SAN MATEO 12

Yachachisqas trigo umasta pallanku

(Mr 2.23-28; Lc 6.1-5)

1Chaypacha Jesús, samakuna diapi trigo chajraspa chaupinta risharqa. Yachachisqasnintaj yarqhachikuspa qallarerqanku trigo umasta p'itiyta, mikhorqankutaj. 2Fariseostaj chayta rikuspa, Jesusman nerqanku: Qhaway yachachisqasniykita, samakuna diapi mana ruwanata ruwashanku.

3Jesustaj paykunaman nerqa: Manachu leerqankichej, uj kuti David yarqhachikuspa, paywan kajkunawan imatachus ruwasqanta? 4Diospa wasinman yaykuspa, Diosman jaywasqa t'antasta mikhorqa. Payqa mana mikhunanchu karqa, nitaj paywan kajkunapis; sacerdoteslla chaytaqa mikhunanku karqa. 5Chayrí, manachu leypi leerqankichej, templopi sacerdotes samakuna diata mana junt'asqankuta? Chaywampis mana juchayojchu kanku. 6Noqarí niykichej: Kaypi astawan kuraj kashan templomanta nisqaqa. 7Yachawajchejchus imatachus niyta munan: Khuyakuyta munani, mana uywa wañuchisqatachu. Mana jayk'ajpis juchachawajchejchu mana juchayojkunataqa. 8Runaj Churenqa samakuna diajta Señornin.

Ch'akisqa makiyoj runa

(Mr 3.1-6; Lc 6.6-11)

9Chaymanta llojsispataj Jesusqa sinagogankuman rerqa. 10Chaypitaj uj makin ch'akisqa runa kasharqa. Runastaj, ch'ataykuyta munaspa Jesusta taporqanku. Atikunchu samakuna diapi onqosqata thañichina?

11Jesustaj paykunaman nerqa: Pitaj qankunamanta uj ovejayoj kaspa, samakuna diapi ovejan t'oqoman urmaykojtin, mana orqhokapunmanchu? 12Chantá manachu runaqa aswan sumajraj ovejamanta nisqaqa? Chayrayku, allin kajtaqa samakuna diapipis ruwana.

13Chantá chay runaman nerqa: Aysariy makiykita. Paytaj makinta aysarerqa, ujnin makin jinataj thañikaporqa. 14Fariseostaj llojsiytawan, paykunapura parlarqanku, imaynamantachus Jesusta wañuchinankupaj.

Isaías Jesusmanta profetizarqa

15Jesustaj kayta yachaspa riporqa; paywantaj ashkha runas rerqanku. Tukuy onqosqastataj thañicherqa. 16Paykunatataj sinch'ita kamacherqa, ama pimampis willanankuta pichus pay kasqanta. 17Chayta ruwarqa profeta Isaiaspa nisqan junt'akunampaj: 18Kaymin ajllasqa kamacheyqa, munakusqay; paypi almayqa kusikun. Payman qosaj Espirituyta, juiciomantataj tukuy laya runasman willanqa. 19Mana churanakonqachu, nitaj qhaparqachanqachu; nillataj pipis callespi vozninta uyarenqachu. 20Lajrasqa soqosollatapis mana p'akenqachu, nitaj q'osñishaj mechatapis wañuchenqachu, juiciota atipanankama. 21Paypa sutimpitaj gentiles suyayninkuta churanqanku.

Santo Espiritupaj rimajkuna

(Mr 3.19-30; Lc 11.14-23; 12.10)

22Chaymantataj, pusarqanku Jesusman supayniyoj ciego opa runata, Jesustaj thañicherqa. Ajinamanta payqa parlarerqa, rikorqataj. 23Tukuy runastaj t'ukorqanku, nerqankutaj: Manachu kayqa Davidpa Churin kanman?

24Fariseostaj kayta uyarispa nerqanku: Kay runaqa mana paypa atiyninwanchu supaykunata qharqon; Beelzebú supaykunaj kurajnimpa atiyninwan qharqon.

25Jesustaj imatachus yuyasqankuta yachaspa, nerqa: Mayqen reinollapis t'aqanaku kajtenqa chinkapun. Jinallatataj uj llajtapi, chayrí familiapipis t'aqanaku kanman chayqa, chinkapullantaj. 26Ajinallatataj, Satanaschus qharqonman Satanasllatataj chayqa, pay kikin t'aqanasqa kanman. Imaynatataj reinoqa kallanqapunirí? 27Beelzebujpa atiyninwanchus, supaykunata qharqoni chayqa; qankunaj wawasniykichejrí, pejpa atiyninwantaj paykunata qharqonku? Chayrayku, paykuna kikin juecesniykichej kanqanku. 28Diospa Espiritumpa atiyninwanchus supaykunata qharqoni chayqa, cheqamanta Diospa reinonqa qankunaman chayamunña.

