HECHOS 4

Pedrowan Juanwan kamachejkunaj ñaupaqempi

1Pedrowan Juanwan runasman parlashajtinku chayamorqanku sacerdotes, templota qhawajkunaj kamachisninwan, saduceoswan ima. 2Paykunaqa phiñakusharqanku, tukuy wañusqas Jesusnejta kausarimunankuta runasman yachachisqankumanta. 3Chayrayku apostolesta jap'ispa wisq'aykucherqanku q'ayantinkama, ñapis ch'isiña kasqanrayku. 4Paykunaj parlasqankuta uyarejkunamanta ashkhas creerqanku. Qharisllaraj phishqa waranqa jina karqanku.

5Q'ayantintaj Jerusalempi tantakorqanku, Israelmanta kamachejkuna, kurajkuna, leymanta yachachejkuna ima. 6Chayman tantakamullarqankutaj jatun sacerdote Anaswan, Caifaswan, Juanwan, Alejandrowan, tukuy jatun sacerdotespa ayllusninkuwan ima. 7Chaymantataj Pedrota Juantawan pusachimuspa, ñaupaqenkupi sayaykuchispataj tapuyta qallarerqanku: Ima atiywantaj, chayrí pejpa sutimpitaj kay tukuy imasta ruwankichejri?, nispa.

8Pedrotaj Espíritu Santowan junt'a kaspa nerqa: Israelpi kamachejkuna, kurajkuna ima. 9Kunan p'unchay qankuna tapushawayku, uj suchu runapaj allin kajta ruwasqaykumanta, yachaytataj munaspa pinejtachus thañisqanta. 10Tukuyniykichej, tukuy israelitaspis allinta yachaychej, kay runaqa qankunaj ñaupaqeykichejpi thañisqa sayashan, nazareno Jesucristoj sutinrayku. Kay Jesustaqa qankuna cruzpi chakatarqankichej, Diostaj payta wañusqamanta kausarichimorqa. 11Paymá chay Jesusqa, pimantachus escribisqapi nishan: Qankunaj wasi ruwajkunaj qhesachasqaykichej rumeqa, aswan sumaj wasi esquina rumiman tukupun. 12Salvacionqa Jesucristollapi tarikun. Kay pachapi mana waj suti runasman qosqa kanchu, mayqempichus salvasqas kananchejpaj.

13Paykunaqa mayta t'ukuspa, qhawarqanku Pedrota Juantawan mana manchachikuspa parlajta, astawanqa yachaspa mana yachakuyniyoj runaslla kasqankuta. Rejserqankutaj kay runasqa Jesuswan khuska purisqankuta. 14Chay thañisqa suchu runata apostoleswan khuska sayashajta rikuspa, kurajkunaqa mana contrampi ima niyta aterqankuchu. 15Chaymantataj Pedrota Juantawan jawaman llojsichispa, paykuna ukhu tantakuspa parlarqanku. 16Nerqankutaj: Imanasuntaj kay runaswanri? Jerusalempi tukuy tiyakojkuna yachanku kay milagrota ruwasqankuta. Chaytaqa mana pakayta atisunmanchu. 17Amaraj kay tukuy imas llajtanchejpi astawan yachakunampaj, paykunata k'amispa mancharichina, ama kunanmanta qhepaman ni piman astawan kay Jesuspa sutimpi parlanankuta.

18Chaymantataj, apostolesta wajyaspa kamacherqanku amapuni pimampis astawan parlanankuta, nitaj yachachinankuta Jesuspa sutimpi. 19Pedrowan Juanwantaj, paykunaman kuticherqanku: Qankuna unanchaychej Diospa ñaupaqempi imachus cheqan kasqanta. Allinchu kanman qankunataraj ñaupajta kasunayku, chayrí Diostachu? 20Mana ch'in kayta atiykumanchu. Willanaykupuni tiyan imatachus yachasqaykuta, rikusqaykuta, uyarisqaykuta ima.

