SAN MATEO 10

Jesús atiyta qon apostolesninman

(Mr 3.13-19; Lc 6.12-16)

1Jesús wajyarqa chunka iskayniyoj yachachisqasninta. Paykunamantaj atiyta qorqa sajra supaykunata qharqonankupaj, thañichinankupajtaj tukuy laya onqoykunamanta, nanaykunamantawan.

2-4Chunka iskayniyoj apostolespa sutisnintaj kaykuna: Ñaupaj kaj, Simón, Pedro nisqa, wauqen Andreswan; Zebedeoj churisnin: Santiago, Juanwan; Felipe, Bartolomé, Tomás, impuestota cobraj Mateo; Alfeoj churin Santiago, Tadeo, Simón, cananeo nisqa; Judas Iscariote ima, pichus Jesusta jap'icherqa.

Jesús kachan apostolesninta

(Mr 6.7-13; Lc 9.1-6)

5Jesús kacharqa chay chunka iskayniyojta, kay jinata kamachispa: Ama gentilespa ñanninkuta rinkichejchu, nitaj samaritanospa llajtankuman yaykunkichejchu. 6Manachayqa riychej Israel wasimanta chinkasqa ovejasman. 7Rispataj willaramuychej, Diospa janaj pacha reinon qayllamunña, nispa. 8Onqosqasta thañichiychej, wañusqasta kausarichiychej, lepra onqoyniyojkunata llimphuchaychej, supaykunatapis qharqoychej. Qankuna qhasimanta jap'erqankichej; qhasillamantataj qoychej.

9Ama apaychejchu qolqe wayaqapi qorita, qolqeta, nitaj cobre phatastapis. 10Ñampajqa ama qoqawi wayaqata apaychejchu, nitaj iskay p'achasta, nitaj ujut'asta, nillataj tojnutapis. Llank'aj runaqa mikhuchisqapuni kanan tiyan. 11May llajtallamampis, chayrí ranchomampis chayaspaqa, mask'aychej pichus k'acha runata; chaypitaj qhepakuychej, wajman rinaykichejkama. 12Wasiman yaykuspataj napaykuychej. 13Paykunatajchus k'achas kankuman chayqa, sonqo tiyasqa kay paykunawan kachun, nisqaykichejman jina. Sajras kankuman chayrí, sonqo tiyasqa kay qankunaman kutimpuchun. 14Pillapis wasinkuman mana yaykuchisunkichejmanchu, nitaj parlasqaykichejtapis uyarisunkichejmanchu chayqa, chay wasimanta, chayrí chay llajtamanta llojsiychej, chakisniykichejmanta jallp'ata thalarakuspa. 15Cheqamanta niykichej, juicio p'unchaypeqa aswan ñak'ariy kanqa chay llajtapaj, Sodomamanta, Gomorramantawan nisqaqa.

Qhatiykachaykuna

16Kunanqa, noqa kachashaykichej, ovejasta jina atojkunaj chaupinman. Kataris jina sumaj yuyayniyoj kankichej; palomas jinataj llamp'u sonqosniyoj. 17Allinta qhawakuychej runakunamanta. Paykunaqa jatun juntaman pusaspa sinagogasninkupi jasut'ichisonqachej. 18Noqarayku pusasonqachej llajtapi kuraj kamachejkunaman, reyesman ima. Ñaupaqenkupitaj noqamanta willankichej paykunaman, gentilesmampis. 19Kamachejkunaman pusasqas kaspaqa, ama llakikunkichejchu imaynatachus parlanaykichejta, chayrí imatachus ninaykichejta. Chay kikimpacha, Dios yuyaychasonqachej imamantachus parlanaykichejta. 20Mana qankunachu parlankichej; astawanqa Tataykichejpa Espíritun qankunanejta parlanqa.

21Wauqeqa wauqenta wañuchichenqa; tatapis wawanta; wawaspis oqharikullanqankutaj tatasninkuta wañuchichinankupaj. 22Noqarayku tukuy runas chejnisonqachej. Pichus tukukuykama, sumajta sayanqa, chay salvasqa kanqa. 23Mayqen llajtallapipis chejnisunkichejman chayqa, waj llajtamanñataj ayqeychej. Cheqamanta niykichej ari, manaraj tukuy israelitaspa llajtasnimpi willayta tukushajtiykichej, ñapis Runaj Churenqa jamonqaña.

