SAN MATEO 27

Jesusta Pilatoman pusanku

(Mr 15.1; Lc 23.1-2; Jn 18.28-32)

1Sut'iyamojtintaj, jatun sacerdotes, judiospa kuraj runasnin ima, juntapi tantakuspa yuyaychanakorqanku Jesusta wañuchinankupaj. 2Jesusta watasqata pusaspataj, kamachej Pilatoman entregarqanku.

Judaspa wañuynin

3Chantá, jap'ichej Judastaj, Jesusta wañunampaj juchachasqata rikuspa, mayta sonqonta nanachikorqa. Kinsa chunka qolqetataj kutichiporqa jatun sacerdotesman, kuraj runasman ima. 4Nerqataj: Juchallini mana juchayojta wañuyman entregaspa.

Paykunataj nerqanku: Ima ruwanayku tiyan chaywanri? Qan chaytaqa imanaypis.

5Judastaj, temploman qolqeta qhallaykuspa llojsiporqa. Riytawantaj sipikamorqa.

6Kuraj sacerdotestaj, qolqeta oqharispa, nerqanku: Kay qolqetaqa mana atisunmanchu ofrenda qolqetawan khuska waqaychayta; imaraykuchus chay qolqeqa yawarpa precion.

7Paykunataj parlanakuytawan, manka t'uru jallp'ata chay qolqewan ranterqanku, waj llajtayojkunata chayman p'ampanankupaj. 8Chayrayku chay jallp'aqa kunankama, Yawar jallp'a sutiyoj. 9Ajinata junt'akorqa, profeta Jeremiaspa nisqan: Kinsa chunka qolqeta jap'erqanku; chay preciotaqa payman wakin Israelpa wawasnin churarqanku. 10Chay qolqewantaj, manka t'uru jallp'ata ranterqanku, Señor kamachiwasqanman jina.

Pilato Jesusta tapun

(Mr 15.2-5; Lc 23.3-5; Jn 18.33-38)

11Jesusta Pilatoj ñaupaqenman pusarqanku, paytaj taporqa: Qanchu judiospa reynin kanki?, nispa. Jesustaj kuticherqa: Qan chayta ninki.

12Jatun sacerdotes, judiospa kurajkunasninwan ch'ataykojtinku, Jesusqa mana imata kutichikorqachu. 13Chaymanta, Pilato nillarqataj: Manachu uyarinki, qampa contraykita, tukuy imaymanata nisqankuta?

14Jesustaj, mana uj palabrallatapis kutichikorqachu; jinamantataj Pilatoqa mayta t'ukorqa.

Jesusta wañunampaj juchachanku

(Mr 15.6-20; Lc 23.13-25; Jn 18.38–19.16)

15Kuraj kamachej, sapa Pascuapi uj presota usunkuman jina kacharej, pitachus runakuna munaj kanku, chayta. 16Chaypachataj, uj sumaj rejsisqa runa, Barrabás sutiyoj, wisq'asqa kasharqa. 17Pilatotaj, tantasqa runasta taporqa: Pitataj munankichej kacharinayta: Barrabastachu, chayrí Jesustachu, Cristo nisqata?

18Pay yacharqa runas chhoqonakuspalla Jesusta wisq'achisqankuta.

19Pilato juzganampaj kashajtintaj, warmin nichimorqa: Ama imatapis ruwaychu chay cheqan kaj runawanqa. Payrayku kunan ch'isi millay mosqoyta mosqorqani, nispa.

20Kuraj sacerdotes, kuraj runakunawan, runasman yachaykucherqanku mañanankuta Barrabasta kacharichinampaj, Jesustataj wañuchinanta. 21Pilatotaj taporqa: Mayqentataj kacharinayta munankichej? Paykunataj, Barrabasta, nerqanku.

22Paytaj nerqa: Imanasajtaj Cristo nisqa Jesuswanri? Tukuyninkutaj qhaparerqanku, chakatasqa kachun, nispa.

