HECHOS 16

Timoteo rin Pablowan Silaswan

1Chaymantataj Pablo Silaswan chayarqa Derbeman, Listramanwan. Chaypitaj uj yachachisqa Timoteo karqa; mamanqa creej judía, tatantaj griego. 2Listrapi Iconiopi tiyakoj hermanosqa, allinta parlaj kanku Timoteomanta. 3Pablotaj Timoteota pusayta munarqa, judiosta mana phiñachayta munaspataj circuncidarqa, imaraykuchus chay llajtapi judiosqa yacharqanku Timoteoj tatan griego kasqanta. 4Llajtamanta llajta rispataj, willarqanku imatachus Jerusalempi apóstoles, ancianoswan kamachisqankuta. Hermanostataj kamacherqanku chaykunata junt'anankuta. 5Ajinamanta iglesiasqa creesqankupi kallpachakorqanku, sapa p'unchaytaj astawan ashkhayarqanku.

Pablo mosqokun uj macedoniowan

6Chay qhepatataj paykuna Frigianta, Galacianta rishajtinku Santo Espíritu paykunata jark'arqa Asiapi ama evangeliomanta willanankuta. 7Misiaman chayaspataj Bitiniaman yaykuyta munarqanku, Jesuspa Espirituntaj mana rinankuta saqerqachu. 8Ajinamanta rerqanku Misianejta, uraykorqankutaj Troasman. 9Chay tutataj Pabloqa mosqoypi jina rikorqa uj macedonio runata. Paypa ñaupaqempi sayaykuspa mañakorqa: Jamuriy ari Macedoniaman yanaparinawaykupaj, nispa. 10Chay mosqoypi jina Pablo rikusqanrayku, wakichikorqaykupacha Macedoniaman rinaykupaj. Chay mosqoynejta yacharqayku Dios wajyasqanta paykunaman evangeliota willanaykupaj.

Lidia creen Jesuspi

11Troasmantataj yakunejta botepi cheqanta rerqayku Samotracia churukama, q'ayantintaj Neapolisman chayarqayku. 12Chaymantataj rerqayku Romaj kamachiynimpi kaj Filipos llajtaman, mayqenchus Macedoniapi aswan jatun llajta karqa. Chaypitaj qhepakorqayku uj pisi p'unchaykunata. 13Samakuna p'unchaytaj, llajtamanta llojsispa mayu cantoman rerqayku, Diosmanta mañakuna kaj chayman. Tiyaykukuspataj evangeliomanta willarqayku chay tantasqa warmisman. 14Ujnin warmitaj Lidia sutiyoj karqa, Tiatira llajtamanta. Payqa qhatoj may sumaj puka kulli generosta, Diostataj yupaychaj. Señortaj Lidiaj sonqonta kicharerqa, Pabloj nisqanta uyarinampaj. 15Lidiataj bautizachikorqa familianwan ima. Paytaj niwarqayku: Sichus qankuna yuyankichej, tukuy sonqo Señorpi creesqaykuta chayqa, wasiyman yaykuspa karikuychej, nispa.

Ajinamanta qhepachiwarqayku.

Pablowan Silaswan carcelpi

16Uj p'unchaytaj Diosmanta mañakoj rishajtiyku, uj kamachi sipas taripamuwarqayku. Payqa sajra layqa espirituyoj kaspa adivinaj. Ashkha qolqeta qoj patronesninman, runaspa suertenta qhawaspa. 17Chay sipastaj qhatiwarqayku, Pablota, noqaykutawan. Qhaparqachaspataj nerqa: Kay runasqa patapi kaj Diospa kamachisnin kanku. Paykuna willasunkichej salvación ñanmanta.

18Ajinallatapuni ashkha p'unchaykunata qhaparisharqa. Pablotaj chaymanta phiñakorqa, kutirikuspataj sipaspi kashaj sajra espirituta nerqa: Jesucristoj sutimpi kamachiyki paymanta llojsinaykita. Chay kikimpachataj espiritoqa sipasmanta llojserqa.

