GÁLATAS 4

Diospa wawasnin Cristowan khuska

1Chantá nillanitaj: Chayaqeta jap'ej, wawallaraj kashaspaqa, mana imapipis kamachimanta kurajchu, tukuy imamanta dueño kashaspapis. 2Chayaqeta jap'ej wawaqa, waqaychajkunaj, qhawajkunaj kamachimpi kashan, tatampa nisqan p'unchaykama. 3Ajinallataj noqaykupis wawas kashaspaqa kamachis karqayku, kay mundoj kamachisqasninta kasuspa. 4Chantá p'unchaykuna junt'akojtintaj, Dios kachamorqa Churinta, ley kamachishajtin, uj warmimanta nacikojta. 5Leypa kamachimpi kashajkunata kacharichinampaj, paypa wawasnin jinataj rejsisqas kanaykupaj. 6Wawasninña kajtiykichejtaj, Diospa Churimpa Espiritunta sonqoykichejman kachamorqa. Espiritutaj mañakun: Tatáy, nispa. 7Ajinaqa manaña kamachichu kanki, astawanqa Diospa wawan. Wawanña kanki chayri, Dios chayaqeta qosonqa [Cristonejta].

Pablo creejkunata sonqochan

8Cheqamanta ñaupajta manaraj Diosta rejsishaspa, yupaycharqankichej mana kaj dioskunata. 9Kunanqa Diosta rejsishaspa, chayrí Diospa rejsisqasnin kaspa, imaraykutaj ujtawan mana kallpayoj, wajcha yachachiykunaman kutiripuyta munankichej kamachisnin jina? 10Qankunaqa waqaychankichej wakin p'unchaykunata, killasta, watasta ima. 11Llakikuni yuyaspa qankuna ukhupi qhasipaj llank'asqayta.

12Mañakuykichej hermanos, noqa jina kanaykichejta. Noqapis qankuna jina karqani. Noqapajqa mana ima sajratapis ruwarqankichejchu. 13Qankunaqa yachankichej ñaupajta onqosqa kashaspa evangeliota willasqaykichejta. 14Ajina onqosqa kashajtiypis mana willachikuwarqankichejchu, nitaj qhesachawarqankichejchu, astawanqa wajyarikuwarqankichej Diospa angelninta jina; Cristo Jesuspis kayman karqa ajinata. 15Maytaj kunan chay jina kusiyniykichejri? Qankunamanta niyta atiyman, atiwajchejchus karqa chayqa, ñawiykichejtapis orqhokuspa qowankichejman karqa. 16Qankunaman cheqa kajta nisqayraykuchu contrarioykichej kani?

17Chay runasqa yachachiyta munasunkichej, manataj allimpajchu, manachayqa noqaykumanta t'aqayta munaspa, paykunata kasunaykichejpaj. 18Allimpuni ari tukuy sonqo kayta tukuy tiempo allin kaypi rikucheyqa, mana sajra yuyaywan kaspaqa; manataj qankunawan kashajtillaychu. 19Wawasníy, qankunarayku ujtawan ñak'arini nanaykunawan uj onqoj warmi jina; Cristo jina kanaykichejkama. 20Munayman kunampacha qankunawan kayta, waj jinamantañataj qankunawan parlaspa. Manataj yachanichu imaynamantachus qankunawan parlayta.

Sarawan, Agarwan imaynachus kasqankuta rikuchinku

21Niwaychej, qankuna leypa kamachimpi kayta munajkuna. Manachu leypa imatachus nisqanta uyarerqankichej? 22Escribisqa kashan: Abrahampata iskay wawasnin karqa; ujnin kajqa kamachejpata, ujnintaj libre kajpata. 23Kamachejpataqa aychaman jina nacerqa; libre kajpatataj Diospa nisqanman jina nacerqa. 24Kaytaj niyta munan, kay iskay warmisqa iskay tratowan ninakun. Ujnin kajqa Sinaí orqomanta jamun, sutintaj Agar nisqa; paypa wawasnin kamachis karqanku. 25Agarqa rijch'akun Sinaí orqoman, Arabiapi kashan chayman. Chaytaj niyta munan kay tiempomanta Jerusalén. Jerusalenqa wawasninwan kamachis kanku. 26Pata kaj Jerusalenqa mamanchej. Chaytaj libre. 27Escribisqa kashan: Kusikuy, mana nacichikoj warmi; jatunmanta qhaparispa kusikuy, nacichikoj warmej nanayninta mana rejsej. Sapan kaj warmeqa astawan ashkha wawasniyoj, qosayoj warmimanta nisqaqa. 28Ajinaqa hermanos, qankuna Isaac jina, Diospa qosqayki nisqampa wawasnin kankichej. 29Chaypacha aychaman jina nacejqa, Espirituman jina nacejta qhatiykacharqa. Kunampis jinallataj kashan. 30Astawanqa ima nintaj escribisqapiri? Ajinata nin: Jawaman qharqoy kamachita wawantawan. Kamachej wawanqa, mana jap'enqachu librej wawanwan khuska. 31Ajinaqa, hermanos, mana kamachej wawasninchu kankichej, manachayqa librejta.

Currently Selected:

GÁLATAS 4: QCHSB

Highlight

Copy

Compare