23Pilato nillarqataj: Ima sajratataj ruwarqari?

Paykunataj, astawan sinch'ita qhaparerqanku: Chakatasqa kachun, nispa.

24Pilatotaj, runasta mana atipayta aterqachu; astawanraj ch'ajwa jatarisharqa. Yakuta apachimuspataj, makisninta mayllakorqa, runakunaj ñaupaqempi, nispa: Mana noqaqa juchayojchu kani, kay cheqan runaj yawarninmanta; qankunallaña imatapis ruwaychej.

25Runastaj kuticherqanku: Yawarnin noqaykoj pataykupi, wawasniykojpiwan kachun.

26Chantá Pilatoqa Barrabasta kacharerqa. Jesustataj jasut'ichispa, chakatanankupaj pusacherqa.

27Chaymantataj, Pilatoj soldadosnin Jesusta pusarqanku pretorioman; paytataj muyuykorqanku. 28P'achasninta lluch'uspataj, uj puka p'achata churaykorqanku. 29Umanmantaj, uj simp'asqa khishka pilluta churaykorqanku; paña makinmantaj uj soqosota. Ñaupaqenman qonqoriykukuspataj, mayta asipayarqanku: Kausachun, judiospa reynin!, nispa.

30Payta thoqaykuspataj, soqosowan umampi wajtarqanku. 31Ajinata asipayaytawan, puka p'achata lluch'uspa, p'achanta churaykaporqanku. Chaymantataj, pusarqanku chakatanankupaj.

Jesusta cruzpi chakatanku

(Mr 15.21-32; Lc 23.26-43; Jn 19.17-27)

32Llojsishaspataj tinkorqanku, Cirene llajtayoj, Simón sutiyoj runawan; Jesuspa cruznintataj paywan apacherqanku.

33Chayarqankutaj Gólgota nisqa orqoman; chay niyta munan: T'ojlu pata. 34Chaypitaj, vinagreta jayaq'etawan chajruykuspa jaywarqanku; Jesustaj llamirispa mana ujyayta munarqachu.

35Cruzpi chakataytawantaj, soldadosqa suerteta choqaspa, Jesuspa p'achasninta chayachinakorqanku, profetaj nisqanman jina: P'achasniyta chayachinakorqanku, paykuna ukhu suerteta choqaspa. 36Paykunataj chaypi tiyaspa qhawasharqanku. 37Cruzpi, uman patanejman uj escribisqata churarqanku, imamantachus ch'atasqa kasqanta: Kayqa Jesús, Judiospa Reynin.

38Chaypacha, paytawan khuska chakatarqanku iskay suwasta; ujninta pañanman, ujnintataj lloq'enman. 39Chaynejta purejkunataj, umankuta khiwirispa, mayta paypaj rimarqanku. 40Nerqankutaj: Qan templota urmachej, kinsa diapitaj sayarichej; qan kikiykita kacharichikuy. Diospa Churin kanki chayqa, uraykamuy chay cruzmanta. 41-42Ajinallatataj, kuraj sacerdotespis asipayarqanku, leymanta yachachejkunawan, fariseoswan, kuraj runaswan ima, nispa: Wajkunata salvarqa, pay kikintaj mana salvakuyta atinchu. Israelpa Reynin chayqa; kunampacha cruzmanta uraykamuchun, paypitaj creesunchej. 43Diosman atienekorqa, kunanqa Dios kacharichichun ari, munakun chayqa, imaraykuchus Diospa Churin kani nerqa.

44Kikillantataj k'amerqanku, paywan khuska chakatasqa kasharqanku chay suwaspis.

Jesuspa wañuynin

(Mr 15.33-41; Lc 23.44-49; Jn 19.28-30)

45Tukuynin jallp'apitaj laqhayaykorqa, chaupi p'unchaymanta samay horakama. 46Chaypacha Jesusqa sinch'ita qhaparerqa: Elí, Elí, lama sabactani?, nispa. Kayrí niyta munan: Diosníy, Diosníy, imaraykutaj saqerpariwankiri?

