HECHOS 19

Pablo rin Efesoman

1Apolos Corintopi kashajtintaj, Pabloqa puna jallp'asnejta rerqa, Efeso llajtaman chayanankama. Chaypitaj wakin yachachisqaswan tinkorqa. 2Paykunatataj taporqa: Santo Espirituta jap'erqankichejchu creeshaspaqa?

Paykunataj kuticherqanku: Mana uyarillaykupischu Santo Espíritu kasqanta.

3Pablo tapullarqataj: Chantá ima bautismowantaj bautizachikorqanki chej?

Paykunataj kuticherqanku: Juampa bautismonwan, nispa.

4Chaymantataj Pablo nerqa: Juanqa bautizarqa juchamanta kutirikuy bautismowan. Chay runasmantaj yachacherqa paypa qhepanta jamoj Jesuspi creenankuta.

5Chayta uyarispataj bautizachikorqanku Señor Jesuspa sutimpi. 6Pablo makisninta paykunaman churaykojtintaj Santo Espíritu paykunaman uraykamorqa, parlaykunapitaj parlarqanku. Diospa palabrantataj sut'incharqanku. 7Tukuyninkupitaj chunka iskayniyoj qharis karqanku.

8Pablotaj sinagogasman yaykuspa, mana manchachikuspa kinsa killa junt'ata yachacherqa, churanakuspa, Diospa reinonmanta unanchachiyta munaspa. 9Wakinkuna sonqosninkuta rumiyacherqanku, mana creeyta munaspataj tukuypa ñaupaqempi Mosoj Ñampa contranta rimarqanku. Chayrayku Pabloqa paykunamanta t'aqakuspa, Tirano nisqaj escuelanman yachachisqasta pusarqa. Chaypitaj sapa p'unchay yachachej. 10Ajinata ruwaspa karqa iskay watata, chayraykutaj Asiapi tukuy tiyakojkuna judíos, ajinallatataj griegospis Señor Jesuspa palabranta uyarerqanku. 11Pablonejta Diosqa, mana jayk'aj rikusqa jatuchaj milagrosta ruwasharqa. 12Chay jinapuni karqa, ima pañuelotapis, chayrí ima p'achallatapis Pabloj cuerponman chayachispa aparqanku; onqosqasman churamojtinkutaj thañikaporqanku, supaykunapis onqasqasmanta llojserqanku.

13Wakin puriskiri aysiri judiostaj, Señor Jesuspa sutinta uyarispa, sajra espiritusta wijch'uyta munallarqankutaj, kay jinata nispa: Chay Jesuspa sutimpi pimantachus Pablo parlan, kamachiykichej llojsinaykichejta, nispa.

14Chayta ruwasharqanku, Esceva judío kuraj sacerdotej qanchis wawasnin. 15Sajra espiritutaj paykunaman kuticherqa: Jesustaqa rejsini, pichus Pablo kasqantapis yachallanitaj. Qankunarí, pikunataj kankichej?, nispa.

16Sajra espirituyoj qharitaj, paykunaman phinkiykuspa maqararqa paykunata atipanankama. Chay runastaj q'ala q'alalla, sinch'i maqasqas ayqerqanku chay wasimanta. 17Efeso llajtapi tukuy judiostaj, griegospis, chayta yachaspa manchachikorqanku, Señor Jesuspa sutintataj jatuncharqanku.

18Creejkunamantapis ashkhas jamuspa, tukuypa uyarinanta willakorqanku paykunapis ñaupajta sajra ruwasqankumanta. 19Ashkha yatiristaj librosninkuta tantaykuspa apamorqanku, tukuypa rikunantataj ruphaykucherqanku. Chay ruphachisqankutaj phishqa chunka waranqa qolqeman ruwakorqa. 20Ajinatapuni atiywan Diospa palabran tukuynejman chayasharqa, sinch'ichakusharqataj.

