SAN JUAN 3
3
Nicodemo watukun Jesusta
1Fariseosmanta uj runa karqa, Nicodemo sutiyoj. Paytaj judíos ukhupi atiyniyoj karqa. 2Pay uj ch'isipi Jesusta watukoj jamorqa, nerqataj: Maestro, yachayku Diospa kachamusqan kasqaykita yachachinawaykupaj mana pipis atinmanchu, qan ruwanki chay jina milagrosta ruwaytaqa, Dios mana paywan kajtenqa.
3Jesustaj kutichispa nerqa: Cheqamanta, cheqamanta niyki, pichus watejmanta mana nacinmanchu chayqa, Diospa reinonta mana rikuyta atinchu.
4Nicodemotaj payman nerqa: Imaynatataj nacinman uj machu runaña kaspari? Ujtawanchu mamampa wijsanman kutiykunman, watejmanta nacinampaj?
5Jesús kutichillarqataj: Cheqamanta, cheqamanta niyki, pillapis mana yakumanta, Espiritumantawan nacinmanchu chayqa, Diospa reinonman mana yaykuyta atinchu. 6Aychamanta nacejqa, aychamin; Espiritumanta nacejpis, espiritumin. 7Ama t'ukuychu nisusqaymanta: Watejmanta nacinayki tiyan, nispa. 8Wayraqa maymantachus munasqanmanta wayramun, sonasqantataj uyarinki, manataj yachankichu maymantachus jamusqanta, nillataj maymanchus risqantapis; chay kikinmin Espiritumanta nacisqa kajqa.
9Nicodemotaj kuticherqa: Imaynatataj chay ruwakunmanri?, nispa.
10Jesustaj nerqa: Israelpa maestron kanki, manachu kayta yachanki? 11Cheqamanta, cheqamanta niyki: Yachasqaykuta niyku, rikusqaykutataj willayku; qankunataj willasqaykuta mana jap'ikunkichejchu. 12Kay pachapi kaj imasmanta willajtiy mana creenkichejchu chayqa, imaynatataj creewajchej janaj pacha imasmanta willajtiyri?
13Mana pipis janaj pachaman wicharerqachu. Runaj Churillan janaj pachamanta uraykamorqa; [payqa janaj pachapi kashan.] 14-15Imaynatachus ch'in pampapi Moisés katarita warkhorqa; ajinallatataj Runaj Churintapis warkhonqanku; tukuy paypi creej, ama wañunampaj; astawanqa, wiñay kausayniyoj kanampaj.
Diosqa tukuyta munakun
16Diosqa chay jinatapuni mundota munakusqanrayku, uj k'ata Churinta qorqa. Ajinamanta pillapis paypi creejqa, mana chinkayman renqachu; astawanqa wiñay kausayniyoj kanqa. 17Diosqa, mana mundota juchachanampajchu churinta kachamorqa, manachayqa paynejta mundo salvasqa kanampaj.
18Pillapis paypi creejqa mana juchachasqachu; mana creejrí ñapis juchachasqaña, Diospa k'ata Churimpa sutimpi mana creesqanrayku. 19Kaytaj chay juchachayqa, kay pachaman k'anchay jamorqa, runakunataj laqhata k'anchaymanta nisqaqa astawan munakorqanku, sajra ruwanaspi kausasqankurayku. 20Tukuy sajrata ruwajqa k'anchayta chejnin; manataj k'anchayman jamunchu, sajra ruwasqasnin ama sut'inchasqas kanankupaj. 21Cheqan ruwanasta ruwajtaj k'anchayman jamun, ruwasqasnimpi Dios paywan kasqanta yachakunampaj.
Juan Bautista, Jesusmanta willallantaj
22Chantá Jesús yachachisqasninwan Judea jallp'aman rerqa. Chaypi paykunawan qhepakorqa, bautizarqataj. 23Juampis bautizashallarqataj Enompi, Salim qayllapi, imaraykuchus chaynejpi ashkha yaku karqa. Runakunataj payman qayllasharqanku bautizachikunankupaj. 24Juanqa manaraj carcelpi wisq'asqachu karqa.
25Chaypachataj churanakorqanku Juampa yachachisqasnin, judioswan, llimphuchakuymanta. 26Juampaman rispataj nerqanku: Maestro, Jordán chimpapi qanwan kasharqa, pimantachus willarqanki, chay runa bautizashan, tukuy runastaj payman qayllashanku.
27Juantaj kutichispa nerqa: Mana runaqa imatapis jap'iyta atinchu, manachus Diosmanta qosqa kanman chayqa. 28Qankunaqa allinta yachankichej nisqayta. Mana noqachu Cristo kani; ñaupajninta kachamusqallan kani. 29Pichus warmiyoj kajqa qosa; paypa qayllampi kaj kausaqentaj, qosaj parlasqanta uyarispa maytapuni kusikun. Ajinamanta kay kusikuyniy kunan junt'akun. 30Payqa wiñanan tiyan; noqataj juch'uyyanay tiyan.
Janaj pachamanta jamoj
31Janaj pachamanta jamojqa, tukuypa patampi; jallp'amanta kajtaj jallp'amanta, jallp'a imasmantataj parlan. Janaj pachamanta jamojtaj tukuypa patampi kashan. 32Chayrayku, uyarisqanta, rikusqantataj willan, runakunataj chay willasqanta mana creenkuchu. 33-34Pillapis yachachisqanta jap'ikojqa, willallantaj Diosqa cheqapuni kasqanta, imaraykuchus Diospa kachamusqanqa, Diospa palabranmanta parlan, Diosqa Espiritunta mana tupusqata qosqanrayku. 35Dios Tataqa Churinta munakun; chayrayku tukuy imata makinman churarqa. 36Churipi creejqa wiñay kausayniyoj, Churipi mana creejtajrí, kausaytaqa mana rikonqachu; astawanqa Diospa phiñakuynin paypa patampi kashan.
Currently Selected:
SAN JUAN 3: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.