BARUC 2
2
1Ajinamanta, Señorqa junt'arqa imatachus nerqa noqanchejwan ruwananta chayta. Junt'arqa imatachus ruwanan karqa Israelta kamachejkunawan, reyesninchejwan, Israelpitaj Judapitaj tiyakojkunawan ima. 2Mayllapipis mana ni jayk'aj pasarqachu ni imapis rijch'akojqa chay ruwasqanman Jerusalenwan, Moisespa leynimpi qelqasqanman jina. 3Mikhorqanchej qhari wawasninchejpa warmi wawasninchejpatawan aychankuta. 4Señorqa nerqa israelitas urmanankuta muyuyninkupi kaj nacionespa makisninkuman. Nerqataj qhesachasqas kanankuta. Nillarqataj Israel jallp'a ch'in pampaman tukunanta tukuy naciones ukhupi maypichus Israel aylluta ch'eqerarqa. 5Señor Diosninchejpa contrampi juchallikusqanchejrayku, mana payta kasuspa, waj nacionespa urampi kakushanchej, mana patapichu.
6Señor Diosninchejqa cheqanyachin. Noqanchejrí, pampaman k'umuykukunanchej tiyan, imaynachus ñaupa tatasninchej ruwarqanku, ajinata. 7Tukuy laya llakiy, Señorpa nisqanman jina, patanchejman urmaykuwanchej. 8Mana mañarikorqanchejchu Diosmanta mañakuspa yanaparinawanchejta payman kutirinanchejpaj saqespa imachus mana allin sonqonchejpi chayta. 9Chayrayku Señorqa tukuy chay llakiykunata chayachimuwarqanchej, imaraykuchus payqa cheqantapuni niwarqanchej imatachus ruwananchejta. 10Noqanchejrí mana kasukorqanchejchu kamachiwasqanchejta nitaj junt'arqanchejchu imatachus ruwananchejta.
Diosmanta mañakuy llakiymanta llojsinapaj
11Kunanqa, Señor, Israelpa Diosnin, qanqa llojsicherqanki aylluykita Egiptomanta jatun atiyniykita rikuchispa, t'ukuna milagrosta ruwaspa, rejsichispataj sutiykita kunankama. 12Señor Diosniyku, juchallikuyku, mana cheqanchu kayku, nitaj justiciata ruwaykuchu, tukuy kamachikunasniykita mana casuykuchu. 13Phiñakuyniykita karunchay noqaykumanta. Pisilla kayku nacionespi maypichus qan noqaykuta ch'eqerachiwarqayku chaypi. 14Uyariy, Señor, mañakusqaykuta. Sutiykirayku, llakiyniykumanta kacharichiwayku. Pikunachus kayman pusamuwarqayku, k'acha sonqowan qhawawachuyku. 15Ajinamanta, tukuy runas yachanqanku qanqa Señor Diosniyku kasqaykita. Yachanqankutaj Israel ayllu wawasnimpis sutiykiwan sutichasqas kasqankuta. 16Qhawawayku, Señor, santo cheqamantapacha, maypichus tiyakunki chaymanta. Yuyarikuy noqaykumanta. Ningriykita qayllachimuy, uyariwaykutaj. 17Kichariy ñawisniykita, rikuwaykutaj. Señor, wañusqasqa, pejkunajpata ayasninku p'ampasqasña kashanku, mana yupaychasunkuñachu nitaj kusirikunkuñachu cheqanyachej kasqaykimanta. 18Señor, yupaychasonqa llakisqa sonqoyoj runa, pichus k'umpusqataj mana kallpayojtaj purin, pichus yarqhaywan mana rikuytapis atinchu.
19Señor Diosniyku, mana profetaspa ruwasqasninkuraykuchu nitaj reyespa ruwasqasninkuraykuchu kay mañakusqaykuta qanman chayachishayku. 20-21Qanqa llakichiwarqayku jatun phiñakuyniykiwan, imaynatachus willacherqankiña santo profetasniykinejta, nispa: Kayta nichimun Señorqa: Ama ni imata nispa Babiloniamanta reyta sirviychej. Ajinata ruwaspa, kakullankichej chay jallp'api ñaupa tatasniykichejman qorqani chaypi. 22Ichapis mana munankichejchu kasuyta kay kamachisqayta, Babiloniamanta reyta sirvinaykichejta. 23Chayta ruwankichej chayqa, nitaj Jerusalén llajtapi, nitaj waj Judá llajtaspipis runasqa atenqankuchu kusikuywan takirikuyta. Ni casamientospipis atenqankuchu takirikuyta. Chaypacha, llajtaykichej ch'in pampaman tukonqa, mana runasniyoj jallp'aman.
24Noqaykurí mana kasukorqaykuchu chay kamachiwasqaykuta: Babiloniamanta reyta sirviychej, nispa. Qanrí junt'arqanki imatachus kamachis niyki profetasnejta willarqankiña chayta. Qan nerqankeqa reyesniykoj tullusninku, ñaupa tatasniykoj tullusninkutaj sepulturasmanta orqosqas kanankuta. 25Chayrayku, kunanqa q'ala wijch'urasqas kashanku pampapi, p'unchaypeqa ruphaypi, tutapitaj chiripi. Paykunaqa may sinch'i llakiywan wañorqanku, yarqhayrayku, maqanakusrayku, onqoyrayku ima. 26Kay wasipis, sutiykiwan sutichasqa chay, kay jina raqayman tukuchinki Israelpa sajra kayninrayku, Judáj sajra kayninraykutaj.
Yuyarikuna Diospa nisqanmanta
27Jina kajtimpis, Señor Diosniyku, qan qhawawarqayku k'acha sonqowan khuyakuywantaj. 28Chayta willarqankiña kamachiyki Moisesnejta, maypachachus nerqanki qampa leyniykita qelqananta israelitaspa ñaupaqenkupi, kay jinata nispa: 29Mana kasuwankichej chayqa, kay jina runasniyoj aylluykichej, pisi runasniyoj aylluman tukonqa, chay naciones ukhupi, maypichus noqa ch'eqerachisqaykichej chaypi. 30Yachani ari mana kasunawaykichejta, rumi sonqo kasqaykichejrayku. Qharqosqas kajtiykichejrí, chaypachaña unanchankichej. 31Chaypacha, yachankichej noqa Señor Diosniykichej kasqayta. Noqaqa yuyayniyoj runasman tukuchisqaykichej, ningritataj qosqaykichej uyarinaykichejpaj. 32Maypichus tiyakunkichej, yupaychawankichej, yuyarikunkichejtaj noqamanta. 33Qankunaqa, rumi sonqo kayniykichejta saqerparinkichej, noqaman kutirinkichejtaj wist'u puriyniykichejmanta, yuyarikuspa imachus pasasqanmanta ñaupa tatasniykichejman, pikunachus contraypi juchallikorqanku. 34Chantaqa, llajtaykichejman kutirinaykichejta nisaj. Chay jallp'ataqa juramentowan nerqani qonayta Abrahamman, Isaacman, Jacobmampis, ñaupa tatasniykichejman. Ajina, watejmanta chay jallp'aqa qankunajta kanqa. Paykunawan ruwasaj mana tukukoj tratota. Noqaqa paykunaj Diosnin kasaj, paykunataj noqaj aylluy kanqanku. Manaña wijch'usajchu Israel aylluyta paykunaman qorqani chay jallp'amanta.
Currently Selected:
BARUC 2: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.