29Chayrí imaynatataj pipis, uj kallpasapa runaj wasinman yaykunman, tukuy imasninta qhechoj, manaraj wasiyojta ñaupajta wataykuspari? Chaymantaraj wasintaqa ch'inyachinman.

30Mana noqawan kajqa, contraypi. Mana noqawan pallajpis, t'akan.

31Chayrayku niykichej: Ima juchallapis, Diospa contranta rimasqapis, pampachasqa kanqa runaspajqa. Santo Espiritupaj sajrata rimasqarí, mana pampachasqachu kanqa. 32Pillapis Runaj Churimpa contranta rimanman chayqa, juchan pampachasqa kanqa. Pitajchus, Santo Espíritoj contranta rimanman chayqa, mana chay jucha pampachasqachu kanqa kay mundopi, nitaj jamoj mundopipis.

Sach'ataqa poqoynimpi rejsinchej

(Lc 6.43-45)

33Allin sach'aqa, allin poqoyta qon. Mana allin sach'arí, mana allin poqoytaqa qon. Chayrayku, sach'ataqa poqoyninnejta rejsinchej. 34Katarikunaj miraynin! Imaynatataj allinta parlawajchej sajras kashaspari? Sonqopi imachus junt'a kashan, chaymanta simeqa parlan. 35Allin runaqa, allin waqaychanamanta allin imasta orqhomun. Sajra runatajrí, sajra imasta orqhomun sajra waqaychananmanta. 36Chayrayku niykichej: Juicio p'unchaypeqa, runas cuentata qonqanku tukuy qhasi mana kajta parlasqankumanta. 37Allinta parlasqaykirayku salvasqa kanki, sajrata parlasqaykiraykutaj juchachasqa kanki.

Sajra runas señalta mañanku

(Mr 8.12; Lc 11.29-32)

38Chaymantataj, Jesusman leymanta wakin yachachejkuna, fariseoswan kuticherqanku: Maestro, munayku uj milagrota rikuchinawaykuta.

39Jesustaj paykunaman nerqa: Kay sajra, qhenchachakoj runaj miraynenqa, mañan uj señalta. Manataj waj señal qosqachu kanqa paykunaman, profeta Jonaspa señalnillan qosqa kanqa. 40Imaynatachus Jonás, jatun challwaj wijsampi karqa kinsa p'unchayta, kinsa tutatawan; ajinallatataj, Runaj Churimpis kinsa p'unchayta, kinsa tutatawan jallp'aj sonqompi kanqa. 41Nínive llajtayojkuna juiciopi jatarimonqanku; kunan p'unchay runastataj juchachanqanku. Ninivemanta kajkunaqa, Jonás predicajtinkama Diosman kutirikorqanku. Kaypitaj kashan Jonasmanta aswan kuraj. 42Ura ladomanta reinapis juiciopi jatarimuspa, kunan p'unchay runasta juchachanqa. Payqa, karu llajtamanta jamorqa Salomompa yachayninta uyarej. Kaypi kajtajrí, Salomonmanta nisqaqa aswan kuraj.

Supay kutiykun

(Lc 11.24-26)

43Millay supay uj runamanta llojsispaqa, ch'aki jallp'asnejta purin, samakuyta mask'aspa, manataj tarinchu. 44Chaypacha nin: Kutipusaj, maymantachus llojsimorqani chay wasiman. Rispataj taripan ch'usaj wasita, pichasqata, sumaj k'achanchasqatataj. 45Chaymantataj pusamoj rin paymanta aswan millay qanchis supaykunata. Yaykuspataj chaypi tiyakunku; chay runaqa astawan mana allinman tukupun ñaupaj kasqanmanta nisqaqa. Ajinallataj kanqa kay sajra runaj miraynimpajpis.

Jesuspa maman, wauqesnin ima

(Mr 3.31-35; Lc 8.19-21)

46Jesús runasman parlashajtillanraj, maman, wauqesnin ima jawapi suyasharqanku paywan parlayta munaspa. 47Uj runataj Jesusman willarqa: Mamayki, wauqesniyki ima jawapi kashanku qanwan parlayta munaspa.

48Jesustaj runaman kuticherqa: Pitaj mamayri? Pikunataj wauqesniy kasqankuri?

49Makinwan yachachisqasninta rikuchispataj, nerqa: Qhawariychej, kaykun kanku mamay, wauqesniypis. 50Pichus janaj pachapi kashaj Tataypa munayninta ruwajmari, wauqeytaj, panaytaj, mamaytaj.

Currently Selected:

SAN MATEO 12: QCHSB

Highlight

Copy

Compare