21Chay tukuy imas qhepata, Pabloqa munarqa pasayta Macedonianta, Acayantataj, Jerusalenman chayanankama, chaypi kaspañataj Roma llajtatapis rikumunaypuni tiyan, nispa. 22Macedoniamantaj kacharqa iskay yanapajkunasninta, Timoteota, Erastotawan. Chaykamataj Pabloqa uj pisitawan Asiapi qheparikorqa.

Efesopi ch'ajwa

23Chay p'unchaykunapi Efesopi jatun ch'ajwa oqharikorqa Mosoj Ñanrayku. 24Demetrio sutiyoj runa platero karqa, qolqepi ruwaj Dianaj juch'uy templitosninta. Paywan llank'ajkunatataj ashkha qolqeta ganachej. 25Tukuy paywan kajkunata tantachimuspa nerqa: Wiraqochis, qankuna allinta yachankichej kay oficionchejwan qhapajyakusqanchejta. 26Qankunaqa rikushankichej, uyarishankichejtaj, imaynatachus Pablo tukuyman junt'achisqanta: Mana dioskunachu kanku runaj makinwan ruwasqasqa, nispa. Chay nisqanwantaj, ashkha runaj sonqonta tijrachishan mana kay Efeso llajtallapichu, astawanqa tukuy Asiantimpi. 27Chayqa mana walejchu noqanchejpajqa, imaraykuchus qolqe jap'inanchej tukukaponqa. Astawanqa mana chayllachu, Dianaj templon qhesachasqa kanqa, jatun atiynintaj chinkarenqa. Yachankichej jina, Dianataqa tukuy Asiapi, kay tukuy mundontimpi runas yupaychanku.

28Demetrioj parlasqanta uyarispataj, runas phiñarikorqanku, qhapariytataj qallarerqanku: Efesiosmanta Artemisaqa jatun!, nispa.

29Tukuy llajtantintaj oqharikuspa Gayota, Aristarcotawan teatromanta qhatatispa orqhorqanku. Paykunaqa Macedoniamanta karqanku, Pablota yanapajkuna. 30Pabloqa munarqa runaspa chaupinman yaykuyta, creejkunataj jark'akorqanku. 31Wakin Asiapi kamachejkunamanta Pabloj kausaqesnimpis, Pabloman nicherqanku amapuni teatroman rinanta. 32Tukuy tantakojkuna manchayta ch'ajwasharqanku. Wakin uj jinata qhaparisharqanku, wajkunataj waj jinata; ashkhastaj mana yachallarqankupischu imapajchus tantakamusqankuta. 33Runa chaupimanta Alejandrota orqhomuspataj, tanqaspa ñaupajman aparqanku. Paytaj makinwan ch'inyachispa munasharqa kutichikuyta. 34Runastaj rejsiytawan Alejandroqa judío kasqanta, iskay horata jina uj kunkalla qhaparerqanku: Efesiasmanta Artemisaqa jatun!, nispa.

35Uj qelqeritaj runasta ch'inyachispa, nerqa: Efeso llajtayojkuna, pitaj mana yachanchu Efeso llajtanchej jatun Artemisaj templonta waqaychasqanta? Jinallatataj janaj pachamanta jamoj lantintapis? 36Chayrayku jinapuni kajtenqa, ch'inlla kakuychej, amataj imatapis mana allinta unanchaspaqa ruwaychejchu. 37Yanqhallata kay qharista pusamunkichej, mana paykunaqa suwankuchu templomanta, nitaj diosninchej Artemisapajpis rimankuchu. 38Demetriochus llank'ajkunasninwan, pitapis ch'atayta munanku chayqa, jueces tiyan sapa ujninku uyarichikunankupaj. 39Waj imasmantapuni ch'atayta munaspaqa, chaykunamanta juntapi allin uyarisqa kankichej. 40Chay ch'ajwaqaykichejwanqa mana allimpichu rikhurinkichej, yuyanqanku oqharikusqanchejta, manataj atisunmanchu kutichikuyta chaywan tumpasqa kaspaqa. 41Ajinata parlayta tukuspataj, runasta kachaporqa.

Currently Selected:

HECHOS 19: QCHSB

Highlight

Copy

Compare