ÉXODO 32

1Israelitastaj chaykama, Moisés Sinaí orqomanta mana usqhayta uraykamojtin, tantakuytawan Aaronman qayllaykuspa nerqanku: Kunanqa dioskunata ruwapuwayku ari ñaupaqeykuta rinankupaj. Imaraykuchus Egipto jallp'amanta orqhomuwarqayku chay Moisesqa imanakunchus mana rikhurimunchu. 2Aarontaj nerqa: Warmisniykichejpa ningrimpi kashan chay qori faluchost apamuychej, jinallataj qhari wawasniykichejpata, warmi wawasniykichejpatawan.

3Israelitastaj chayta uyarispa tukuyninku apamorqanku qori faluchosninkuta Aaronman ningrisninkumanta orqhokuytawan. 4Paytaj chaykunata jap'iytawan, tukuyninta ujllaman unuyarpachiytawan cincelwan uj waka uñata ruwarqs. Chaymantataj nerqanku: “Israelitas, kayqa Diosniykichej, pichus Egiptomanta orqhomusorqachej chay”, nispa.

5Chayta rikuspataj Aaronqa uj altarta ruwarqs waka uñaj ñaupaqempi. Chaymantataj nerqa: Q'aya ruwasunchej Señorpaj uj fiestata.

6Q'ayantenqa tutamanta jatariytawan ofrendata, allinyakuy chay rikuchikustawan jaywarqanku. Chaymantataj runasqa tiyaykukuspa mikhorqanku, ujyarqankutaj, sayariytawantaj mayta kusikorqanku.

7Señortaj Moisesman nerqa: Kunanqa riy, uraykuy, imaraykuchus Egiptomanta orqhomusqayki runasqa millayta juchallikunku. 8Paykunaqa usqhayllata t'aqarpayakunku ima ñantachus noqa nerqani rinankuta chaymanta. Qorimanta unuyachispa ruwakunku uj waka uñata. Chayta paykunaqa yupaychashanku rikuchikusta jaywaspa, nispataj: “Israelitas, kayqa diosniykichej, pichus Egipto jallp'amanta orqhomusorqachej, chay”, nispa.

9Señorqa Moisesman astawan nerqa: Noqa cheqamanta kay runasta rikuni, paykunaqa rumi sonqos kanku. 10Kunanqa saqellaway, paykunapi phiñakuyniyta thasnukusaj, paykunata tukuchisaj, qanmantarí uj jatun nacionta ruwasaj.

11Moisestaj chayta uyarispa Señor Diosninmanta mañakorqa, nispa: Señorníy, imaraykutaj qan paykunapaj k'ajaj phiñakuyniykita rikuchiwajri, israelita runasniykej contrampiri, mayqentachus Egipto jallp'amanta manchay kallpawan, atiywantaj orqhomusqaykipajri? 12Manachu chayta yachaspa egipciosqa ninkuman: Diosqa israelitasta orqhon ch'in pampaspi wañuchinanrayku, kay jallp'a patamanta q'alata chinkachinanrayku?, nispa. Thasnullay ari chay k'ajaj phiñakuyniykitaqa, ama ari phiñakuychu, yuyarikuy ari Israel runasniykimanta. 13Yuyarikuy ari, ima tratotachus ruwasqaykita kamachisniyki Abrahamwan, Isaacwan, Israelwan ima. Qan chayta ruwashaspa nerqanki: Noqa mirayniykichejta mirachisaj qoyllurkunata jina, kay jallp'ata qosaj mirayniykichejman imatachus qosaj nisqayman jina, paykunataj chayaqenkupaj wiñaypaj jap'ikunankupaj.

14Chaymanta Señorqa phiñakuyninta tiyaykuchikorqa, manañataj Israel runasninta chinkachiyta munarqachu. 15Moisestaj chay orqomanta uraykorqa palqayoj ruwasqa p'alta rumipi escribisqa leyta marq'arisqa. Chay rumispeqa iskaynin palqasnimpi Diospa leynin escribisqa karqa. 16Chay palqa rumitaqa Diospuni ruwarqa, jinallataj chaypi ch'eqosqa palabrastapis Diospuni ruwarqa.

17Josuetaj, israelitaspa maytapuni ch'ajwaspa qhaparisqankuta uyarispa, Moisesman nerqa: Jarapeqa maqanakuspapis ch'ajwashankuman jina uyarikun, nispa.

