ÉXODO 36

1Ajinaqa Bezaleelwan Aholiabwan, chantaqa tukuy sonqo imastapis sumajta ruwayta yachajkuna; pikunamanchus Señor yachayta qon imastapis ruwanankupaj, chaykuna ruwachunku Diospa tiyanan toldopi, imaynatachus Señorpa kamachisqanman jina.

Israelitas apamunku ashkha ofrendasta

2Moisesqa wajyarqa Bezaleelta, Aholiabta, tukuy yachayniyojkunatawan, pikunamanchus Señor qorqa yachayta tukuy sonqo imastapis k'achitusta ruwanankupaj. Paykuna kikinkutaj nerqanku Señorpaj imastapis tukuy sonqo ruwanankuta, chaykunatawan. 3Chaymantaqa paykuna oqharerqanku tukuy ofrendasta Moisespa ñaupaqenmanta, mayqenkunatachus israelitas apamorqanku Señorpaj, Diospa wasimpi imaschus kanan kashan chaykunata ruwanankupaj. Chaymantaqa israelitas apamullarqankupuni ofrendasta tukuy sonqo sapa paqarin. 4-5Tukuy imastapis ruwayta yachajkuna, chay ruwanasninkuta Diospa wasimpaj ruwasharqanku chayta saqerispa, Moisesman jamorqanku, nerqankutaj: Israelitasqa ancha ashkhataña ofrendasta apamunku, imaschus Diospa wasimpaj ruwakunan kashan chaymanta kurajtaña, mayqentachus Señor kamacherqa ruwakunanta chaypaj.

6Chaymanta Moisesqa tukuynin jaraspi kajkunaman willacherqa: Amaña Diospa wasimpaj ofrendasta apamuchunkuchu qharis, nitaj warmispis, nispa. Ajinata israelitastaqa jark'ararqa amaña astawan ofrendasninkuta apamunankuta. 7Imastachus ruwananku karqa chaypajqa tukuy imas kurajyarqa.

Diospa tiyanan

8Chay tukuynin llank'ajkunamanta aswan yachayniyojkuna qallarerqanku Diospa tiyanan nisqata ruwayta; chaypaj ruwarqanku chunka jark'achina telasta sumaj rakhu t'ullkusqa linomanta, lilamanta, puka pantimanta, pukamanta ima. Chaykunataj jatuchaj pallaynisniyoj karqa iskay angelesniyoj. 9Chay cortinasqa sayt'unman karqa chunka iskayniyoj khuskanniyoj metros. Kinrayninmantaj iskay metros. Tukuynin chhikachachajkama karqa. 10Phishqa cortinas karqa, chaykunata ujllaman cantosninmanta sirararqanku, jinallatataj chay uj phishqa kajkunatapis. 11Chaymantataj chay ñaupaj kaj cortinasta sirasqaspa puntasninman chhitararqanku lila q'aytumanta ningrista, kikillantataj iskay kaj jark'achinasmampis. 12Ñaupaj kajkunaman churararqanku phishqa chunka ningrista, kikillantataj qhepan kajkunamampis. Jinamanta chay ningrisqa chimpan chimpampi karqa. 13Chaymantaqa cantosnimpi ruwallarqankutaj phishqa chunka ch'itanasta qorimanta. Jinamanta chay cortinasqa ch'itanasninmanta ch'itarajtinku ujllaman puntampura k'askanakorqanku. Ajinamanta Diospa tiyananqa k'achitu ruwasqa karqa.

14Chaymantaqa Bezaleel ruwallarqataj cortinasta cabra pelosmanta chunka ujniyojta; chaywan chay Diospaj tiyananta toldowan muyuricherqa. 15Chay cortinasqa karqa chunka kinsayoj khuskanniyoj metros sayt'unman, kinrayninmantaj iskay metros. Chunka ujniyojnintintaj chhikachachaj pura karqanku. 16Chaymantaqa Bezaleel phishqa kajkunata cantosninmanta ujllaman sirararqa, sojta kajtataj ujllaman. 17Jinaspataj phishqa chunka ningrista cantosninman k'askaracherqa ñaupaj kaj sirasqasman, phishqa chunkatataj chay qhepan kajman k'askaracherqa. 18Chantaqa ruwarallarqataj phishqa chunka ch'itanasta broncemanta, chaywan cantosninmanta ch'itaranampaj, jinamanta ujllaman k'askaykuchispa muyuykuchinampaj toldota.

