj p'achamantaqa? 26Qhawariychej phawaykachaj p'isqosta; mana tarpunkuchu, nitaj ruthunkuchu; ni pirwaspipis waqaychankuchu. Janaj pachapi kashaj Tataykichej paykunataqa mikhuchin. Manachu qankunaqa, aswan munasqaraj kankichej p'isqosmanta nisqaqa? 27Mayqentaj qankunamanta, mashkhatapis unanchakuspa, atinman uj makillatawampis sayayninman yapaykuyta?

28Imaraykutaj p'achamanta llakikunkichejri? Qhawariychej campo lirio t'ikasta, imaynatachus wiñasqankuta. Paykunaqa mana llank'ankuchu, nitaj phushkankuchu. 29Cheqamanta niykichej, Salomompis, tukuy qhapaj atiynimpi, manapuni ujnin t'ika jinallapis p'achallikorqachu. 30Chay campo qhora, kunan p'unchay kashan, q'ayataj hornoman wijch'usqa; chay qhoratapis Diosqa k'achituta p'achallichin. Pisi feniyoj runas! Manachu qankunapajqa aswan sumajtaraj ruwanman? 31Chayrayku, ama phutikuychejchu: imatataj mikhusun, imatataj ujyasun; chayrí imawantaj p'achallikusun?, nispa. 32Diosta mana rejsej runasqa, kay imasllata anchata mask'anku. Janaj pacha Dios Tataykichejqa yachanña kay tukuy imamanta pisichikusqaykichejta. 33Ñaupajtaqa Diospa reinonta, cheqa kaynintawan mask'aychej; kay tukuy imatataj yapata jina Dios qosonqachej. 34Ama phutikuychejchu ari, q'aya p'unchaymanta; imaraykuchus, q'aya p'unchayqa, pay kikinmanta llakiyniyoj. Sapa p'unchaypata tiyan llakiynin.

Currently Selected:

SAN MATEO 6: QCHSB

Highlight

Copy

Compare