ÉXODO 39

Sacerdotespa p'achasta ruwanku

1Diospa tiyananman yaykuspa churakunanku p'achasta t'iparqanku, lilamanta, puka pantimanta, pukamanta. Chaymantaqa sumajnin kaj p'achasta Aarompaj ruwaporqanku Señorman qayllanampaj, imaynatachus Moisesman Señorqa kamachisqanman jina.

2Chaymantaqa ruwallarqataj qorimanta efod nisqa p'achata, lilamanta, puka pantimanta, pukamanta, t'ullkusqa sumajnin linomantawan. 3Chaymantataj, qorimanta laminasta jina ruwarqanku; chaymantataj ñañu alambresta k'acha pallayniyojta ruwarqanku lilamanta, puka pantimanta, pukamanta, t'ullkusqa sumajnin linomantawan. 4Chay efod p'achataqa ruwarqanku puraj puntasnimpi watusniyojta, jinamanta puraj puntasninmanta wasaman watakunapaj. 5Efod nisqa p'achaj cantosnimpi chumpipis kikin ruwasqallataj karqa qorimanta, lilamanta, puka pantimanta, pukamanta sumajnin kaj linomantawan imaynatachus Señorqa Moisesman kamachisqanman jina.

6Chanta ruwallarqankutaj ónice rumista ch'eqospa, chayta churararqanku qori patasman, chaymantaj churarqanku selloswan jina Israelpa wawasninmanta yuyarikuy jina. 7Chaymantataj Bezaleelqa efod nisqa p'achaj lijrasninman chay rumista k'askaykucherqa, Israelpa wawasnin yuyarikunankupaj, imaynatachus Moisesman Señor kamachisqanman jina.

8Warkhuna nisqa p'achata efodta jina sumaj k'achituta ruwarqa: Qorimanta, lilamanta, puka pantimanta, pukamanta, sumajnin kaj t'ullkusqa linomantawan. 9Karqa rakhu sapa cantonman chhikachajpura iskay chunka centimetrosniyojkama. 10Warkhunataqa ruwarqa tawa suyusniyojta sumachaj rumismanta. Ñaupaj kaj suyupi karqa rubí rumi, crisólito, esmeralda rumiwan. 11Iskay kaj suyoqa karqa granate rumiwan, zafirowan, uj jadewan. 12Kinsa kaj suyutaj karqa jacinto rumiwan, agatawan, amatista rumiwan. 13Tawa kaj suyutaj karqa topacio rumiwan, cornalinawan uj jaspe rumiwan. Chay rumisqa k'askachisqas karqa qori patapi. 14Chantapis chay rumisqa karqanku ima sutisniyojchus Israelpa wawasnin karqanku chayman jina sapa uj rumispi uj suti ruwasqa karqa sello jina, chunka iskayniyoj ayllus kasqankuman jina. 15Warkhunaj patanmantaj churarqanku ch'uwa qori ch'ankullasta, chayqa q'aytu jina iskayman k'uyusqas karqa. 16Chaymantaqa ruwallarqankutaj warkhunaj muyuyninta qorimanta, iskay qori sortejastawan. Chaytataj warkhunaj puraj cantosninman chhitararqanku. 17Jinallataj chay ch'ankullatapis warkhunaj patanman churaykorqanku. 18Qori ch'ankullaspa puntasnintataj wataykorqanku, chaywan sumajta wataykorqanku efodpa iskaynin lijrasninman, astawanqa ñaupaj ladoman. 19Chaymantaqa ruwallarqankutaj iskay qori sortejasta, chaytataj warkhunaj ura cantosninman churarqanku efodwan tinkuyman. 20Ruwallarqankutaj iskay qori sortejastawan, chaytataj efodpa ñaupajninman puraj cantosninman ujtakama churararqanku ura cantonnejman, maynejpichus siraynin karqa chaynejman, chumpin patanejman. 21Jinaspataj wataykorqanku warkhunaj sortejasninmanta, efodpa sortejasninmantawan lila q'aytuwan efodpa cantompi chumpej patanmanta ama t'aqakunampaj, warkhunapis efodpa patampi kanampaj, imaynatachus Señorqa Moisesman kamachisqanman jina.