47Wakin chaypi kashajkunataj, chayta uyarispa nisharqanku: Kay runaqa Eliasta wajyashan, nispa.

48Ujnintaj usqhay usqhayta phinkispa, soqosoman esponjata wataykuytawan, vinagreman chhapuykuspa jaywarqa ujyanampaj. 49Wakintaj nerqanku: Saqey, qhawasunchej, ichachus Elías jamuspa kacharichenqa.

50Ujtawan sinch'ita qhaparispa, Jesús wañuporqa. 51Chay kikimpachataj, temploj cortinan iskayman llik'ikorqa patamanta urakama. Jallp'ataj kharkatiterqa, chhankaspis phatararqanku. 52Sepulturas kicharikorqanku, Diospa ashkha ajllasqasnintaj wañusqasmanta kausarimorqanku. 53Paykunataj sepulturasmanta llojsispa, Jesús kausarimusqanmantaña, Jerusalén llajtaman yaykorqanku; chaypitaj ashkha runasman rikhurerqanku.

54Capitantaj soldadosninwan Jesusta qhawasharqanku; jallp'ata ikhakojta, waj imastawan rikuspa maytapuni mancharerqanku, nerqankutaj: Cheqamanta kay runaqa Diospa Churin karqa, nispa.

55Chaypitaj ashkha warmis kasharqanku karullamanta qhawaspa; paykunaqa jamorqanku Galileamantapacha Jesusta yanapaspa. 56Chay warmis ukhupitaj kasharqanku: María Magdalena; Santiagojta, Josejpatawan mamanku María; Zebedeoj wawasnimpa mamanku ima.

Jesusta p'ampanku

(Mr 15.42-47; Lc 23.50-56; Jn 19.38-42)

57Ch'isiyaykushajtintaj jamorqa uj qhapaj runa José sutiyoj, Arimatea llajtayoj. Paypis Jesuspa yachachisqallantaj karqa. 58Paytaj, Pilatoman qayllaykuspa Jesuspa ayanta mañarqa. Pilatotaj kamacherqa ayata qonankuta. 59Josetaj, ayata oqhariytawan uj yuraj llimphu qhatanawan mayt'uykorqa. 60Chaymantataj, mosoj sepulturanman churaykorqa; chaytaqa pay kikimpaj chhankapi ruwachikorqa. Jatun rumiwan punkunta wisq'aykuspataj riporqa. 61Sepulturaj ñaupaqempitaj tiyasharqanku María Magdalena, waj Mariawan ima.

Sepulturata qhawajkuna

62Q'ayantintaj, Pascuapaj wakichina p'unchaypi kuraj sacerdotes, fariseos ima Pilatojman rerqanku. 63Paymantaj nerqanku: Señor, yuyariyku jaqay ch'auka runa kausashaspallaraj nisqanta: Kinsa p'unchaymanta kausarimusaj. 64Chayrayku kamachiy ari, kinsa p'unchaykama allinta sepulturata qhawanankuta, ama yachachisqasnin jamuspa ayanta suwanankupaj. Chantá runakunaman nenqanku: Wañusqakunamanta kausarimun, nispa. Jinapeqa, kay qhepa pantay astawan mana allinchu kanqa, ñaupajmanta nisqaqa.

65Pilatotaj nerqa paykunaman: Soldados qhawanankupaj tiyapusunkichejña, rispa astawan atisqaykichejman jina, jallch'aykamuychej.

66Paykunataj rispa sepulturata allinta jallch'aykamorqanku, rumita sellaykuspataj, soldadosta qhawajta saqerqanku.

Currently Selected:

SAN MATEO 27: QCHSB

Highlight

Copy

Compare