18Moisestaj kuticherqa: Mana maqanakupi atipaspa kusiywan qhaparisqanku jinachu, nitaj atipachikuspa llakiywan qhaparisqanku jinachu; manachayqa waj laya takiykunata noqaqa uyarini.

19Moisesqa jaraman qayllaykuspa rikorparerqa waka uña lantita, israelitastataj tusurashajta. Chayta rikuspa Moisesqa manchay k'arajta phiñarikorqa, makimpi marq'arisqa kasharqa chay rumitataj, pampaman choqaspa p'akerparerqa chay orqo k'uchupi. 20Waka uña lanti ruwasqankutataj jap'iytawan ninaman wijch'uykorqa; chaymantataj lantitaqa ñut'uta kutacherqa. Jinaspataj yakuman jich'aykamorqa chay kutasqata, israelitasmantaj chay yakuta ujyacherqa.

21Aaronmantaj Moisesqa nerqa: Imanasorqankutaj kay runasri, kay chhika jatun juchata ruwachinaykipajri?

22Aarontaj Moisesman kuticherqa: Ama phiñakuwaychu, wiraqochíy. Qan allinta yachanki, kay runasqa munankupuni imatapis mana allin kajta ruwayta. 23Paykuna niwarqanku: Dioskunata ruwapuwayku ñaupaqeykuta rispa pusanawaykupaj; pi qharichus Egiptomanta orqhomuwarqayku, chay Moisesqa imanakunchus kampis mana yachakunchu, nispa. 24Noqataj paykunaman nerqani: Pejpatachus qorin tiyajtenqa apamuwaychej, nispa. Paykunataj qowarqanku, chaymantataj ninawan unuyacherqani, jinamanta kay waka uña ruwakorqa.

25Moisesqa runasta rikorqa mana allin kasqankuta, tukuy enemigosninku asikunankupaj jina, Aarontaj chayta ruwachillarqa. 26Moisestaj jara punkuman sayaykuspa nerqa: Pikunachus Señorwan kajkuna jamuychej, noqawantaj sayaychej. Chayta uyarispataj tukuynin levitas payman k'askarqanku. 27Chaymanta Moisesqa nerqa: Ajinata nin Israelpa Diosnin Señorqa. Sapa ujniykichej espadaykichejta oqharikuychej, jaraman kutispa, wasimanta wasi riychej, sapa ujniykichej hermanosniykichejta, amigosniykichejta, qayllasniykichejpi tiyakojkunata ima.

28Levitasqa Moisespa nisqanta kasorqanku. Jinamanta chay p'unchaypi yaqha kinsa waranqa qharis jina wañorqanku israelitas ukhumanta.

29Chaymantataj Moisesqa levitasman nerqa: Kunan qankunaqa Diosmanta kamachiyta jap'inkichej Señorpa ñaupaqempi sacerdotesniy jina, chay jinata ruwajkuna wawasniykichejpa, hermanosniykichejpa contranta sayarikusqaykichejrayku, ajinamanta Señorqa bendicionesninta qonasuykichejpaj.

30Q'ayantin Moisesqa runasman nerqa: Qankunaqa uj jatun juchata ruwarqankichej, kunanqa wicharisaj maypichus Señor kashan chayman, ichapis Señorqa juchasniykichejta pampachanqa.

31Ajinamanta Moisesqa kutirerqa maypichus Señor kasharqa chayman, chaypitaj Señorman nerqa: Cheqamanta kay israelitasqa uj jatun juchata ruwanku, qorimanta uj lantita ruwaspa diosninku kanampaj. 32Noqa mañakuyki paykunaj juchankuta pampachanaykita, mana chay juchankuta pampachanki chayqa, kunampacha libroykipi escribisqayki sutiyta orqhopuway.

33Señortaj Moisesman kuticherqa: Pichus noqaj contraypi juchallikun chaypa sutillanta orqhosaj escribisqay libromanta. 34Kunanqa rispa israelitasta pusay, maymanchus noqa pusay nerqayki chayman. Chaymantaj noqaj angelniy pusasonqa. Mayk'ajchus jasut'iy p'unchay chayamonqa, chaypacha noqa juchasninkumanta jasut'isaj paykunata. 35Israelitasta Señorqa juchankumanta jasut'erqa, waka uñata Aaronwan ruwachikusqankumanta.

Currently Selected:

ÉXODO 32: QCHSB

Highlight

Copy