HEBREOS 13

Dios munan allinta kausanata

1Hermanos ukhupi munakoyqa kallachumpuni. 2Ama qonqaychejchu chayakamojkunata wasiman wajyakuyta, imaraykuchus chayta ruwaspa, wakin mana yachaspalla angelkunata wajyakorqanku.

3Presosmanta yuyarikuychej, paykunawan khuskapis presochasqas kawajchej jina, jasut'isqasmantapis imaraykuchus qankunapis cuerpoyoj kankichej.

4Casarakoyqa tukuypaj allin; puñunankupis mana ch'ichiyojtaj kachun. Dios juchachanqa sajra purejkunata, qhenchachakojkunata ima.

5Kausakuychej qolqeta ama munapayaspa. Kapususqaykichejllawan kusisqas kaychej; imaraykuchus pay nerqa: Mana wijch'urparisqaykichu nitaj saqerparisqaykichu. 6Chayrayku tukuy sonqo niyta atinchej: Señorqa yanapawajniy, mana manchachikusajchu, imanawanqataj runari?

7Yuyarikuychej ñaupajman pusasojniykichejmanta, pikunachus Diospa palabranmanta parlasorqachej chaykunamanta; unanchaychej imaynatachus kausakusqankuta, feninkutataj yachaqakuychej.

8Jesucristoqa kikillampuni qayna, kunan, wiñaypajpis. 9Ama apaykachachikuychejchu imaymana waj yachachiykunawan; aswan allinmin Diospa yanapayninwan sonqo kallpachasqa kananqa; mikhuykunawan kallpachasqa kananmanta, imaraykuchus chaykuna mana yanapankuchu chay jinaman kausajkunata.

10Kapuwanchej uj altar, chaypi mana mikhuyta atinkuchu yupaychana tabernáculo rikuchikuta jaywajkunaqa. 11Kuraj sacerdoteqa uywaspa aychanta, yawarninta ima, jucharayku santuarioman apaykuna, jaramanta jawapitaj uywaspa aychasnin ruphachisqa kanankupaj. 12Chayrayku Jesuspis, llajtamanta jawapi ñak'arerqa, runata kikin yawarninwan llimphuchanampaj. 13Llojsina ari, jaramanta jawaman Jesusta taripaj, ñak'ariyninta apaspa. 14Kay jallp'apeqa mana sayaj llajtayojchu kanchej, astawanqa chay jamoj llajtata mask'ashanchej. 15Chayrayku, Jesucristonejta Diosman yupaychay rikuchikuta jaywanapuni. Kay niyta munan, simispa yupaychaynin, maypachachus Jesucristoj sutinta oqharinku, chaypacha. 16Amataj qonqaychejchu allin kajta ruwayta, yanapanakuyta ima. Diosqa chay jina rikuchikusta munan.

17Ñaupajman pusasunkichej chaykunata kasuychej, paykunaj kamachiynimpitaj kaychej; imaraykuchus paykunaqa mana puñuspa almasniykichejta qhawanku, Diosmantaj cuentata qonanku tiyan. Kayqa kusiywan ruwanankupaj, mana llakiywanchu, nitaj rimaspachu; kayqa mana allinchu kanman qankunapaj.

18Diosmanta mañapuwayku ari, yachayku allin sonqoyoj kasqaykuta, tukuy imapi allinta puriyta munaspa. 19Astawanqa mañakuykichej, ajinata ruwanaykichejta, aswan usqhayta qankunaman kutimunaypaj.

Hermanosta napaykun

20-21Sonqo tiyachej Diosqa, pichus wañusqakunamanta kausarichimorqa Señorninchej Jesucristota, ovejaspa jatun michejninta, wiñay tratoj yawarnimpi, tukuy ima allin ruwaypi qankunata wakichichun, paypa munayninta ruwanaykichejpaj. Ajinata qankunapi pay ruwachun imachus ñaupaqempi allin kajta Jesucristonejta. Payman janaj pacha k'anchay kachun, wiñaypa wiñayninkama. Amén.

22Kunanqa, mañakuykichej hermanos, kay sonqochana palabrata allinta jap'inaykichejta, pisita qankunaman escribimusqayrayku. 23Yachanchej hermanonchej Timoteo kacharisqaña kasqanta. Aswan usqhaytachus chayamonqa chayqa, paywan watukusqayku.

24Tukuy kamachejniykichejta napaykapuwaychej, tukuy ajllasqastawan. Italiapi kajkunataj napaykamusunkichej.

25Diospa khuyakuynin tukuyniykichejwan kachun.

Currently Selected:

HEBREOS 13: QCHSB

Highlight

Copy

Compare