24Yachakojqa, mana yachachejninmanta aswan kurajchu. Nitaj kamachipis patronninmanta kurajllatajchu. 25Yachakojpajqa walej, yachachejnin jina kanan. Kamachipajpis patronnin jina kanan. Wasiyojtachus Beelzebuta suticharqanku chayqa, imatarajchus sutichanqanku wasimpi kajkunataqa.

Pitataj manchachikusunri?

(Lc 12.2-9)

26Chayrayku, ama paykunata manchachikuychejchu. Mana imapis qhatasqaqa kanchu, mana sut'inchakojqa; nitaj pakaypi kajpis mana yachakojqa. 27Imatachus laqhayajpi niykichej, chayta k'anchaypi niychej. Pakaypi uyarisqaykichejtapis, wasi patamanta qhaparispa willaychej. 28Ama manchachikuychejchu cuerpota wañuchejkunata, imaraykuchus almataqa mana wañuchiyta atinkuchu. Astawanqa, pichus cuerpota, almatapis infiernoman wijch'uykuyta atin, chayta manchachikuychej.

29Manachu iskay p'isqetustapis vendenku phatarayku? Chaywampis, Dios Tataykichej mana nejtenqa, ni uj p'isqetullapis jallp'aman urmanmanchu. 30Ajinallatataj, umaykichejpi chujchasniykichejpis, tukuyninku yupasqas kashanku. 31Chayrayku ama manchachikuychejchu. P'isqetusmanta nisqaqa aswan munasqaraj kankichej.

Cristota rejsejkuna

(Lc 12.8-9)

32Pichus runaspa ñaupaqempi noqata rejsiwasqanta nenqa chayqa, noqapis payta rejsini nillasajtaj, janaj pachapi kashaj Tataypa ñaupaqempi. 33Chantá, pillapis runaspa ñaupaqempi mana rejsinichu niwanqa chayqa, noqapis payta mana rejsinichu nillasajtaj, janaj pachapi kashaj Tataypa ñaupaqempi.

Jesusrayku t'aqanaku

(Lc 12.51-53; 14.26-27)

34Ama qankunaqa yuyaychejchu noqa kay mundoman sonqo tiyasqa kayta apamusqayta. Mana sonqo tiyasqa kaytachu; manachayqa phiñanakuyta apamuni. 35Noqaqa runakunata t'aqanachej jamuni: Churita tatanmanta, ususita mamanmanta, qhachunitapis suegranmanta. 36Ajinamanta runaj enemigosnenqa, kikin wasillanmantataj kanqanku.

37Pichus tatanta, chayrí mamanta, noqamanta astawan munakojqa, mana noqapaj jinachu. Ajinallatataj, pichus churinta, chayrí ususinta, noqamanta astawan munakun chayqa, nillataj noqapaj jinachu. 38Pichus, mana cruznin oqharisqa qhepayta qhatimuwanqachu chayqa, mana noqapaj jinachu. 39Pichus kausayninta tarejqa, chinkachenqa; pitajchus, noqarayku kausayninta chinkachejtaj, tarikaponqa.

T'inkasmanta

(Mr 9.41)

40Pichus qankunata wasinman wajyarisunkichej chayqa, noqata wajyariwan. Pichus noqata wasinman wajyariwajrí, kachamuwajniyta wajyarin. 41Pichus profetata wajyarin, profeta kasqanrayku chayqa, profetaj t'inkanta jap'enqa. Jinallataj, allin runata wajyarejqa, allin runa kasqanrayku chayqa, paypis allin runaj t'inkanta jap'illanqataj. 42Pillapis kay juch'uykunamanta ujninman, yachakoj kasqanrayku uj vaso chiri yakullatapis jaywarinman chayqa; cheqamanta niykichej, t'inkanta mana chinkachenqachu.

Currently Selected:

SAN MATEO 10: QCHSB

Highlight

Copy

Compare