21Ajinamanta kuraj kamachejkunaqa, maytapuni manchachispa Pedrota Juantawan kachariporqanku. Jasut'iytapis mana aterqankuchu runarayku, imaraykuchus tukuy runas Diosta yupaychasharqanku milagrota rikusqankumanta. 22Chay suchu runaqa, mayqempichus milagro ruwakorqa chayqa, tawa chunka kuraj watasniyoj jinaña karqa.

Creejkuna Diosmanta kallpata mañakunku

23Kacharisqankutawantaj Pedrowan Juanwan paykunamanta kajkunaman rerqanku. Paykunamantaj willarqanku imaynatachus kuraj sacerdotes, kurajkunawan, tukuy imasta paykunaman nisqankuta. 24Paykunataj chayta uyarispa, tukuyninku uj sonqolla Diosman qhaparerqanku, nispa: Señor, qan ruwarqanki janaj pachata, kay pachatawan, jatun qochatapis, tukuy imas paykunapi kajkunatawan. 25Qanqa Santo Espiritunejta parlarqanki, tataykoj kamachiyki Davidpa siminnejta, kay jinata nerqanki: Imaraykutaj tukuy nacionesmanta runakuna ch'ajwanku? Imajtintaj tukuy aylluspis qhasi mana kajllata yuyankuri? 26Kay pachapi reyes oqharikorqanku, kamachejkunapis oqharikuspa ujllapi tantakorqanku Señorpa contrampi, Cristompa contrampi ima.

27-28Cheqamanta Herodesqa Poncio Pilatowan kay llajtapi tantakorqanku, gentileswan, israelitaswan ima; ajllasqa kamachiyki Jesuspa contrampi oqharikunankupaj, pitachus qan jawerqanki; ruwanankupajtaj imaynatachus qan qallariymantapachaña wakicherqanki atiyniykiwan, munayniykiman jinataj kanampaj. 29-30Kunanqa Señor, qhawariy imaynatachus phiñakuspa, manchachiwasqaykuta. Kunanqa kamachisniykita kallpachay ari, ama manchachikuspa palabraykita willanankupaj, makiykitataj aysarejtiyki onqosqas thañikunankupaj. Milagros jatun t'ukuna rikuchinas ima ruwakuchunku, ajllasqa kamachiykej Jesuspa sutinnejta.

31Diosmanta mañakuyta tukusqankutawantaj, maypichus kasharqanku chay cheqa kuyurerqa. Tukuyninkutaj Santo Espirituwan junt'asqas karqanku, Diospa palabrantataj mana manchachikuspa willayta qallarerqanku.

Tukuy ima tukuyninkojta karqa

32Chay chhika creejkuna uj yuyaylla, uj sonqolla karqanku. Mana pipis nejchu kapuynin paypata kasqanta. Manachayqa tukuy imas tukuyninkojta karqa. 33Apostolesqa imatachus yachasqankuta manchay atiywan willasharqanku, Señor Jesuspa kausarimpusqanmanta. Diostaj ashkhata yanapaj tukuyninkuta. 34Paykuna ukhupitaj mana pipis pisichikojchu. Jallp'asniyojkunaqa wasisniyojkuna ima, chay kapuyninkuta vendemuspa qolqeta apamoj kanku. 35Chay qolqetataj apostolesman jaywaj kanku. Chaymantataj rak'iraj kanku sapa ujman, maychus pisichikusqankuman jina. 36Paykuna ukhupitaj José sutiyoj runa, Chipre churumanta karqa Leví ayllumanta. Apostolestaj payta suticharqanku Bernabé nispa; chayqa niyta munan sonqochaj. 37Bernabepis jallp'anta vendemorqa, chay qolqeta apamuspataj apostolesman jaywarqa.

Currently Selected:

HECHOS 4: QCHSB

Highlight

Copy

Compare