SAN MATEO 4

Supay tientan Jesusta

(Mr 1.12-13; Lc 4.1-13)

1Chaymanta, Santo Espíritu Jesusta pusarqa ch'innejman, payta supay probanampaj.

2Jesustaj tawa chunka p'unchayta, tawa chunka tutatawan, mana mikhusqa karqa, yarqhachikorqataj. 3Chaypacha, supay qayllaykorqa Jesusman tentayta munaspa, nerqataj: Diospa Churinchus kanki chayqa, niy kay rumista t'antaman tukunankuta.

4Jesustaj kutichispa nerqa: Escribisqa kashan: Mana t'antallawanchu runaqa kausanqa; astawanqa, Diospa siminmanta tukuy llojsimoj palabraswan kausanqa.

5Chaymanta, supayqa Jerusalén llajtamanñataj Jesusta pusarqa, temploj torrempitaj rikhuricherqa. 6Nerqataj: Diospa Churin kanki chayqa, uraman wijch'uykukuy, imaraykuchus escribisqa kashan: Dios angelesninta kachamusonqa makisninkuwan jap'isunankupaj, chakisniykita ama rumiman takakunaykipaj.

7Jesús nillarqataj: Escribisqallataj kashan: Señor Diosniykita ama tentankichu.

8Ujtawan supay pusarqa Jesusta jatun orqo pataman. Chaymantataj tukuy mundontimpi kaj llajtasta rikucherqa, paykunaj qhapaj kapuyninkutawan. 9Nerqataj Jesusman: Noqa kay tukuy imata qosqayki, qonqorikuspachus k'umuykukuwanki chayqa.

10Chaypacha Jesús kuticherqa: Riy kaymanta Satanás! Escribisqa kashan: Señor Diosniykita yupaychanki, pay sapallantataj sirvinki.

11Chantá supay saqeporqa Jesusta, angelestaj jamuspa mikhuyta jaywarqanku.

Jesús Galileapi predicayta qallarin

(Mr 1.14-15; Lc 4.14-15)

12Jesustaj, Juan Bautista preso kasqanta uyarispa, Galileaman rerqa. 13Nazaretta saqespa, Capernaum llajtaman tiyakoj riporqa. Chay llajtataj Galilea qocha cantopi karqa, Zabulón jallp'asnejpi. 14Kaytaj karqa, profeta Isaiaspa nisqan junt'akunampaj. 15Zabulompa, Neftalimpa jallp'asnin, mar qochaman rej ñan, Jordán mayoj chimpan; Galilea jallp'a, maypichus gentiles tiyakunku. 16Laqhapi tiyakoj runas rikorqanku uj jatun k'anchayta. Wañuy llanthu cheqapi tiyakojkunamampis uj k'anchay paqarimorqa.

17Chaymantapacha, Jesús qallarerqa predicayta: Diosman kutirikuychej, imaraykuchus janaj pacha reinoqa qayllaykamunña.

Jesús wajyan tawa challwirista

(Mr 1.16-20; Lc 5.1-11)

18Jesús Galilea qocha cantonta rishaspa, iskay wauqesta rikorqa. Ujnin karqa Simón, Pedro sutiyoj; ujnintaj Andrés. Paykuna challwiris karqanku; chayrayku challwa jap'ina ch'ipata jatun qochaman wijch'uykusharqanku. 19Nerqataj Jesús paykunaman: Jamuychej qhepayta, noqataj runa jap'ej challwirista ruwasqaykichej.

20Paykunataj chay kikimpacha ch'ipasta saqerpayaspa, Jesuspa qhepanta rerqanku.

21Astawan ñaupajman rispataj, iskay wauqestawan rikullarqataj: Santiagota, Juantawan. Paykunaqa karqanku Zebedeoj churisnin. Botepi kasharqanku Zebedeo tatankuwan, challwa jap'ina ch'ipasninkuta t'irispa. Paykunatapis Jesusqa wajyallarqataj. 22Chay kikimpacha, boteta, tatankutawan saqerpayaspa, Jesuspa qhepanta rillarqankutaj.

Jesús yachachin ashkha runaman

(Lc 6.17-19)

23Jesús muyumorqa tukuynin Galileata; yachachispa sinagogasninkupi, predicaspa reinoj evangelionta. Llajtapitaj runasta thañichej, tukuy laya onqoykunamanta, nanaykunamantawan. 24Chantá tukuy Siria jallp'apitaj Jesús atiyniyoj kasqanta uyarerqanku, pusamorqankutaj tukuy laya onqoykunawan, ñak'ariykunawan, nanaykunawan ima llakejkunata; supayniyojkunata, t'uku onqoyniyojkunata, suchusta ima. Paykunatataj Jesús thañicherqa.

25Ashkha runastaj Jesusta qhaterqanku: Galileamanta, Decapolismanta, Jerusalenmanta, Judeamanta, Jordán mayoj chimpanmanta ima.

Currently Selected:

SAN MATEO 4: QCHSB

Highlight

Copy

Compare