SAN MATEO 14

Juan Bautistaj wañuynin

(Mr 6.14-29; Lc 9.7-9)

1Jaqay p'unchaypi, Galileapi kamachej Herodes, Jesuspa milagrosninmanta uyarerqa. 2Kamachisqasninmantaj nerqa: Chayqa Juan Bautista, wañusqasmanta kausarimun. Chayrayku payqa milagrosta ruwan.

3Herodesqa Juanta jap'icherqa, watachispataj carcelman wisq'aykucherqa Felipej wauqempa warmin Herodiasrayku. 4Juanqa Herodesman nerqa: Mana atinkichu warmiykipaj jap'ikapuyta.

5Chayrayku Herodesqa Juanta wañuchiyta munarqa. Runasta manchachikuspataj mana imanayta aterqachu, imaraykuchus tukuy runas yacharqanku payqa profeta kasqanta. 6Herodespa diachakumpi, Herodiaspa ususin tukorqa tukuy runaspa ñaupaqenkupi. Paytaj Herodesta mayta kusicherqa. 7Chayrayku Herodesqa juramentota ruwaspa nerqa: Imatachus mañakuwasqaykita qosqayki, nispa. 8Sipastaj mamampa yuyaychasqan kaspa, Herodesman nerqa: Juan Bautistaj umanta qoway kay pampa chuwapi.

9Rey Herodestaj chayta nejtinkama, jurasqanrayku llakikorqa. Chaypi kajkuna rikusqankuraykutaj, kamacherqa Juampa umanta qonankuta. 10Kamacherqataj carcelman rispa Juampa umanta qholumunankuta. 11Chaymantataj, Juampa umanta pampa chuwapi apamuspa sipasman jaywarqanku, paytaj mamanman jaywallarqataj.

12Chay qhepatataj, Juampa yachachisqasnin jamuspa ayata oqharikaporqanku; p'ampaykuspataj Jesusman willamorqanku.

Jesús phishqa waranqa runasman mikhuchin

(Mr 6.30-44; Lc 9.10-17; Jn 6.1-14)

13Jesustaj chayta uyarispa, jaqaymanta sapallan botepi ch'innejman rerqa. Runastaj risqanta yachaytawan, tukuy llajtasmanta chakipi rerqanku payta taripaj. 14Jesusqa botemanta llojsishaspa ashkha runata rikorqa. Paykunata khuyaspataj, onqosqasninkuta thañicherqa. 15Ch'isiyaykuytataj, yachachisqasnin payman qayllaykuspa nerqanku: Ch'impacha kaynejqa, astawantaj ch'isiyaykushanña. Chayrayku kachapullayña runasta, ranchosman rispa mikhunata rantikamunankupaj.

16Jesustaj paykunaman nerqa: Mana riponqankuchu, qankuna mikhunata qoychej.

17Paykunataj kuticherqanku: Kaypeqa phishqa t'antas, iskay challwasllawan kapuwayku.

18Jesustaj nerqa: Chaykunata kayman apamuychej.

19Runastataj kamacherqa ch'iki pasto pataman tiyarakunankuta. Chaymantataj phishqa t'antasta, iskay challwastawan oqharispa, janaj pachata qhawarispataj graciasta qorqa. T'antasta partispataj yachachisqasninman jaywarqa, paykunataj runasman jaywarqanku. 20Tukuyninkutaj mikhorqanku sajsakunankukama. T'anta puchojtaqa chunka iskayniyoj canastas junt'astaraj oqharerqanku. 21Mikhojkunaqa phishqa waranqa qharis karqanku, mana yupaspa warmista, nitaj wawasta.

Jesús yaku patata purin

(Mr 6.45-52; Jn 6.16-21)

22Chaypacha Jesús yachachisqasninta kamacherqa boteman wicharinankuta, ñaupashanankupaj qocha chimpaman runasta pay kacharpayanankama. 23Runasta kacharpayaspataj, sapallan orqoman wicharerqa Diosmanta mañakoj. Tutayaykuytataj pay sapan jaqaypi kasharqa. 24chaykamataj boteqa qocha chaupitaña risharqa. Yakutaj qhollchoqeyaspa, kayman jaqayman boteta apaykachasharqa, contrankupi sinch'ita wayramusqanrayku. 25Jesustaj sut'iyamuytaña, yaku patata purispa paykunaman jamorqa. 26Yachachisqasnintaj yaku patata purejta rikuspa mancharikorqanku, qhaparerqankutaj: Almaqa!, nispa.

27Kikimpachataj Jesús parlapayamuspa nerqa: Kallpachakuychej. Noqa kani, ama mancharikuychejchu!

28Pedrotaj kutichispa nerqa: Señor, qan kanki chayqa, niway kay yaku patata qanman jamunayta.

29Paytaj nerqa: Jamuy.

Pedrotaj, botemanta uraykuytawan, yaku patanta Jesusman risharqa. 30Sinch'i wayrata reparaspataj manchachikorqa; yakuman chinkaykoj jina kaspataj, qhaparispa nerqa: Señor, salvaway!

31Jesustaj usqhayta makinta aysarispa, payta jap'iykorqa nerqataj: Pisi feniyoj runa, imaraykutaj iskayrayankiri?

32Boteman wicharejtinkukamataj, wayraqa thañikaporqa. 33Botepi kajkunataj, Jesusman qayllaykuspa k'umuykukorqanku: Cheqamanta qanqa Diospa Churin kanki, nispa.

Genesaretpi Jesús onqosqasta thañichin

(Mr 6.53-56)

34Qocha chimpaman rispataj, Genesaret jallp'aman jamorqanku. 35Chay llajtayoj runastaj, Jesusta rejsiytawan tukuynejman willaracherqanku. Tukuy onqosqastataj payman apamorqanku. 36Paykuna Jesusmanta mañakorqanku, p'achampa cantollantapis onqosqas llankharinankuta. Tukuy llankharejkunataj thañikaporqanku.

Currently Selected:

SAN MATEO 14: QCHSB

Highlight

Copy

Compare