SAN MATEO 17

Jesús waj jinaman tukun

(Mr 9.2-13; Lc 9.28-36)

1Sojta p'unchay qhepatataj Jesús wajyarqa Pedrota, Santiagota wauqen Juantawan. Paykunata pusariykukuspataj, uj jatun orqoman wicharerqa. 2Paykunaj ñaupaqenkupitaj Jesusqa uj jinaman tukorqa. Uyanqa inti jina k'ancharerqa; p'achantaj yurajman tukorqa, k'anchay jina. 3Chay kikimpachataj Moisés, Elías ima, paykunaman rikhurimuspa Jesuswan parlasharqanku. 4Pedrotaj Jesusman nerqa: Señor, walej kanman kaypi qhepakapunanchej! Munajtiykeqa kinsa ch'ujllasta kaypi ruwasqayku: Ujta qampaj, ujta Moisespaj, ujtataj Eliaspaj.

5Ajinata Pedro parlashajtillanraj, ujllata k'ancharishaj phuyu paykunata pakaykorqa. Chay phuyu ukhumantataj uj voz nimorqa: Kaymin munasqa Chureyqa, paywan ancha kusisqa kani. Payta uyariychej.

6Yachachisqasnintaj kayta uyarispa, pampakama k'umuykukorqanku; imaraykuchus sinch'itapuni mancharikorqanku. 7Jesustaj qayllaykuspa paykunata llankharerqa, nerqataj: Sayariychej, ama mancharikuychejchu.

8Qhawarispataj Jesusllata rikorqanku, manataj pitapis.

9Orqomanta uraykamuspataj, Jesús kamacherqa: Kay rikusqaykichejta ama pimampis willankichejchu, Runaj Churin wañusqasmanta kausarimunankama, nispa. 10Yachachisqasnintaj Jesusta taporqanku: Imaraykutaj leymanta yachachejkuna ninku, Eliasraj ñaupajta jamunantari?

11Paytaj kuticherqa: Arí, cheqatapuni Eliasraj ñaupajta jamonqa; tukuy imatapis maychus kajman churanqa. 12Noqa niykichej, Eliasqa jamorqaña. Mana rejsispataj, munayninkuman jina payta ñak'aricherqanku. Ajinallatataj Runaj Churintapis ñak'arichenqanku.

13Chaypacha yachachisqasnenqa entienderqanku Jesusqa Juan Bautistamanta parlasqanta.

Jesús thañichin t'ukuyojta

(Mr 9.14-29; Lc 9.37-43)

14-15Ashkha runa kasharqa, chayman chayajtinkutaj, ujnin Jesusman qayllaykorqa, ñaupaqenman qonqoriykukuspataj, nerqa: Señor, wawayta khuyaripuway ari; imaraykuchus t'ukuyoj, anchatataj ñak'arichishan. Ashkha kutita ninaman urmaykun, yakumampis. 16Yachachisqasniykiman pusamorqani, manataj thañichiyta aterqankuchu.

17Jesustaj kutichispa, nerqa: Mana feniyoj sajra runaj miraynin! Mayk'ajkamataj qankunawan kasajri? Mayk'ajkamataj qankunawan pacienciakusajri? Pusamuychej kayman.

18Jesús payta k'amejtinkamataj, supayqa llojserqa paymanta. Chaymantapacha chay wawaqa thañikaporqa.

19Chaymantataj, yachachisqas Jesusman qayllaykuspa, sapallampi taporqanku: Imaraykutaj noqayku, supayta mana qharqoyta aterqaykuchu?

20Paytaj kuticherqa: Pisi feniykichejrayku. Cheqamanta niykichej, sichus mostaza muju chhikallampis feniykichej kanman chayqa, kay orqota niwajchej: Kaymanta jaqayman ithiriy, nispa; rinmantaj. Mana imapis qankunapaj kanmanchu mana atikojqa. [ 21Kay laya supaytaqa, Diosmanta mañakuspa, ayunaspataj qharqoyta atinchej.]

Jesús ujtawan willan wañunanmanta

(Mr 9.30-32; Lc 9.43-45)

22-23Jesúsqa Galileapi kashaspa, yachachisqasninman nerqa: Runaj Churinta enemigosnin runaswan jap'ichenqanku, wañuchenqankutaj. Kinsa p'unchaymantataj kausarimonqa.

Yachachisqasnintaj chayta uyarispa mayta llakikorqanku.

Impuestota qonamanta

24Capernaumman chayasqankutawantaj, Pedroman qayllaykorqanku iskay dracmasta cobrajkuna, nispa: Manachu Maestroykichejqa iskay dracma qolqeta paganqa?

25Pedrotaj kuticherqa: Arí, nispa.

Wasiman yaykushajtintaj, Jesús payman nerqapacha: Imaynataj rijch'asunki Simón? Kay mundopi reyesqa, pimantataj yanapata, chayrí impuestota mañanku, wawasninkumantachu, chayrí waj runasmantachu?

26Pedrotaj kuticherqa: Waj runasmanta cobranku.

Jesustaj nerqa: Arí, jina kajtenqa wawasninku mana impuestota pagankuchu. 27Chaywampis, ama rimanankupaj; qochaman rispa anzuelota choqamuy. Ñaupajta chhallmamoj challwatataj orqhoy, siminta kicharispataj tarinki uj estatero qolqeta; chaytataj qanmanta noqamantawan qomuy.

Currently Selected:

SAN MATEO 17: QCHSB

Highlight

Copy

Compare