22Efodpa patampi kaj p'achata t'ipaspa ruwarqanku lilamanta. 23Chayqa karqa khuskampi khallayoj, cuelloyojtaj qara chalecos jina, flecosniyoj, awakipasqayoj, ama imaynamantapis llik'ikunampaj. 24Chay p'achaj cantosninmantaj t'ikacharqanku ruwasqa t'ika tullmaswan. Chay t'ikasqa ruwasqs karqa lila q'aytumanta, puka q'aytumanta, panti q'aytumanta, sumaj kaj t'ullkusqa linomantawan. 25Chaymantaqa ruwallarqankutaj qorimanta campanillasta jina, chaytataj chay q'aytu t'ikaspa chaupisninman chhitaykorqanku. 26T'ikastaraj ñaupajta churaykorqanku, chay qhepanmantaj qori campanitasta, t'ikatataj, ajinata tukuy cantonta muyuricherqanku chay p'achata; chayqa churakuspa sacerdote imatapis ruwanampaj, Moisesman Señor kamachisqanman jina.

27Jinaspataj ruwallarqankutaj sumajnin kaj linomanta p'achasta k'acha pallayniyojkunata Aarompaj wawasnimpajwan. 28Kikillantataj sumajnin kaj linomanta ruwarqanku mana ningriyoj t'ikasniyoj ch'ulusta, calzoncillostawan. 29Chumpitapis sumajnin kaj t'ullkusqa linomanta ruwarqanku. Chaytaj karqa lilamanta, puka pantimanta, pukamantawan, sumaj k'acha pallayniyojta, imaynatachus Moisesman Señor kamachisqanman jina.

30Chaymantataj uj laminata nisqata qorimanta ruwarqanku. Chaymantaj escriberqanku uj sellota jina, “Kayqa Señorpaj t'aqasqa, nispa. 31Jinaspataj chay tablerota watucharqanku uj lila q'aytuwan chay ch'ulu pataman warkhunankupaj, imaynatachus Moisesman Señor kamachisqanman jina.

Dioswan tinkukuna toldo tukukun

32-41Dioswan tinkukuna toldo tukukun. Chaytaqa israelitas ruwarqanku imaynatachus Moisesman Señor kamachisqanman jina. Moisesman israelitas Dioswan tinkukuna tukuy imasnin tukusqata; ganchosnintinta, tablasnintinta, sayachina maderasta, maderaspa sayanasnin chukusta; tapanapaj pukaman teñisqa oveja qarasta, tapanapaj qowi qarasta, ñaupajninta jark'achinapaj velosta; Diospa leyninwan kasharqa chay cajonta, k'aspisnintawan, kirpanasnintawan; mesata, vasosnintawan, qayllapi nisqa t'antatawan; qorimanta ruwasqa k'anchachinata, k'anchachinasnintawan, chay k'anchachina imaynachus ruwasqa kanan karqa chaykunasninta, tukuy imasninta, k'anchanapaj aceitetawan; qori altarta, jawina aceiteta, sumajta q'apashaj inciensota, Dioswan tinkukuna punkuman yaykuyta jark'achinapaj awasqastawan; bronce altarta, bronce rejillasnintinta, k'aspisninta, imasninchus chay patasnimpi karqa chaykunastawan, ch'illamita, maypichus sayanantawan; patiota jark'achinapaj awasqasta, plantasta jina sayachinapaj maderasninta, chay maderaspa sayanasnin chukusta, patio punkuta jark'achinapaj awasqasta, waskasninta, estacasta, imasninchus kanan karqa chaykunasnintinta Diospa tiyakunampi ruwanapaj Dioswan tinkukuna wasipi; chaypi kaspa imastapis ruwaspa churakuna p'achasta, sacerdote Aarompaj sumaj ruwasqa p'achasta, Aarompa wawasnimpaj p'achasta sacerdoteman p'achallikuspa Diospa tiyakunan wasipi ruwanankupaj.

42Chay tukuy imasta israelitasqa ruwarqanku, imaynatachus Moisesman Señor kamachisqanman jina. 43Chay tukuy imasta Moisesqa rikorqa sumaj kasqanta, Señorpa kamachisqanman jina sumaj ruwasqas kasqanmanta, chaymantataj paykunata bendicerqa.

Currently Selected:

ÉXODO 39: QCHSB

Highlight

Copy