19Sipaspa patronesnin manaña qolqeta jap'inanta yachaspa, Pablota Silastawan jap'iykorqanku, pusarqankutaj plazapi kamachejkunaman. 20Juecesman pusaykuspataj nerqanku: Kay runasqa, judíos kashaspa, llajtanchejta ch'ajwachishanku. 21Waj jina yachachiykunatataj yachachishanku. Noqanchej romanosqa mana jap'iyta atisunmanchu, nitaj ruwaytapis.

22Runastaj, apostolespa contranta oqharikorqanku. Juecestaj kamacherqanku Pabloj p'achasninta Silaspatawan lluch'uspa, paykunata jasut'inankuta. 23Manchayta jasut'ispataj carcelman wisq'acherqanku. Carcelerotataj sumajta kamacherqanku qhawananta. 24Carcelerotaj chay kamachiyta kasuspa, aswan ukhuman wisq'aykorqa, chakisninkutataj cepoman mat'iykorqa.

25Chaupi tutata jina Pablowan Silaswan Diosmanta mañakuspa takisharqanku. Waj wisq'asqaspis chay takisqankuta uyarisharqanku. 26Ujllata jallp'a sinch'ita kuyurerqa. Carcelpa cimientosnintataj thalarerqa, kikimpachataj punkus kicharikorqanku. Tukuy presosmantataj cadenas phaskakorqanku. 27Carcelerotaj rijch'arerqa, punkusta kichasqasta rikuspataj, presos ayqesqankuta yuyaspa, espadanta orqhospa wañuchikuyta munarqa. 28Pablotaj sinch'ita qhaparerqa: Ama imanakuychu, tukuyniyku kaypi kakushayku, nispa.

29Chaymantataj carceleroqa k'anchayta mañaspa yaykorqa, kharkatitispataj Pablojpa, Silaspa ñaupaqenkuman wijch'uykukorqa. 30Jawaman orqhomuspataj, paykunata taporqa: Wiraqochis, imatataj ruwasaj salvasqa kanaypajri?

31Paykunataj kuticherqanku: Señor Jesuspi creey, qantaj salvasqa kanki familiaykiwan ima.

32Paykunataj willarqanku Señorpa palabranta payman, tukuy wasimpi kajkunamanwan. 33Carceleroqa, chay tutapacha paykunata pusaspa nanasqasninkuta mayllarqa. Chay kikimpachataj pay, tukuy familian ima bautizachikorqanku. 34Pablota Silastawan wasinman pusaspataj mikhunata jaywarqa. Paytaj familianwan kusikorqa Diospi creesqankurayku.

35Q'ayantin paqarintaj jueces kacharqanku soldadosta, Pablota Silastawan kacharinankupaj. 36Carcelerotaj Pabloman willarqa: Jueces nichimunku qankuna kacharisqa kanaykichejta. Kunanqa sonqo tiyasqas ripuychej.

37Pablotaj soldadosman nerqa: Noqaykutaqa, manaraj juchachaspalla, tukuypa rikunanta jasut'ichiwarqayku, manapis Roma llajtayojchu kaykuman jina, wisq'achiwarqaykutaj. Kunanqa, pakayllamantachu kachariwasqayku? Mana jinachu kanqa. Paykuna kikin jamuchunku orqhonawaykupaj.

38Soldadostaj kay nisqankuta juecesman willamorqanku. Paykunataj, Pablowan Silaswan, romanos kasqankuta yachaspa mancharerqanku. 39Juecestaj carcelman rispa, nerqanku Pablota Silastawan ama phiñakunankuta pantasqankurayku. Carcelmanta orqhospataj mañarqanku llajtamanta ripunankuta. 40Pablowan Silaswantaj, carcelmanta llojsispa, Lidiaj wasinman rerqanku. Hermanosta rikuspataj, paykunata sonqochaspa riporqanku.

Currently Selected:

HECHOS 16: QCHSB

Highlight

Copy

Compare