2 MACABEOS 2
2
1Ñaupa librospi leenchej profeta Jeremiasqa presochasqasman nisqanta ninata apakapunankuta. Chayta ñaupajta nerqanchejñaqa. 2Nillasqataj Jeremiasqa, Diospa leyninta qoytawanqa, ama Señorpa kamachikusqasninmanta qonqapunankuta. Nillasqataj ama munapayanankuta qoritawan qolqetawan qhasi dioskunaj patankupi rikonqanku chaykunata. Chantapis, nillasqataj ama munapayanankuta chaypi kashanku chay warawastapis. 3Nillasqataj amapuni Diospa leyninta saqerparinankuta. 4Chay libropi escribisqallataj kasqa profetaqa, Diospa nisqanrayku, apasqanta Dioswan tinkukuna toldota, trato arcatawan. Ajinallataj, chay libropi willasqallataj kashan profetaqa risqanta chay orqoman maymantachus Moisés rikusqa chay jallp'ata, Dios israelitasman qosqaykichej nisqa chayta. 5Chay orqoman chayaspataj, Jeremiasqa uj qaqa jusk'uta rikusqa. Chayman churasqa trato arcata, toldota, altartawan, maypichus q'osñichinku inciensota chayta. Tukuy chayta apaytawanqa yaykunata wisq'asqa. 6Chantaqa, paywan rejkunamanta wakinkunaqa, kutirimusqanku señalesta ñampi churanankupaj, manataj chay cuevataqa tarisqankuñachu. 7Chayta yachaspa Jeremiasqa k'amisqa nispa: Chay cheqaqa pakayllapipuni kanan tiyan, Diosqa ayllunmanta khuyakunankama, watejmanta tantaykuchispa. 8Chaypachallaña Señorqa rikhurichenqa chaykunata. Chaypacha Señorpa glorian rikhurimonqa phuyuwan, imaynatachus Moisespa tiempompi rikhurimorqa ajinata. Chantaqa, imaynatchus Salomonqa Señormanta mañarikorqa temploqa santoyachisqa kananta, ajinata. 9Chantaqa, chay libropi escribisqallataj karqa yachayniyoj Salomonqa jaywasqanta santoyachiy rikuchikuta templotataj kicharisqanta. 10Imaynachus Moisesqa Señormanta mañakorqa, cielomantataj uraykamun uj nina mayqenchus oqoykun tukuy chay animalkunata, rikuchikupaj churasqasta, ajinallataj Salomompis Diosmanta mañakullasqataj. Mañakojtintaj cielomanta uraykamun uj nina, oqoykuntaj q'ala rikuchikupaj churasqa animalesta. 11Moisés nisqa: Juchasmanta jaywasqa rikuchikoqa ninawan ruphachisqa karqa, mana mikhusqachu kasqanrayku. 12Salomompis pusaj día junt'ata fiestata ruwacherqa.
13Chaypis escribisqa karqa chay libropi maypichus churasqanku Nehemíaspa tiempompi yachasqanku yuyarisqankuta ima. Chaypi willallankutaj Nehemías tantachimusqanta librosta reyesmanta, profetasmanta, Davidpa salmosninmanta, reyespa cartasninkumantataj, rikuchikusmanta yachachinku chaykunamanta. 14Ajinallataj Judaspis tantakamorqa tukuy apasqas kasharqanku chay librosta guerrasrayku. Kunanqa chay librostaqa noqayku jap'ishayku. 15Qankunachus munawajchej chayqa, runasta kachamuychej librosta apakapunankupaj.
16Noqaykoqa wakichikushaykuña fiestata ruwanaykupaj templonchej llimphuyachisqa kasqanmanta. Kunanqa qankunaman escribimuyku, qankunapis chay fiestata ruwanaykichejpaj. 17Diosninchej tukuy ayllunta salvarqa. Qorqataj tukuykunaman chayaqenta, reinonta sacerdociotawan. Chantaqa tukuy noqanchejta ajllawarqanchej paypata kananchejpaj. 18Chaytaqa Moisespa leyninnejta Diosninchej ruwananta nerqa. Chayraykoqa niyku tukuy noqanchejtapis khuyakunanta tantakunawanchejtataj ajllakusqan llajtampi, mundontimpi kashanku tukuy cheqasmanta chayman ayllusninchejta pusaspa. Payqa ari imaymana llakiymanta orqhowarqanchej templontataj llimphuyacherqa.
Kay librota ruwajqa qallariynimpi kayta nimusunkichej
19Cirene llajtayoj Jasonqa escriberqa Judas Macabeomanta, hermanosninmantawan. Chantataj, escribillarqataj jatun templo llimphuyachisqa kasqanmanta, altar santoyachisqa kasqanmantataj. 20Ajinallataj, escribillarqataj maqanakusmanta rey Antíoco Epífanas contrampi karqa chaykunamanta, wawan Eupátor contrampi karqa chaykunamantawan. 21Chantaqa willarqataj Diosninchej jatuchajkunata ruwasqanta yanapaspa wapu runasta pikunachus tukuy sonqo oqharikorqanku judiospa religionninrayku. Chayrayku ari chay runasqa pisilla kajtinkupis llajtata ch'inman tukucherqanku, ayqecherqankutaj karumanta jamorqanku chay soldadosta. 22Paykuna watejmanta jap'ikaporqanku templonchejta may rejsisqa mundontimpi chayta. Jerusalén llajtapis kacharicherqanku ajeno makismanta. Watejmantataj churallarqanku Diospa leyninta qonqachisqa kanan karqa chayta. Señorqa k'acha sonqowan paykunata qhawarqa. 23Noqaykuri uj librollaspi churarqayku imatachus Jasonqa phishqa libropi churarqa chayta.
24Yachayta munajkunaqa imatachus ñaupa tiempospi karqa, umankuta muyuchinku rikuspa numerosta, rikuspataj ashkha imasmanta librospi parlasqankuta. 25Chayrayku noqayku munayku gustowan leenaykichejta kay librota. Tukuy chayta umankuman churayta munajkunapis, atillanqanku. Tukuypajpuni sumaj kanqa kay libroqa. 26Noqaykoqa anchata jump'ispa uj librollaman pasachiyku jatun libromanta. 27Imaynachus uj mikhunata wakichejqa jump'iykun wajkunata kusichiyta munaspa, ajinallataj noqaykupis. Kunanqa noqayku runa masisniykuta yanapayta munasqaykurayku, sayk'uspa kusisqalla kasqayku. 28Mana willasqaykuchu tukuy imatapuni mana ni imamanta qonqakuspa. Chaytaqa historiata qelqajlla ruwachun. Noqaykoqa tukuy imamanta tumpallata willamusqayku. 29Imaynachus arquitectoqa mosoj wasita ruwanan kajtin tukuy wasitapuni qhawanan tiyan, maestro pintorestaj, k'achanchanasta churajkunapis qhawanku imatachus ruwananku tiyan chayllata, ajinallataj noqaykupis mana tukuytachu qhawasqayku. 30Historiata escribejqa qallariyninmantapacha, tukuy imatapuni qhawanan tiyan, mana ni imamanta qonqakuspa. 31Pichus chaymanta imallatapis orqhon, tumpallata willanan tiyan, mana tukuy imatapuni willaspa. 32Kunanqa imatachus niyta munarqayku qallarishaykuña, mana ni imata yapaspa nisqaykuman. Mana allinchu kanman ari qallariypi ashkha kanan wajkunata pisiyachispa.
Currently Selected:
2 MACABEOS 2: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.