19Chay toldota patamanta qhataykunampaj Bezaleel ruwallarqataj oveja qarasmanta pukaman teñiraspa, chaypa patanman qhatanampajtaj wajta ruwarqa sumaj ruwasqa qarasmanta. 20Chaymanta Diospa tiyanampajtaj ruwarqa tablasta acacia maderasta, sayacherqataj acacia maderasta cheqanta. 21Chay maderasqa karqa tawa metros khuskanniyoj sayt'unman, kinrayninmantaj sojta chunka phishqayoj centimetrosniyoj. 22Sapa uj tablastaj iskaykama tarukiyasqasniyoj karqa iskaynin tablasta ujllaman t'inkinapaj. 23Diospa tiyakunan toldoj tablasninta uray uyampaj iskay chunkata ruwarqa. 24Chay tawa chunka tablasta sayachinampaj ruwarqa tawa chunka chukusta qolqemanta. Sapa uj tabla tarukiyasqaj urasninmantaj iskaykama churararqa. 25Jinaspataj Diospa tiyananta sayachinampaj pata uyanman churanampaj ruwallarqataj waj iskay chunka tablasta. 26Chaymantaqa qolqemanta tawa chunka chukusninta ruwarqa, chaymantataj sapa uj tablasta iskay chukus pataman sayaykucherqa. 27Qhepanmanta inti yaykuymanta sayachimunampajtaj sojta tablasta ruwarqa. 28Qhepa esquinasman sayachinampaj iskay tablastawan ruwarqa. 29Chay tablasqa sumajta k'askaykunakorqanku uramanta patakama, ujllapis kanman jina maypichus ningris churasqa karqa chaykama. Ajina ruwasqa karqa chay iskay tablasmanta, iskaynin esquinasnin. 30Ajinaqa pusaj tablas chunka sojtayoj qolqemanta ruwasqa chukusniyoj karqa. Imaraykuchus sapa uj tabla iskay chukus patapikama sayanan karqa.

31Chaymanta Bezaleelqa ruwallarqataj phishqa kurkusta acacia maderamanta, Diospa tiyakunan wasej uj ladompaj. 32Phishqa kurkustaj Diospa tiyakunan wasej tablaspa wasanman churanampaj, phishqa kurkustataj inti yaykuy uyapaj. 33Ruwallarqataj uj kurkuta tablaspa chaupinta uj ladoman pasachinampaj jawa ladomanta. 34Jinaspataj chay kurkusta qoriwan k'askaykucherqa tablasninta, sorteja jina ningris kajkunatapis qorimanta ruwarqa, maynintachus k'aspiswan jusk'uracherqa.

35Chaymanta velotañataj ruwarqa lilamanta, puka pantimanta, pukamanta, t'ullkusqa linomanta, pallaynintaj karqa iskay ángeles. 36Jinaspataj tawa postesman jap'iykucherqa qori ningrisninmanta. Chay postesqa acacia maderamanta karqa qoriwan jawisqas qolqe chukus patapi sayasqas.

37Diospa tinkukuna wasinta jark'achinapaj ruwallarqataj jark'achinata, lilamanta, pukamanta, puka pantimanta, ch'ullanchasqa t'ullkusqa linomantawan sumaj k'acha pallayniyojta. 38Chaymantataj phishqa postesta sayaracherqa ganchosniyojta broncemanta ruwasqa chukus patapi sapa ujninta. Jinaspataj qoriwan k'askaykucherqa chay postesta, jinallataj ganchosnintapis.

Currently Selected:

ÉXODO 36: QCHSB

Highlight

Copy