2 CORINTIOS 3

Cristonejta atipaykuna

1Watejmantachu qallarisqayku noqaykumanta allinta parlayta? Chayrí, wakinkuna jinachu cartasta qonawaykuta munashayku, allin qhawasqas qankuna ukhupi kanaykupaj, chayrí, qankunachu cartasta qowasqayku allin qhawasqas kanaykupaj? 2Noqaykoj cartasniykoqa qankuna kankichej, sonqosniykupi escribisqas, rejsisqas, tukuy runaj leesqasnintaj. 3Arí, sut'i kashan qankuna Cristoj cartan kasqaykichej, jaywasqa qankunaman noqaykunejta; mana tintawanchu, astawanqa kausaj Diospa Espiritunwan, mana llusk'a rumi tablapichu, astawanqa aycha sonqos tablapi.

4Chaytaj Diospi tiyapuwayku Cristonejta. 5Manataj noqaykoj yachayniykumantachu jamun, imatapis yuyanaykupaj kikin noqaykojtapis kanman jina; astawanqa yachayniyku Diosmanta jamun. 6Kikin Diosllataj, uj mosoj tratomanta yachachejkunata churawarqayku, mana escribisqaman jinachu, astawanqa Espirituman jina. Leyman jina escribisqarí wañuchin, Espiritutaj kausarichin.

7Moisespa leynenqa wañuypaj karqa, llusk'a rumipi letraswan escribisqa, k'anchayniyojtaj karqa. Israelitaspis mana qhawariyta aterqankuchu Moisespa uyantaqa. Uyanqa anchatataj lliphipisharqa. Chaywampis, chay k'anchayqa chharpuyaporqa. 8Manachu astawan k'ancharinman Santo Espíritoj ruwayninwanqa? 9Chay wañuyman apaj leychus may lliphipiyniyoj karqa chayqa, manachu astawan lliphipiyniyoj kanman salvasqa kasqanchejqa? 10Ñaupa leyqa may lliphipiyniyoj karqa, kunanqa manaña lliphipiyniyojchu, Espíritoj leyninmanta nisqaqa, imaraykuchus Espíritoj leynenqa astawan lliphipiyniyoj. 11Sichus chinkapoj ley ajina karqa chayqa, chay wiñaypaj kajqa, may jina lliphipiyniyojchus kanqa.

12Chayrayku chay suyayniyoj kaspa, sut'inta parlayku. 13Mana Moisés jinachu ruwayku. Payqa uyanta qhataykukorqa velowan ama israelitas qhawanankupaj, imachus chinkapojpa tukukuyninta. 14Paykunaj yuyayninkutaj chharpuyarqa; imaraykuchus kunan p'unchaykama ñaupaj tratota leejtinku, chay kikin velo mana qhatarasqa; chay velotataj Cristo qhatararqa. 15Kunan p'unchaykamapis Moisespa leyninta leenku chayqa, veloqa paykunaj sonqonku patapi churasqa kashan. 16Maypachachus Israel ayllu Señorman kutirikojtin, chay veloqa qhechusqa kanqa. 17Señorqa Espiritumin; maypichus Señorpa Espíritun kashan, chaypi kacharikuy tiyan. 18Chayrayku tukuy noqanchej qhawashanchej uya qhatarasqa uj espejopi jina, Señorpa lliphipiyninta. Noqanchejpis k'anchaymanta k'anchayman, kikin rijch'ayninman tukunchej Señorpa Espiritunman jina.

Currently Selected:

2 CORINTIOS 3: QCHSB

Highlight

Copy

Compare